Efezyen 1
1
Konpliman
1Sa let i sorti kot Pol, en zapot Zezi-Kri, par lavolonte Bondye.
Pour bann kretyen ki dan Efez#1.1 Konsernan sezour Pol Efez, war Akt 18.19-21; 19.1-40. e ki fidel dan Zezi-Kri: 2Bondye, nou Papa, e Senyer Zezi-Kri i donn zot lagras ek lape.
Benediksyon ki Bondye I Donn Nou par Zezi-Kri
3Nou loue Bondye, Papa nou Senyer Zezi-Kri. Ini avek Kris, i'n beni nou par akord nou toudsort benediksyon spirityel dan lesyel. 4Avan ki i ti'n kree lemonn, Bondye ti swazir nou davans, par Zezi-Kri, koman son bann zanfan adoptif, pour ki nou sen e san repros devan li. 5Dan son lanmour, Bondye ti'n deside davans pour fer nou vin son bann garson atraver Zezi-Kri. Sanmenm sa ki i'n oule dan son bonte. 6Alor, annou loue Bondye pour son lagras, pour donn nou gratwitman sa kado, dan son Garson byenneme.
7Annefe, par disan Zezi-Kri, nou'n ganny sove, e par larises son lagras, nou bann pese in ganny pardonnen. 8Avek sazes ek lentelizans, i'n donn nou tousala annabondans. 9I'n fer nou konn son plan sekre dapre ki dan son bonte, i ti'n deside pour akonpli davans, par Kris. 10Sa plan ki pou ganny egzekite dan letan lafen, pour reini tou keksoz ki dan lesyel e lo later, anba en sel sef: Kris.
11Dan nou linyon avek Kris, nou'n resevwar par ki nou ti'n ganny promet. Annefe, dapre son plan, Bondye ti'n swazir nou davans, e Bondye i realiz tou, dapre sa ki i'n oule e ki i'n deside. 12Nou ki ti bann premye pour met nou lesperans dan Kris, annou loue Bondye dan son grander!
13Zot osi, kan zot ti antann mesaz laverite, Bonn Nouvel ki'n vin sov zot, zot i'n krwar dan Kris. Alor, Bondye in met son mark personnel lo zot kan i ti donn zot Lespri Sen ki i ti'n promet. 14Lespri Sen i garanti sa ki'n ganny rezerve pour nou. I asir nou ki nou pou pran posesyon kan nou delivrans ava konplet. Alor, annou loue Bondye dan son laglwar!
Lapriyer Pol
15Pour sa rezon, depi ki mon'n antann koz lo zot lafwa dan Senyer Zezi, e lo zot lanmour pour tou bann krwayan, 16mon pa zanmen aret remersye Bondye lo zot size. Mon mazin zot dan mon lapriyer. 17Mon demann Bondye nou Senyer Zezi-Kri, nou Papa merveye, donn zot Lespri lasazes ki ava revel avek zot e fer zot konn li vreman. 18Mon priye pour ki i ouver zot lizye ver lalimyer, pour ki zot konpran sa lesperans ki i'n ofer zot; grander larises sa leritaz merveye ki i'n rezerve pour bann kretyen; 19sa pwisans ekstraordiner ki i annan pour nou ki krwar dan li. Sanmenm sa pwisans ki i ti manifeste avek bokou lafors, 20kan i ti resisit Kris e fer li asiz lo son kote drwat dan lesyel#1.20 War Ps 110.1.. 21La, Kris in ganny plase par lao tou pouvwar, lotorite, pwisans, dominasyon#1.21 War Kol 1.16.. In ganny plase par lao tou tit ki egziste pa selman dan lemonn aktyel, me osi dan lemonn lavenir. 22Bondye in plas tou anba lipye Kris#1.22 War Ps 8.7. e i'n etabli li koman sef parlao tou, koman sef siprenm. 23Legliz i lekor Kris. Kris i totalman prezan dan Legliz; i ranpli liniver antye.
Currently Selected:
Efezyen 1: BSK
Highlight
Share
Compare
Copy
Want to have your highlights saved across all your devices? Sign up or sign in
Labib An Kreol Seselwa © Seychelles Bible Society, 2013.
