Egzod 21
21
Lalwa Konsernan bann Lesklav
1SENYER ti dir: La bann regleman ki ou ava met devan bann Izraelit:
2Kan ou aste en lesklav Ebre, i ava servi ou pandan sis lannen; setyenm lannen i ava reganny son laliberte, gratwitman. 3Si i ti vin kot ou selibater, i ava al koman en selibater. Si i ti vin kot ou marye, son fanm ava al avek li. 4Si son met ki ti'n donn li en fanm e ki sa fanm i ganny zanfan, sa fanm avek son bann zanfan ava reste pour son met; me sa lesklav ava al li tousel. 5Si sa lesklav i deklare ki i kontan son met, son fanm ek son bann zanfan e ki i pa pou kit zot, 6alor, son met ava anmenn li devan Bondye. I ava anmenn li kot montan laport e i ava pers son zorey avek en pwenson. Sa zonm ava vin son lesklav pour lavi.
7Kan en zonm i vann son fiy pour fer li vin en lesklav, sa fiy pa pour reganny laliberte parey bann lesklav zonm. 8Si i pa satisfer son met, i ava fer li ganny reaste. Son met pou napa drwa vann li avek en nasyon etranze, akoz i ava en traizon. 9Si i donn sa lesklav son garson, i ava tret li dapre lalwa konsernan bann fiy. 10Si i pran en dezyenm fanm, i devre kontinyen donn li menm kantite manze, lenz, ek tou bann menm drwa parey avan. 11Si sa trwa kondisyon pa ganny obzerve, sa lesklav ava kapab sorti san peye, san vers okenn larzan.
Lalwa Kont Vyolans
12Sa enn ki tap en zonm e touy li, i devre ganny touye. 13Si i pa ti annan lentansyon touy li, me ki Bondye ki'n fer li tonm dan son lanmen, i ava kapab sov dan en landrwa ki mon pou dezinyen. 14Me si dan lakoler, en zonm i atak en lot par riz e i touy li, ou ava aret li, menm akote mon lotel pour li ganny touye.
15Sa enn ki tap son papa oubyen son manman ava ganny touye.
16Sa enn ki vol en dimoun, ki i vann li, oubyen i gard li dan son posesyon, sa zonm ava ganny touye.
17Sa enn ki ensilte son papa oubyen son manman ava ganny touye.
18Si pandan en bagar ant de zonm, enn i tap lot avek en ros, oubyen i donn li en koudpwen e ki sa lot zonm pa mor, me i bezwen reste lo lili; 19si apre, sa zonm i leve e i kapab marse deor avek en baton, sa zonm ki ti tap li ava ganny akize. Me i ava bezwen pey domaz pour letan ki sa lot zonm pa'n travay, e pey fre pour son gerizon.
20Si en zonm i tap son lesklav, zonm oubyen fanm, avek en baton e touy li, i ava ganny vanze. 21Me si sa lesklav i viv pour en zour oubyen de, i pa pou ganny vanze, akoz sa zonm ti pour li.
22Si dan en bagar parmi bann zonm en fanm ansent i ganny afekte, e son baba i ne avan son term san gran dimal, sa zonm ki ti tap li ava pey domaz ki mari sa fanm i demande, e ki ziz ava aprouve. 23Me si maler i arive, ou ava enpoz en lavi pour en lavi, 24en lizye pour en lizye, en ledan pour en ledan, en lanmen pour en lanmen, en lipye pour en lipye, 25en brile pour en brile, en kou pour en kou, en bate pour en bate.
26Si en zonm i tap son lesklav, zonm oubyen fanm, dan lizye, e sa lesklav i perdi son lizye, i ava rann li son laliberte an konpansasyon pour son lizye. 27Si i kas ledan son lesklav, zonm oubyen fanm, i ava rann li son laliberte an konpansasyon pour son ledan.
Responsabilite bann Propriyeter
28Si en toro i donn koud korn mortel en zonm oubyen en fanm, sa toro ava ganny saboule avek ros ziska i mor; personn pa pou manz son lavyann. Met sa toro pa pou responsab. 29Me si sa toro ti annan labitid donn koudkorn, e ki son met ti'n ganny averti, me i pa'n pran prekosyon; si sa toro i touy en zonm oubyen en fanm, i ava ganny saboule avek ros; son propriyeter osi ava ganny touye. 30Si i ganny forse pey en konpansasyon, i ava kapab viv si i pey sa sonm. 31Menm regleman ava ganny aplike si en bef i tap en garson oubyen en fiy. 32Si en bef i tap en lesklav, zonm oubyen fanm, son met ava donn met sa lesklav 30 pyes larzan e sa bef ava ganny saboule avek ros.
33Si en zonm i kit en pwi dekouver, oubyen si en zonm i fouy en pwi e i pa kouver li e si en bef oubyen en bourik i tonm ladan, 34propriyeter sa pwi ava pey en konpansasyon met sa zannimo e i ava gard sa zannimo mor pour li.
35Si bef en zonm i touy bef son vwazen, zot ava vann sa bef vivan, e partaz larzan; sa bef mor ava osi ganny partaze. 36Me si dimoun ti konnen ki sa bef ti annan labitid donn bann koudkorn, e son met pa'n pran prekosyon, i ava rann en bef vivan an konpansasyon, e gard sa enn mor pour li.
Currently Selected:
Egzod 21: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
