Matye 1
1
Zanset Zezi-Kri
(Lk 3.23-38)
1Sa i lalis bann zanset Zezi-Kri, desandan David, ki ti li menm en desandan Abrahanm:
2Abrahanm ti papa Izaak; Izaak ti papa Zakob; Zakob ti papa Zida ek son bann frer. 3Zida ti papa Peres ek Zara; zot manman ti apel Tamar. Peres ti papa Hesronn; Hesronn ti papa Aranm; 4Aranm ti papa Aminadab; Aminadab ti papa Naasonn; Naasonn ti papa Salmonn; 5Salmon ti papa Boaz; son manman ti apel Rahab. Boaz ti papa Obed, son manman ti apel Rit. Obed ti papa Zese; 6Zese ti papa David.
Lerwa David ti papa Salomon; son manman ti fanm Iri. 7Salomon ti papa Roboanm; Roboanm ti papa Abya; Abya ti papa Asaf; 8Asaf ti papa Zozafat; Zozafat ti papa Zoranm; Zoranm ti papa Ozyas; 9Ozyas ti papa Yoatanm; Yoatanm ti papa Akaz; Akaz ti papa Ezekyas; 10Ezekyas ti papa Manase; Manase ti papa Amonn; Amonn ti papa Zozyas; 11Zozyas ti papa Yekonya ek son bann frer. Sa ti dan lepok ki pep Izraelit ti ganny deporte Babilonn#1.11 War 2 Rwa 24.12-16..
12Apre ki pep Izraelit ti'n ganny deporte Babilonn, Yekonya ti fer Sealtiel; Sealtiel ti papa Zorobabel; 13Zorobabel ti papa Abihoud; Abioud ti papa Elyakim; Elyakim ti papa Azor; 14Azor ti papa Sadok; Sadok ti papa Akim; Akim ti papa Elihoud; 15Elihoud ti papa Eleazar; Eleazar ti papa Matan; Matan ti papa Zakob; 16Zakob ti papa Zozef ki ti marye avek Mari; Mari ti donn nesans Zezi, ki zot ti apel Mesi.
17An tou, ti annan 14 zenerasyon depi Abrahanm ziska David, 14 zenerasyon depi David ziska deportasyon Babilonn, e 14 zenerasyon depi deportasyon Babilonn ziska nesans Mesi.
Nesans Zezi
(Lk 2.1-7)
18La dan ki sirkonstans Zezi-Kri ti ne: Mari, manman Zezi ti'n fiyanse avek Zozef. Me avan ki zot ti konmans viv ansanm, i ti trouv li ansent par laksyon Lespri Sen.
19Zozef, son mari, ti en zonm zis. Pour li pa dezonor Mari piblikman, i ti deside kas fiyansay an sekre.
20Letan i ti pe mazin sa, en lanz Senyer ti aparet avek li dan en rev. I ti dir li, “Zozef, garson David! Pa bezwen per pour pran Mari koman ou fanm, akoz sa zanfan ki i pou gannyen, in ganny formen par laksyon Lespri Sen. 21I pou donn nesans en garson, e ou ava apel li Zezi#1.21 Zezi i vedir: Senyer i sove., akoz i pou sov son pep dan son bann pese.”
22Tousala in arive pour ki tou sa ki Senyer ti'n dir par lentermedyer profet i realize:
23En zenn fiy vyerz pou tonm ansent;
i pou donn nesans en garson,
e zot pou apel li Emanouel#1.23 Eza 7.14.,
savedir, Bondye i avek nou.
24Kan Zozef ti reveye, i ti fer tou parey lanz Senyer ti'n ordonn li e i ti pran Mari koman son fanm. 25Me i pa ti ganny okenn relasyon avek li, ziska ki i ti donn nesans en garson ki Zozef ti apel Zezi.
Currently Selected:
Matye 1: BSK
Highlight
Share
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
