Egzod 17
17
Delo I Sorti dan Ros
1Pep Izrael ti kit dezer Sin par letap, parey SENYER ti'n ordonn zot. Zot ti al kanp Refidim. Me laba ti napa delo bwar pour lepep. 2Alor zot ti lager avek Moiz. Zot ti dir li, “Donn nou delo pour bwar.” Moiz ti dir zot, “Akoz zot pe lager avek mwan? Akoz zot oule provok SENYER?”
3Annefe, lepep ti swaf e zot ti mirmire kont Moiz, “Akoz ou'n fer nou sorti Lezip? Eski ou anvi touy nou, nou bann zanfan ek nou zannimo par laswaf?”
4Alor, Moiz ti kriy ver SENYER, “Ki mon pou fer avek sa pep? Zot pre pour saboul mwan avek ros.”
5SENYER ti dir Moiz, “Al devan lepep e pran avek ou bann ansyen dan Izrael; anmenn osi ou baton ki ou ti tap larivyer Nil avek. 6Mon pou debout devan ou lo ros montanny Horeb. Ou ava tap lo sa ros e delo ava sorti ladan e lepep ava bwar.”
Moiz ti fer sa devan bann ansyen dan Izrael. 7I ti apel sa landrwa Masa, savedir Provokasyon, ek Meriba, savedir Lager, akoz pep Izrael ti mirmire e provok SENYER an dizan: Eski SENYER i avek nou, oubyen non?
Lager Kont bann Amalesit
8Alor, Amalek ti vin atak pep Izrael Refidim. 9Moiz ti dir Zozye, “Swazir bann zonm kapab, e al lager kont Amalek. Demen, nou ava debout lo latet montanny avek baton SENYER dan lanmen.”
10Zozye ti fer parey Moiz ti'n dir li pour al lager kont Amalek. Moiz, Aaron ek Hour ti al lo latet montanny. 11Kan Moiz ti lev son lanmen, Izrael ti pli for, e kan i ti bes son lanmen, bann Amalesit ti pli for. 12Me lebra Moiz ti fatige; zot ti pran en ros e met li asiz lo la. Aaron ek Hour ti tenir son lebra, enn lo sak kote. Alor, son de lebra ti reste anler ziska soley kouse. 13Zozye ti ganny laviktwar lo bann Amalesit ki i ti masakre par lepe.
14SENYER ti dir Moiz, “Ekri sa koman en souvenir e fer Zozye konnen ki mon pou fer disparet bann Amalesit konpletman anba lesyel.”
15Moiz ti konstri en lotel ki i ti apel SENYER i mon bannyer. 16I ti dir, “Akoz en lanmen in leve kont tronn SENYER, SENYER pou touzour fer lager kont bann Amalesit.”
Currently Selected:
Egzod 17: BSK
Highlight
Copy
Compare
Share
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
