Efezyen 4
4
Linite Lekor
1Mwan ki prizonnyen, akoz mon dan servis Senyer, mon sipliy zot: Viv zot lavi dapre sa lapel ki Bondye in fer zot. 2Viv touzour dan limilite, ladouser ek pasyans. Siport kanmarad dan lanmour. 3Fer tou pour prezerv linite ki Lespri i donnen par lape ki ini zot.
4I annan en sel lekor ek en sel Lespri, parey ki i annan en sel lesperans ver lekel Bondye in apel zot.
5I annan en sel Senyer, en sel lafwa, en sel batenm.
6I annan en sel Bondye e Papa tou dimoun, ki renny lo tou, ki azir par tou e ki reste dan tou.
7Sepandan, sakenn parmi nou in resevwar en don spesyal dapre sa ki Kris in donnen. 8Parey Lekritir i deklare:
Kan i ti mont lao,
i ti anmenn avek li bann prizonnyen.
I ti ofer zonm kado lo later#4.8 War Ps 68.19..
9Alor ki savedir: I ti monte? Savedir ki dabor i ti desann dan profonder later. 10Sa enn ki'n desann, li menm ki'n mont par lao dan lesyel, landrwa pli o pour ranpli tou liniver avek son prezans. 11Li menm ki'n etabli serten koman zapot, ouswa koman profet; serten pour anons Bonn Nouvel, serten koman paster, oubyen serten koman ansennyan. 12Konmsa ki i'n prepar pep Bondye pour akonpli son servis e fer grandir lekor Kris. 13Konmsa, ansanm nou pou kapab ariv dan linite nou lafwa e dan konnesans Garson Bondye; nou ava vin adilt, devlope pour vin parfe parey Kris. 14Alor, nou pou nepli parey bann zanfan ki ganny trennen par laroul, e pouse partou par nenport ki divan lansennyman ki dimoun rize i fannen pour antrenn lezot dan lerer. 15O kontrer, kan nou dir laverite avek lanmour, nou ava grandi dan tou fason ver Kris, nou sef. 16Kontrole par li, tou bann diferan parti lekor i byen rasanble ansanm, e lekor antye i tenir ansanm par bann zwentir. Alor, kan sak parti i travay koman i fodre, lekor antye i grandi e i devlop dan lanmour.
Nouvo Lavi avek Kris
17Mon sipliy zot lo non Senyer: Aret viv koman sa bann ki pa konn Bondye. Zot mannyer reflesir pa vo nanryen. 18Zot lespri i dan fernwanr. Zot napa okenn par dan sa nouvo lavi ki Bondye i donnen, akoz zot konpletman inyoran e zot refize ekoute. 19Zot in perdi tou pider, zot in abandonn zot lekor dan toudsort vis e move aksyon san okenn kontrol.
20Pa sa, ki zot in aprann lo size Kris. 21Annefe, zot in antann koz lo li, e zot in ganny ansennyen, anliny avek laverite ki dan Zezi. 22Zot devre alor debaras zot avek zot vye natir, ki ti zot fason viv otrefwa, ki ti anmenn larin par son bann dezir tronper. 23Sanz zot leker ek zot lespri konpletman. 24Vin en dimoun konpletman nouvo, kree dan resanblans Bondye. Dimoun ava war ki zot pe viv dan en fason zis e sen ki laverite i prodwir.
25Pour sa rezon, rezet tou mansonz! Sakenn i devre dir laverite avek son prosen#4.25 War Za 8.16., akoz nou tou, nou manm en menm lekor. 26Si zot pran lakoler, fer atansyon pour zot pa tonm dan pese, e fer atansyon pa les zot lakoler dire ziska aswar. 27Pa donn dyab lokazyon pran lavantaz lo zot. 28Sa enn ki abitye vole, fodre i aret vole e travay pour ganny son lavi onnetman, e ganny dekwa pour ed bann pov. 29Pa les bann move parol sorti dan zot labous; me koz zis bann parol itil ki kapab ed lezot pour progrese dan lafwa e kan i neseser, pour fer dibyen sa enn ki ekout ou. 30Pa rann tris Lespri Sen ki Bondye in donn nou. Li menm garanti ki zour kan Bondye ava vin delivre nou konpletman pou vini. 31Debaras zot avek tou move santiman, iritasyon e lakoler. Fer disparet tou kriye ek lensilt. Pa bezwen annan okenn santiman mesanste. 32O kontrer, viv bon, ranpli avek lafeksyon anver kanmarad; pardonn kanmarad, parey Bondye in pardonn zot par Kris.
Currently Selected:
Efezyen 4: BSK
Highlight
Share
Compare
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
