Egzod 19
19
Bann Izraelit devan Montanny Sinai
1Pep Izrael ti ariv dan dezer Sinai, trwazyenm nouvellin, apre ki zot ti'n kit Lezip. 2Kan zot ti kit Refidim e ariv dan dezer Sinai, zot ti kanp lanmenm devan montanny Sinai.
3Moiz ti mont kot Bondye e SENYER ti apel li lo montanny. I ti dir li, “La sa ki ou pou dir desandan Zakob ek pep Izrael: 4Zot in war sa ki mon ti fer avek Lezip: Mon ti anmenn zot, parey en leg i anmenn son piti lo son lezel, e mon'n fer zot retourn kot mwan. 5Apartir ozordi, si zot ekout mwan e gard mon lalyans, zot pou vin mon prop posesyon parmi tou bann pep. Later antye i pour mwan. 6Zot ava vin en rwayonm pret e en nasyon sen pour mwan. Sa i bann parol ki ou pou dir avek zanfan pep Izrael.”
7Alor, Moiz ti retournen e apel bann ansyen parmi pep Izrael, e i ti dir zot tou bann parol ki SENYER ti ordonn li. 8Lepep antye ti reponn ansanm, “Nou pou fer tou sa ki SENYER in dir.”
Moiz ti raport avek SENYER tou sa ki lepep ti'n dir.
9SENYER ti dir Moiz, “Mon pe vin kot zot dan en nyaz epe, pour ki lepep ava kapab ekoute kan mon koz avek ou e pour ki zot ava krwar ou pour touzour.”
Moiz ti dir SENYER tou sa ki lepep ti'n dir li.
10SENYER ti dir Moiz, “Al kot ou pep e dir zot pirifye zot ozordi ek demen, e fer zot lav zot lenz. 11Zot ava met zot pare pour trwazyenm zour, akoz trwazyenm zour, SENYER pou desann lo montanny Sinai devan lepep antye. 12Ou ava demark bann limit otour montanny e ou ava dir zot fer atansyon ki zot pa tous montanny. Sa enn ki tous montanny pour ganny touye. 13Personn pa pou tous sa dimoun koupab, me i ava ganny saboule avek ros oubyen fles. I kapab en zannimo oubyen en zonm; me i pa pou reste vivan. Kan zot ava antann tronpet soufle, zot ava vin kot montanny.”
14Alor Moiz ti desann sorti lo montanny. I ti konsakre lepep e zot ti lav zot lenz. 15I ti dir zot, “Met zot pare pour trwazyenm zour e pa bezwen ganny relasyon seksyel avek zot bann fanm.”
16Bomaten, trwazyenm zour, ti annan loraz, zekler ek en nyaz epe lo montanny. Apre, ti annan en son tronpet byen for e tou dimoun dan kan ti tranble avek lafreyer. 17Apre, Moiz ti anmenn lepep an deor kan pour en rankont avek Bondye, e zot ti debout devan montanny. 18Montanny Sinai ti kouver avek lafimen, akoz SENYER ti'n desann dan en dife. Lafimen ti monte parey lafimen sorti dan en four e montanny antye ti tranble. 19An mezir ki son tronpet ti vin pli for, Moiz ti koze e Bondye ti reponn li dan loraz.
20SENYER ti desann lo latet montanny Sinai, e i ti apel Moiz lo latet montanny. Moiz ti monte. 21SENYER ti dir Moiz, “Desann e averti lepep pour ki zot pa vin tro pre avek SENYER pour vin gete. Sankwa bokou pou mor. 22Bann pret ki vin devan SENYER ava pirifye zot, pangar ki SENYER i pini zot e ki i annan parmi zot ki mor.”
23Moiz ti dir SENYER, “Lepep napa drwa mont lo montanny Sinai, akoz ou menm, ou ti averti nou pour fikse en limit otour montanny pour gard li sakre.”
24SENYER ti dir li, “Desann, apre, ou ava remont avek Aaron. Me bann pret ek lepep pa devre depas balizaz pour vin kot SENYER, pangar serten parmi zot i mor.”
25Alor, Moiz ti desann kot lepep e dir zot tou sa ki SENYER ti'n dir li.
Currently Selected:
Egzod 19: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
