Zozye 4
4
Douz Ros Souvenir
1Kan tou pep Izrael ti'n fini travers larivyer Zourden, SENYER ti dir Zozye, 2“Swazir douz zonm parmi lepep, enn dan sak tribi, 3e donn zot sa lord: Zot ava anmas douz ros dan milye larivyer Zourden, dan landrwa kot bann pret ti debout. Anmenn sa bann ros avek zot, e depoz zot la kot zot ava pas lannwit.”
4Alor, Zozye ti apel sa douz zonm ki i ti'n swazir parmi bann Izraelit, enn dan sak tribi. 5Zozye ti dir zot: Pas devan Kof Lalyans SENYER, zot Bondye dan milye larivyer Zourden, e pran sakenn en ros lo zot zepol, enn pour sak tribi Izrael. 6Sa bann ros ava vin en siny parmi zot. Dan lavenir, kan zot bann zanfan ava demann zot: Ki savedir sa bann ros pour zot? 7Zot ava reponn ki delo larivyer Zourden ti koup an de devan Kof Lalyans SENYER. Kan Kof ti pas dan larivyer Zourden, delo Zourden ti koup an de. Konmsa, sa bann ros ava vin en memoryal pour bann Izraelit.
8Bann Izraelit ti fer parey Zozye ti'n ordonn zot. Zot ti pran 12 ros dan milye larivyer Zourden, enn pour sak tribi Izrael, parey SENYER ti'n ordonn Zozye. Zot ti anmenn sa bann ros kot zot ti pe kanpe e depoz zot la. 9Zozye ti osi fer dres 12 ros e met zot dan milye larivyer Zourden, kot bann pret ki ti anmenn Kof lalyans ti'n debout. Sa bann ros i ankor la ozordi. 10Bann pret ki ti pe anmenn Kof lalyans ti reste debout dan milye Larivyer Zourden, ziska ki tou sa ki SENYER ti'n ordonn Zozye pou dir lepep, ti'n ganny egzekite e parey sa ki Moiz ti'n ordonn Zozye.
11Ler tou dimoun ti'n fini travers larivyer Zourden, Kof SENYER ek bann pret ti travers devan lepep. 12Bann zonm arme dan tribi Riben ek Gad, e demi tribi Manase ti pas devan pep Izrael, parey Moiz ti'n ordonn zot. 13Anviron 40,000 zonm arme, ti travers larivyer Zourden devan SENYER, pare pour konba. Zot ti al dan direksyon laplenn sek Zeriko. 14Sa ki SENYER ti fer sa zour, ti fer pep Izrael antye ganny gran respe pour Zozye, parey zot ti respekte Moiz toultan son lavi. 15Answit, SENYER ti dir Zozye, 16“Ordonn bann pret ki pe anmenn Kof lalyans pou sorti dan larivyer Zourden.” 17Alor, Zozye ti donn sa lord bann pret, “Monte, sorti dan larivyer Zourden.” 18Ler bann pret ki ti pe anmenn Kof Lalyans SENYER ti sorti dan milye larivyer Zourden, e koman zot ti lev zot lipye pour al dan direksyon later, delo larivyer Zourden ti rekonmans koule e deborde lo sak kote, parey avan.
19Lepep ti travers larivyer Zourden dizyenm zour premye mwan. Zot ti kanp obor lavil Gilgal, dan Les frontyer Zeriko. 20Dan Gilgal, Zozye ti fer dres sa 12 ros ki zot ti'n pran dan larivyer Zourden. 21I ti dir avek bann Izraelit, “Plitar, kan bann zanfan ava demann zot paran: Ki savedir sa bann ros? 22Alor, zot ava fer zot bann zanfan konnen ki pep Izrael ti travers larivyer Zourden isi, dan sek. 23Annefe, SENYER, zot Bondye ti fer sek larivyer Zourden pour zot, ziska ki zot ti'n fini traverse, parey SENYER, zot Bondye ti fer sek lanmer Rouz pour nou, ziska ki nou ti'n fini traverse. 24Konmsa, tou bann pep lo later ava konnen ki lanmen SENYER i pwisan, e ki zot touzour annan respe pour SENYER, zot Bondye.”
Labib An Kreol Seselwa © Seychelles Bible Society, 2013.