Oze 7
7
1Kan mon oule geri pep Izrael,
mon war bann fot Efraim
ek bann krim Samari:
Zot malonnet;
zot en bann voler ki kas lakaz;
bann bandi ki vole dan semen.
2Zot pa mazinen ki mon war
tou keksoz mal ki zot fer.
Zot bann aksyon i anvlop zot.
Tou sa ki zot fer i devan mwan.
Konplo dan Pale
3Zot mesanste i anmiz lerwa;
zot bann trik i fer plezir bann sef.
4Zot tou, zot in komet adilter.
Zot parey en four
ki en boulanze i sofe.
Me i aret vey dife depi ki i'n petri lapat,
ziska ki son lapat in fini leve.
5Zour lafet pour lerwa,
bann minis i bwar diven ziska zot malad;
zot vin gaga e lerwa i fer parey.
6Anndan, zot brile parey dife en four;
tou lannwit zot lakoler i sofe dan sonmey,
e bomaten laflanm i pete.
7Zot tou, zot sofe parey en four;
zot devor zot bann sef.
Zot bann lerwa in tonbe;
personn pa rod mwan.
Izrael ek Lezot Nasyon
8Izrael i les li melanze avek lezot pep.
Efraim i parey en galet ki'n kwi zis en kote.
9Bann etranze i sis son lafors, san ki i konnen.
Lavyeyes in akapar li,
san ki i remarke.
10Lorgey Izrael i temwanny kont li.
Izrael pa'n retourn ver SENYER son Bondye.
Apre tou, zot pa rod li.
11Efraim in vin parey en pizon timid san disernman.
Zot demann led Lezip e zot al Asiri.
12Letan zot pe ale,
mon zet en latrap lo zot;
mon fer zot tonbe parey zwazo;
mon pou koriz zot
pour krim ki zot in fer.
13Maler lo zot!
Zot in sov lwen avek mwan!
Zot pou ganny detri
akoz zot in revolte kont mwan.
Mon pou delivre zot,
me zot dir mansonz kont mwan.
14Zot pa apel mwan avek zot leker;
me zot kriye lo zot lili;
zot sizle zot lekor
pour ganny diven ek dible;
zot revolte kont mwan.
15Mwan ki'n ansenny zot,
e donn zot lafors;
me zot in fer konplo kont mwan.
16Zot in tourn ver
sa ki pa anmenn okenn profi.
Zot parey en fles tord.
Zot sef pou tonbe dan lager,
akoz zot bann parol arogan;
dan Lezip, zot pou ganny riye.
Labib An Kreol Seselwa © Seychelles Bible Society, 2013.