Ezai 3
3
Dezord dan Zerizalenm
1Aprezan, Senyer, SENYER liniver
pou retir dan Zerizalenm e dan Zida tou resours.
I pou priv zot avek manze ek delo,
2konbatan ek gerye,
ziz ek profet,
deviner ek ansyen,
3sef group 50 ek personnaz enportan,
konseye ek mazisyen abil,
sorsye eksperyanse.
4Alor, bann zanfan pou vin zot sef;
manrmay ava gouvern zot.
5Dimoun pou ganny kraze vwazen kont vwazen.
Bann zenn pou ensolan anver bann vyeyar;
bann bonnaryen pou maltret dimoun respektab.
6En zonm ava sezi enn dan son fanmir e dir li:
Ou annan en bon palto
alor ou ava vin nou sef;
pran ansarz sa ta debri.
7Me sa zour, sa dimoun pou lev lavwa e dir:
Mon pa en dokter.
Napa ni manze ni lenz dan mon lakaz.
Ou pa kapab fer mwan sef.
8Zerizalenm in degrengole;
rwayonm Zida in tonbe,
akoz zot parol ek zot aksyon in kont SENYER.
Zot in revolte devan son laglwar.
9Zot move aksyon i en temwen kont li.
Zot montre zot pese parey Sodonm.
Maler! Zot loter zot prop maler.
10Dir sa ki inosan koman i ere,
akoz i pou rekolte fri son travay.
11Maler lo zot bann malfeter!
Tou pou mal fini pour zot.
Zot pou ganny trete dapre zot aksyon.
12Zanfan ki pe kraz mon pep;
fanm ki pe domin zot.
Mon pep! Ou bann sef pe tronp ou.
Zot pe anmenn ou dan move semen.
Senyer I Ziz son Pep
13SENYER in pare pour zizman.
In debout pour li ziz lepep.
14SENYER i pare pour ziz bann ansyen
ek bann dirizan son pep:
Zot ki'n devaste mon plantasyon rezen,
zot lakaz i plen avek keksoz ki zot in vole avek bann pov.
15Senyer BONDYE liniver i deklare:
Akoz ou kraz mon pep?
Akoz ou fer vyolans avek bann pov?
Lavertisman pour bann Fanm Zerizalenm
16SENYER i deklare:
Bann fiy dan Zerizalenm zot fyer,
zot fil zot likou ler zot marse,
zot regar i provokan;
zot mars ti lepa
e fer sonnen bann lasenn ki dan zot sevir.
17SENYER pou kouver latet bann fiy Zerizalenm
avek lagal e met zot fron deor.
18Sa zour, SENYER pou tir tou zot bizou: Lasenn dan sevir, rezil, 19zanno, brasle, vwalet; 20vwal, sennon, sang, gardkor, port boner, 21bag ek bag nennen; 22lenz lafet, foular, lesarp, kaba; 23semiz linenn, vwal.
24Loder pouritir pou ranplas loder lesans;
en lakord pou ranplas en sang.
Latet kler pou ranplas bann lanmod pennyen avek ekstravagans;
lenz dey pou ranplas bann lenz lafet;
laont dan plas labote.
25Ou bann zonm pou ganny masakre
e ou bann gerye pou mor dan batay.
26Zot bann laport pou plennyen e lamante;
i pou asiz ater, parey en fanm depouye.
Labib An Kreol Seselwa © Seychelles Bible Society, 2013.