Ester 9
9
Vanzans bann Zwif, Lafet Pourim
1Trezyenm zour dan douzyenm mwan ki mwan Adar, kan lord ek lalwa lerwa ti devre vin anfors, zour ki bann lennmi bann Zwif ti sipoze ganny pouvwar lo zot, ti arive ki se bann Zwif ki ti ganny pouvwar lo zot bann lennmi. 2Bann Zwif ti rasanble ansanm dan zot bann lavil atraver tou bann provens lerwa Zerzes, pour atak sa bann ki ti'n rod detri zot. Personn pa ti kapab reziste zot, akoz lepep antye ti'n ranpli avek lafreyer. 3Tou bann fonksyonner enportan dan bann provens, bann reprezantan lerwa, bann gouverner ek bann zofisye lerwa ti pe siport bann Zwif, akoz zot ti'n per Mardose. 4Annefe, Mardose ti annan bokou pouvwar dan pale rwayal; amezir ki i ti vin deplizanpli pwisan, son renonmen ti kouver tou bann provens. 5Alor, bann Zwif ti masakre tou zot bann lennmi; zot ti touy zot e fer zot disparet. Zot ti fer sa ki zot ti oule avek sa bann dimoun ki ti ay zot. 6Dan Siz, lavil kapital, bann Zwif ti touye e detri 500 zonm. 7Zot ti osi touy Parsandata, Dalfonn, Aspata, 8Porata, Adalya, Aridata, 9Parmasta, Arizai, Aridai ek Vaizata, 10ki ti 10 garson Haman, garson Hamedata, lennmi bann Zwif; me zot pa ti fer okenn piyaz.
11Son menm zour, lakantite dimoun ki ti ganny touye dan lavil kapital Siz, ti ganny raporte avek lerwa. 12Lerwa ti dir larenn Ester, “Dan lavil kapital Siz, bann Zwif in touy 500 zonm e osi bann garson Haman. Ki zot in fer dan leres bann provens rwayal? Aprezan, ki ou pe demande? Ou ava ganny akorde. Sa ki ou oule ankor, ava ganny akorde.”
13Ester ti dir, “Si i fer plezir lerwa ki bann Zwif dan Siz i ganny permisyon demen osi, pour azir dapre lord ki valab pour ozordi. Ki sa 10 garson Haman i ganny pann lo lesafo.”
14Alor, lerwa ti ordonnen ki zot fer li. En lord ti ganny pibliye dan Siz e sa 10 garson ti ganny pann. 15Bann Zwif ki ti dan Siz ti rasanble osi dan katorzyenm zour dan mwan Adar. Zot ti touy 300 zonm dan Siz; me zot pa ti fer piyaz.
16Lezot Zwif ki ti dan bann provens rwayal ti osi rasanble pour defann zot lavi e debaras zot avek zot bann lennmi. Zot ti touy 75,000 parmi sa bann ki ay zot, me zot pa ti fer piyaz. 17Sa ti ariv trezyenm zour mwan Adar. Katorzyenm zour, zot ti repoze, fer lafet e selebre.
18Me bann Zwif ki ti dan Siz ti rasanble le 13 ek le 14; zot ti repoze le 15. Sa zour, zot ti fete e selebre. 19Pour sa rezon ki bann Zwif dan vilaz e ki reste dan bann lavil san miray proteksyon zot fer sa katorzyenm zour mwan Adar en zour lafet ek selebrasyon; sakenn i anvoy kado kot son vwazen.
Lafet Pourim
20Mardose ti ekri tousala dan bann let ki i ti anvoy kot tou bann Zwif dan tou provens lerwa Zerzes, pre ou lwen. 21I ti demann zot obzerv katorzyenm zour mwan Adar ensi ki kenzyenm zour sa mwan, toulezan, 22koman bann zour ki bann Zwif ti ganny debarase avek zot bann lennmi, koman bann zour dan sa mwan, kot zot tristes ti ganny transformen an lazwa e zot maler en boner; ki zot ti devre fer sa bann zour koman bann zour lafet ek selebrasyon, bann zour pou anvoy kado kanmarad ek bann pov. 23Alor, bann Zwif ti adopte tousala koman konmansman en koutim, parey Mardose ti'n ekri zot.
24Annefe, Haman, en desandan Agag, garson Hamedata, lennmi tou bann Zwif, ti'n fer en konplo kont bann Zwif pour detri zot. I ti'n tir osor pour kraz zot e detri zot. 25Me kan Ester ti prezant li devan lerwa, lerwa ti donn lord par ekri, ki sa konplo prepare par Haman, i retonm lo li menm; ki Haman avek son bann garson, zot ganny pann lo lesafo. 26Pour sa rezon ki sa bann zour i ganny apele Pourim, dapre sa mo Pour ki vedir tir osor. Alor, dapre sa ki ti'n ganny ekri dan sa let e tou sa ki'n ariv zot e difikilte ki zot in pas ladan, 27bann Zwif ti etabli e aksepte sa koutim ki pa devre zanmen sanze pour zot e zot bann desandan ki ava vin Zwif: San fot, zot pou gard sa de zour, dapre sa ki'n ganny ekri e dan menm lepok sak lannen. 28Zot devre rapel sa bann zour e i devre ganny obzerve zenerasyon apre zenerasyon, dan sak fanmir, provens, lavil. Sa bann zour Pourim pa devre zanmen ganny abandonnen parmi bann Zwif; son lobzervasyon pa devre ganny abandonnen parmi zot desandans.
29Alor, larenn Ester, fiy Abihail, avek Zwif Mardose, ti ekri en dezyenm let, pour konfirm avek tou zot lotorite, sa let konsernan Pourim. 30Bann let ti ganny anvoye kot tou bann Zwif dan 127 provens lerwa Zerzes, avek mesaz lape ek fidelite, 31pour enstitye sa bann zour Pourim lo dat fikse par Zwif Mardose ek larenn Ester pour zot menm e pour zot desandans, konsernan zot bann letan zenn ek lamantasyon. 32Lord larenn Ester ti fikse rityel Pourim; sa zistwar i ganny met par ekri.
Labib An Kreol Seselwa © Seychelles Bible Society, 2013.