Ester 4
4
Mardose I Reklanm Entervansyon Ester
1Kan Mardose ti tande tou sa ki ti'n ganny fer, i ti desir son lenz, met lenz dey ek lasann. I ti al partou dan lavil e pous bann kriy gro douler. 2I ti al ziska lantre laport pale lerwa akoz personn pa ti annan drwa antre dan laport pale lerwa dan lenz dey.
3Dan sak provens, partou kot lord lerwa ek son dekre ti arive, bann Zwif ti plere en kantite; zot ti zene, plere e lamante, bokou parmi zot ti dormi dan lenz dey e kouver avek lasann.
4Ler son bann servant ek bann enik ti vin anons li sa nouvel, larenn ti dan en gran sagren. I ti anvoy lenz kot Mardose pour li tir sa lenz dey. Me i pa ti aksepte. 5Alor, Ester ti apel Hatak, enn bann enik ki lerwa ti'n apwente pour servi li. I ti ordonn li pour al kot Mardose, pour konnen sa ki ti pe pase e pour ki rezon. 6Hatak ti al kot Mardose lo laplas piblik ki devan laport pale lerwa. 7Mardose ti dir li tou sa ki ti'n ariv li, e sa sonm egzakt ki Haman ti'n promet pour vers dan trezor lerwa pour fer disparet bann Zwif. 8Mardose ti osi donn li en kopi sa dekre ki ti ordonn destriksyon bann Zwif e ki ti'n ganny pibliye dan Siz, pour li al montre Ester, eksplik li, demann li pour al sipliy lerwa e pled avek li an faver son pep. 9Hatak ti ale e raport avek Ester tou sa ki Mardose ti'n dir li. 10Ester ti koz avek Hatak e donn li sa mesaz pour Mardose: 11Swit a en lalwa ki aplik pour tou dimoun, tou bann serviter lerwa, ensi ki lepep ki reste dan tou bann provens rwayal i konnen ki okenn dimoun, zonm oubyen fanm ki al kot lerwa dan lakour enteryer, san ki i'n ganny konvoke, pour ganny touye; eksepte sa enn avek ki lerwa i prezant li son baton annor. Mwan menm, mon pa'n ankor ganny envite kot lerwa depi 30 zour.
12Zot ti raport Mardose sa ki Ester ti'n dir. 13Mardose ti dir zot reponn Ester: Pa krwar ki akoz ou viv dan pale lerwa, ou pou ganny sans sove plis ki nenport ki Zwif. 14Si ou reste trankil dan en tel sityasyon, led ek delivrans bann Zwif ava sorti dan en lot landrwa; me ou, avek lafanmir ou papa, zot pou ganny detri. Dayer, lekel ki dir si ou pa'n ganny o plase dan sa rwayonm pour en letan parey?
15Alor, Ester ti donn zot sa larepons pour Mardose: 16Ale, rasanble tou bann Zwif ki i annan dan lavil Siz. Fer en zenn pour mwan pandan trwa zour, san manze ni bwar, aswar koman lizour. Mwan osi, mon pou fer parey, ansanm avek mon bann servant. Answit, menm si i kont lalwa, mon ava al kot lerwa; si fodre mor mon ava mor! 17Mardose ti ale e fer tou sa ki Ester ti'n ordonn li.
Labib An Kreol Seselwa © Seychelles Bible Society, 2013.