Zenez 50
50
1Zozef ti tonm dan lebra son papa. I ti anbras li e plere. 2Apre i ti donn lord son bann dokter pour anbonm lekor son papa. Alor, zot ti anbonm Izrael. 3Zot ti pran 40 zour, letan neseser pour anbonm en lekor. Bann Ezipsyen ti pler Zakob pandan 70 zour.
4Kan letan dey ti'n fini, Zozef ti dir avek bann dimoun dan lantouraz Faraon, “Mon sipliy zot, par lanmitye ki zot annan pour mwan, koz avek Faraon dan mon faver: 5Avan son lanmor, mon papa, ti fer mwan fer en serman. I ti dir: Mon lanmor pe aprose. Ou ava anter mwan dan en tonbo ki mon'n prepare dan Kanaan. Les mwan monte pour al anter mon papa. Apre, mon ava retournen.”
6Faraon ti reponn, “Ale! Al anter ou papa parey ou'n promet li.”
7Alor, Zozef ti monte pour al anter son papa. Tou bann serviter Faraon, bann ansyen dan son lakour, 8son bann frer, ek fanmir son papa ti al avek li. Zis zot zanfan ek zot troupo ki ti reste Gosenn. 9I ti anmenn avek li, bann kales ek bann kavalye ki ti akonpanny zot; ti annan en laprosesyon finerer enportan.
10Kan zot ti ariv Atad, dan drwa kot i bat dible, lot kote larivyer Zourden, zot ti plere e fer en gran lamantasyon. Zozef ti pler son papa pandan set zour. 11Bann Kananeen ki ti war sa lanterman ti dir: Sa i en dey tre dir pour Lezip. Alor sa landrwa ti ganny apele Abel-Mizraim, savedir dey Lezip.
12Bann garson Zakob ti fer tousala pour zot papa, parey i ti'n ordonn zot. 13Zot ti anmenn li dan pei Kanaan e anter li dan kavern Makpela, pre avek Manmre ki Abrahanm ti'n aste avek Efronn, en Hitit, koman en landrwa pour anter son bann mor. 14Apre ki i ti'n anter son papa, Zozef ti retourn Lezip avek son bann frer ek tou sa ki ti'n akonpanny li pour al anter son papa.
Zozef I Pardonn son bann Frer
15Kan bann frer Zozef ti'n war ki zot papa ti'n mor, zot ti dir dan zot menm: I posib ki Zozef ava ay nou e revanze pour ditor ki nou'n fer li. 16Alor, zot ti anvoy en mesaz kot Zozef, “Ou papa ti donn nou sa lord avan i mor: 17Mon sipliy ou, pardonn fot ou bann frer ek zot pese ki zot in komet kont ou. Aprezan, nou sipliy ou pardonn fot bann serviter Bondye ou papa.” Zozef ti plere kan zot ti dir li sa.
18Son bann frer zot menm, ti vini e tonm ater devan li an pleran. Zot ti dir li, “Aksepte nou koman ou bann serviter.”
19Me Zozef ti dir zot, “Pa bezwen per. Eski mon'n pran plas Bondye? 20Zot ti oule fer mwan ditor, me Bondye in transform tousala an byen. Konmsa, i'n sov lavi bokou dimoun parey zot war ozordi. 21Alor, pa bezwen per aprezan. Mon pou nouri zot ek zot bann zanfan.”
Konmsa, i ti redonn zot kouraz e tous zot leker.
Lanmor Zozef
22Alor, Zozef ti reste Lezip avek fanmir son papa. Zozef ti viv 110 an. 23Zozef ti war dezyenm ek trwazyenm zenerasyon zanfan Efraim. I ti osi war zanfan Masir, garson Manase ki ti ne lo son zenou.
24En zour Zozef ti dir son bann frer, “Mon pre pour mor, me Bondye pou vin sekour zot e fer zot sorti dan sa pei e anmenn zot ver later ki i ti promet Abrahanm, Izaak ek Zakob.”
25Zozef ti demann bann garson Izrael fer sa promes, “Kan Bondye i fer zot sorti Lezip, anmenn mon lezo avek zot.”
26Zozef ti mor laz 110 an. Zot ti anbonm li e gard son lekor dan en serkey Lezip.
Currently Selected:
Zenez 50: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
