Matye 10
10
Douz Zapot
(Mrk 3.13-19; Lk 6.12-16)
1Zezi ti apel son 12 disip. I ti donn zot lotorite pour sas bann demon, geri tou bann maladi ek tou bann diformite. 2La non sa 12 zapot: Premye Simon, ki zot ti apel Pyer, ek son frer, Andre; Zak, garson Zebede ek son frer Zan; 3Filip ek Bartelemi; Toma ek Matye, ki ti en kolekter taks; Zak, garson Alfe, ek Tade; 4Simon, en nasyonalis, ek Zida Iskaryot, sa enn ki ti trai Zezi.
Misyon Douz Zapot
(Mrk 6.7-13; Lk 9.1-6)
5Zezi ti anvoy sa 12 zonm an misyon, avek sa bann lord swivan: Pa bezwen al dan bann rezyon kot bann non-Zwif i reste, ni dan okenn bann lavil Samari. 6Al plito kot bann brebi egare dan pep Izrael. 7Partou dan semen, anonse: Rwayonm lesyel i pros! 8Geri bann malad, redonn lavi bann ki'n mor, geri bann ki annan en maladi parey lalep, sas bann demon. Zot in resevwar gratwitman alor donn osi gratwitman. 9Pa bezwen anmenn okenn lanmonnen annor, ni annarzan, ni an kwiv dan zot pos. 10Dan zot vwayaz, pa bezwen anmenn ni sak, ni semiz de resanz, ni sandal, ni baton. Annefe, en zouvriye i annan drwa ganny son manze#10.10 War 1 Kor 9.14; 1 Tim 5.18..
11Kan zot ariv dan en lavil oubyen en vilaz, rode lekel ki pare pour resevwar zot, e reste kot sa dimoun, ziska ki zot kit sa landrwa. 12Kan zot antre dan en lakaz, dir: Lape i avek zot! 13Si bann zabitan sa lakaz i resevwar zot, zot salitasyon lape ava reste dan sa lakaz. Me si zot pa ganny akeyir, repran zot salitasyon lape.
14Si dan nenport ki lakaz oubyen lavil, dimoun pa resevwar zot, ni ekout zot, kit sa landrwa. Sekwe lapousyer ki avek zot lipye.
15Mon dir zot, sa i laverite: Zour zizman, zabitan Sodonm ek Gomor, pou ganny trete mwen severman ki bann zabitan sa lavil#10.15 War Zen 18-19..
Persekisyon
(Mrk 13.9-13; Lk 21.12-17)
16Mon pe anvoy zot parey bann mouton parmi bann loulou. Alor, zot bezwen rize parey bann serpan e inosan parey bann pizon.
17Fer atansyon! Zot pou ganny arete e ganny anmennen ankour. Zot pou ganny fwete dan zot bann sinagog. 18Akoz mwan, zot pou ganny anmennen devan bann gouverner ek bann lerwa. Zot ava mon temwen devan zot e devan bann non-Zwif. 19Kan zot ganny anmennen devan tribinal, pa trakase pour konnen ki pou dir, ni koman zot pou dir. Parol ki zot devre dir, pou vini dan sa moman menm.
20Annefe, pa zot ki pou koze, me Lespri zot Papa ki pou koz atraver zot.
21En frer pou denons son prop frer pour li ganny touye. Papa pou denons son prop zanfan. Bann zanfan pou tourn kont zot paran e fer zot ganny kondannen anmor. 22Tou dimoun pou ay zot akoz mwan. Me sa enn ki persevere ziska lafen, pou ganny sove. 23Kan zot ava ganny persekite dan en lavil, sov dan en lot. Mon dir zot, sa i laverite: Zot pa pou ankor fini fer letour tou bann lavil dan Izrael, avan ki Fis-de-Lonm i vini.
24En disip pa pli enportan ki son met; ni en serviter pli gran ki son patron. 25En disip i devre kontant pour vin parey son met, e en serviter parey son bourzwa. Si zot in apel Belzebil, sa enn ki sef lafanmir, a pli fort rezon, lezot manm son fanmir ava ganny ensilte.
Lekel Zot Devre Per
(Lk 12.2-7)
26Alor, pa bezwen per! Tou sa ki kasyet pou ganny dekouver; tou sa ki sekre pou ganny devwale. 27Sa ki mon dir zot dan fernwanr, repet li dan kler. Sa ki zot tande an sekre, pibliy li lo twa lakaz. 28Pa per bann ki touy lekor, me ki pa kapab touy ou et antye. Plito per sa enn ki kapab detri ou lekor ek ou et antye dan lanfer. 29Pa zot vann de pti sren pour en sou? Pourtan, en sel pa tonm ater san lavolonte zot Papa. 30Menm, bann bren seve lo zot latet in ganny konte. 31Alor, pa bezwen per; zot vo bokou plis ki en kantite sren!
32Sa enn ki deklare devan lezot ki i mon disip, mwan osi, mon pou rekonnet li devan mon Papa ki dan lesyel. 33Me sa enn ki rezet mwan piblikman, mon pou rezet li devan mon Papa ki dan lesyel.
Pa Lape, me Lepe
(Lk 12.51-53; 14.26-27)
34Pa krwar ki mon'n vin anmenn lape lo later. Mon pa'n vin anmenn lape, me lepe. 35Mon'n vin anmenn divizyon: Garson kont papa; fiy kont manman; belfiy kont belmer#10.35 Pour bann verse 35-36, war Mis 7.6.. 36Ou lennmi pou parmi dimoun dan ou prop fanmir.
37Sa enn ki kontan son papa oubyen son manman plis ki mwan, i pa merit ganny apele mon disip. Sa enn ki kontan son garson oubyen son fiy plis ki mwan, i pa merit ganny apele mon disip.
38Sa enn ki pa pran son lakrwa e swiv mwan, i pa merit ganny apele mon disip. 39Sa enn ki oule gard son lavi pou perdi li, me sa enn ki perdi son lavi akoz mwan, pou gard li.
Rekonpans
(Mrk 9.41)
40Sa enn ki resevwar zot, i resevwar mwan. Sa enn ki resevwar mwan, i resevwar sa enn ki'n anvoy mwan.
41Sa enn ki resevwar en profet Bondye, akoz i en profet, i pou resevwar rekonpans en profet. Sa enn ki resevwar en dimoun ki zis, akoz i en zis, i pou resevwar rekonpans en zis.
42En dimoun ki donn menm en ver delo fre sa enn ki pli pti parmi mon bann disip, akoz i mon disip, mon dir zot, sa i laverite: I pa pou perdi son rekonpans.
Labib An Kreol Seselwa © Seychelles Bible Society, 2013.