Akt de Zapot 26
26
Pol I Prezant Son Defans devan Agripa
1Agripa ti dir avek Pol, “Mon donn ou permisyon pour prezant ou defans.”
Alor Pol ti fer siny avek son lanmen e konmans son defans: 2Lerwa Agripa! Mon konsider sa en privilez pour mwan ozordi defann mon lekor devan ou, lo tou bann lakizasyon bann Zwif kont mwan. 3Annefe, ou konn tre byen tou bann koutim Zwif ek zot bann size diskisyon. Alor, mon sipliy ou ekout mwan avek pasyans.
4Tou bann Zwif i konn mon lavi depi mon lazenes. Zot konnen koman mon'n viv parmi mon pep e dan Zerizalenm. 5Zot konn mwan depi lontan e zot kapab alor sertifye, si zot oule, ki mon'n viv koman en manm parti pli strik dan nou larelizyon, setadir koman en Farizyen#26.5 War 23.6; Flm 3.5.. 6Aprezan, mon isi pour ganny zize, akoz mon pe esper realizasyon promes ki Bondye in fer avek nou bann zanset. 7Tou le 12 tribi nou pep, pe osi esper sa realizasyon, an servan Bondye, lizour koman aswar.
Ozordi, lerwa Agripa, se akoz sa lesperans ki mon ganny akize par bann Zwif. 8Zot ki la, akoz zot war li enposib pour krwar ki Bondye i resisit bann mor?
9Mwan personnelman, mon ti krwar ki mon ti devre opoz par tou fason posib, non Zezi ki sorti Nazaret. 10Sanmenm sa ki mon ti fer dan Zerizalenm: Mon ti resevwar pouvwar spesyal avek bann gran-pret, pour met bokou bann krwayan dan prizon. Kan zot ti ganny kondannen anmor, mwan osi mon ti aprouve. 11Souvan mon ti fer pini zot dan sinagog e esey obliz zot renye zot lafwa. Mon ti sitan asarnen kont zot, ki mon ti al ziska dan bann lavil etranze pour persekit zot#26.11 War 8.3; 9.1-2; 22.4-5..
Pol I Rakont Son Konversyon
(Akt 9.1-19; 22.6-16)
12Alor, mon ti al dan lavil Damas avek pouvwar ek lord ki bann gran-pret ti'n donn mwan.
13Lerwa Agripa! Pandan ki mon ti dan semen, ver midi, mon ti war en lalimyer sorti dan lesyel, pli briyan ki soley, ki ti klate otour mwan ek mon bann kanmarad. 14Nou tou, nou ti tonm ater; mon ti antann en lavwa ki ti dir mwan dan lalang Ebre: Sol, Sol! Akoz ou persekit mwan? Pa servi nanryen reziste parey en zannimo kont baton son met.
15Mon ti demande, “Lekel ou, Senyer?”
Senyer ti reponn, “Mwan Zezi ki ou pe persekite! 16Leve debout! Mon'n aparet avek ou pour fer ou vin mon serviter; pour ou vin en temwen pour rakonte ki mannyer ou'n war mwan ozordi e anons tou sa ki mon pou montre ou. 17Mon pou delivre ou parmi pep Izrael e parmi bann pep etranze kot mon pou anvoy ou. 18Mon pe anvoy ou pour ouver zot lizye, pour fer zot sorti dan fernwanr e tourn ver lalimyer, kit pouvwar Satan e retourn kot Bondye; pour ki par zot lafwa dan mwan, zot ava ganny pardon zot pese e ganny en plas parmi pep Bondye.”
Pol I Koz lo Son Travay
19“Alor, lerwa Agripa, mon pa ti dezobei sa vizyon ki ti sorti dan lesyel. 20Okontrer, mon ti konmans prese dan Damas, apre avek zabitan Zerizalenm, e answit dan tou bann rezyon Zide ek tou lezot nasyon. Mon ti demann zot pour sanz zot lavi pese, e retourn ver Bondye e pratik bann aksyon ki montre ki vreman zot in repanti. 21Pour sa rezon ki bann Zwif ti atrap mwan letan mon ti dan Tanp, pour esey touy mwan.
22Me Bondye in protez mwan ziska ozordi e mon ankor la pour temwanny devan tou dimoun, pti koman gran. Mon pe anons zis sa ki Moiz ek bann profet ti dir pou arive: 23Ki Mesi i devre soufer, e ki i pou premye pour resisite parmi bann mor; ki i ava proklanm lalimyer avek nou pep e avek lezot nasyon.”
Pol I Demann Agripa pour Kwar
24Pol ti pe prezant son defans dan en tel fason ki Festis ti Kriye, “Pol, ou fou! Ou gran konnesans i rann ou fou!”
25Pol ti reponn, “Son Ekselans! Mon pa fou. Sa bann parol ki mon pe dir i vre e rezonnab. 26Lerwa Agripa i byen okouran sa ki mon pe dir. Alor, mon kapab koz avek lasirans devan li. Mon sir ki i konn tousala, akoz tousala pa ti pas an kasyet. 27Lerwa Agripa! Eski ou krwar dan bann profet? Mon konnen ki ou krwar!”
28Agripa ti dir Pol, “Ou krwar ki dan en pti moman ou kapab fer mwan vin kretyen?”
29Pol ti reponn, “Mon priy Bondye ki pa zis ou, me ankor tou sa ki pe ekout mwan ozordi, ava vin parey mwan; san sa lasenn, byen sir.”
30Alor lerwa ti leve, ensi ki Gouverner, Berenis ek tou sa ki ti la prezan. 31Pandan ki zot ti pe ale, zot ti dir ant zot, “Sa zonm pa'n fer okenn keksoz ki merit lanmor oubyen prizon.”
32Agripa ti dir avek Festis, “Sa zonm ti ava kapab ganny libere si i pa ti'n fer rapel devan Sezar.”
Labib An Kreol Seselwa © Seychelles Bible Society, 2013.