Eklezyas 2
2
1Mon ti dir dan mwan menm:
Mon pou teste ou avek bann plezir
e fer ou konnen kisisa boner.
La osi mon ti dekouver ki tousala ti zis vanite.
2Mon ti war ki riye i en keksoz fou e bet;
plezir pa anmenn okenn benefis.
3Mon ti deside rod plezir dan labwason; mon ti touzour kontrol mwan par lasazes. Mon ti oule war pli bon fason pour dimoun pas son lavi lo later.
4Mon ti realiz bann gran proze.
Mon ti fer bann gran lakaz e kiltiv gran plantasyon rezen.
5Mon ti fer zarden ek bann plantasyon,
plant bann diferan kalite fri.
6Mon ti fer bann rezervwar delo
pour aroz bann zenn pye dibwa.
7Mon ti aste bokou lesklav, zonm ek fanm;
zot zanfan in ne lanmenm;
mon ti annan bokou serviter.
Mon ti posed bokou zannimo, bef ek mouton,
plis ki tou dimoun ki ti reste Zerizalenm avan mwan.
8Mon ti akimil en gran kantite larzan ek lor,
trezor ki'n sorti partou dan mon rwayonm.
Mon ti annan zonm ek fanm ki ti sante pour mon plezir,
e mon ti annan bokou fanm,
neseser pour donn plezir en zonm.
9Mon ti'n vin pli gran ki tou sa ki'n deza viv dan Zerizalenm avan mwan;
mon lasazes in touzour ed mwan.
10Tou sa ki mon lizye ti anvi mon ti satisfer li;
mon pa ti zanmen priv mon lekor.
Mon fyer pour mon bann lakonplisman;
tousala i mon rekonpans pour tou mon travay.
11Alor, mon ti konsider tou sa ki mon'n akonpli,
travay dir ki mon'n realize avek bokou lapenn:
Tousala i vanite, konmsi mon pe tay deryer divan.
I pa vreman anmenn okenn lavantaz anba soley.
12Alor, mon ti rekonmans reflesir lo lasazes, lafoli ek sotiz.
Mon ti demande: Ki sa enn ki vin lerwa apre mwan pou fer?
I pou fer zis sa ki sa bann avan in fer?
13Mon ti war ki lavantaz lasazes i annan lo lafoli;
i parey lalimyer lo fernwanr.
14En dimoun saz i konnen kote i pe ale,
me en zonm bet i tatonnen dan fernwanr.
Pourtan, menm sor pe esper tou le de.
15Mon dir dan mwan menm:
Sa ki ariv avek en zonm bet, pou osi ariv avek mwan.
Alor, ki profi mon tire avek mon lasazes?
Mon dir tousala i osi vanite.
16Tou sa ki arive avek en saz oubyen avek en sot
pou ganny oubliye.
En saz i mor, zis parey en dimoun sot. 17Alor, mon deteste lavi; pour mwan, tou sa ki ganny realize anba soley i move, tousala i vanite; i zis konmsi ou pe tay deryer divan.
18Mon deteste tou travay ki mon'n fer anba soley; mon bezwen les tou pour sa enn ki vin apre mwan. 19Ki swa en zonm saz oubyen en zonm fou, i pou annan pouvwar lo tou travay ki mon'n fer avek lasazes; tousala i zis vanite. 20Ler mon reflesir, mon regrete pour lapenn travay ki mon'n donnen anba soley. 21En dimoun in travay avek lasazes, konnesans ek sikse; i bezwen kit sa ki i'n realize pour en lot ki pa'n fer nanryen. Sa osi i vanite. 22Ki i reste pour sa zonm apre tou son aktivite ek tou son zefor anba soley? 23Tou sa ki i'n fer dan lavi i anmenn zis douler ek lapenn; menm aswar i pa kapab ganny en repo. Sa ankor i zis vanite.
24Sel bon keksoz pour en et imen fer, se manze, bwar e war rezilta son travay; mwan mon krwar, sa i sorti kot Bondye. 25Lekel ki kapab anmize e profit lavi san Bondye? 26I donn lasazes, konnesans ek lazwa sa enn ki fer li plezir. Me sa enn ki mal azir, i fer li rasanble bann byen pour sa enn ki fer plezir Bondye. Sa i zis vanite, konmsi ou pe tay deryer divan.
Labib An Kreol Seselwa © Seychelles Bible Society, 2013.