Akt de Zapot 24
24
Lakizasyon bann Zwif kont Pol
1Senk zour plitar, Gran-Pret Ananyas ti ariv Sezare avek detrwa ansyen ek en avoka ki ti apel Tertilis. Zot ti prezant zot devan gouverner Feliks. 2Zot ti fer apel Pol. La sa ki Tertilis ti dir kont li, “Ekselans! Gras a ou, nou pe zouir en lape konplet, e par ou lasazes, en kantite reform in ganny fer dan lentere sa nasyon. 3Nou byen rekonesan alor pour tou sa ki nou pe resevwar toultan e partou. 4Me, mon pa oule pran tro bokou ou letan. Pour sa rezon, mon sipliy ou ganny labonte ekout nou en pti moman.
5Nou'n dekouver ki sa zonm i en nwizans, ki provok dezord parmi bann Zwif dan lemonn antye. Li menm, en sef sa parti Nazareen. 6I'n menm esey mank respe anver Tanp. Alor, nou'n aret li. Nou ti annan lide ziz li dapre nou lalwa, 7me avek bokou vyolans, komandan Lisyas ti vin aras li dan nou lanmen. 8Apre, Lisyas ti donn lord ki son bann lakizater i vin devan ou#24.8 Lafen verse 6 e konmansman verse 8 i manke dan plizyer ansyen maniskri.. Si ou kestyonn sa zonm, ou ava war pour ou menm, tou sa bann keksoz ki nou pe akiz li.”
9Bann Zwif ti zwenn ansanm pour konfirmen ki tou sa bann akizasyon ti vre.
Pol I Prezant Son Defans devan Feliks
10Gouverner ti fer siny avek Pol ki i kapab koze. Alor, Pol ti deklare, “Mon konnen ki ou'n en ziz dan sa nasyon depi deza plizyer lannen. Se avek konfyans alor, ki mon prezant mon defans devan ou.
11Koman ou ava kapab verifye, i annan zis apenn 12 zour ki mon'n mont Zerizalenm pour ador Bondye. 12Personn pa'n war mwan pe diskit avek okenn dimoun, oubyen pe eksit lafoul ni dan Tanp, ni dan sinagog, ni okenn lezot landrwa dan lavil.
13Sa bann dimoun napa laprev pour okenn lakizasyon ki zot in fer kont mwan. 14Sepandan, la mon rekonnet devan ou, ki mon servi Bondye nou bann zanset, an swivan sa Nouvo Semen ki zot, zot dir i fo. Me mon krwar dan tou sa ki'n ekri dan Lalwa ek bann Profet. 15Mon annan sa menm lesperans dan Bondye parey zot, ki tou dimoun, bon koman move, pour resisite. 16Pour sa rezon, mon fer touzour tou mon posib pour annan en konsyans kler devan Bondye e devan tou dimoun.
17Apre ki mon ti'n absante dan Zerizalenm pandan plizyer lannen, mon'n retournen pour anmenn en pe larzan pour ed mon pep e pour prezant Bondye bann lofrann. 18Pandan ki mon ti pe fer sa, zot ti war mwan dan Tanp, apre ki mon ti'n fini fer seremoni pirifikasyon. Ti napa okenn lafoul avek mwan, ni okenn dezord#24.18 War 21.17-28..
19Me serten Zwif ki ti sorti dan provens Lazi ti la. Dayer, se zot ki ti devre vin devan ou, pour akiz mwan, si zot annan okenn konplent kont mwan. 20Oubyen alor, les sa bann dimoun ki isi, dir pour ki krim zot in war mwan koupab, kan mon ti pas devan Konsey Siperyer.
21Petet, pour sa parol ki mon ti prononse devan zot tou: Mon krwar dan rezireksyon bann mor, ki zot in anmenn mwan devan ou, pour mwan ganny zize#24.21 War 23.6..”
22Feliks ki ti byen konn bann detay konsernan Nouvo Semen, ti anvoy sa zafer pour plitar. I ti dir, “Kan komandan Lisyas ava desann, mon ava ziz ou zafer.”
23I ti donn lord zofisye ki ti ansarz Pol pour gard li koman prizonnyen, me donn li en serten liberte e les son bann zanmi vin okip li.
Pol devan Feliks ek Drizil
24Detrwa zour apre, Feliks ti vini avek son fanm Drizil, ki ti en Zwif. I ti anvoy sers Pol e i ti ekout sa ki Pol ti annan pour dir konsernan lafwa dan Zezi-Kri. 25Me koman Pol ti konmans koz lo lazistis, kontrol lo ou prop lekor, e lo zizman ki devre arive, Feliks ti per. I ti dir li, “Ou kapab ale aprezan, kan mon ava annan letan, mon ava fer apel ou.”
26I ti pe swete ki Pol ti ava donn li larzan. Pour sa rezon ki i ti fer apel Pol souvan, pour koz avek li.
27Alor, de lannen ti pase. Apre, Porsiis Festis#24.27 Porsiis Festis ti vin gouverner Zide ver lannen 59 oubyen 60 apre Zezi-Kri. ti ranplas Feliks koman Gouverner. Feliks ti oule fer plezir bann Zwif. Se pour sa rezon ki i ti kit Pol dan prizon.
Labib An Kreol Seselwa © Seychelles Bible Society, 2013.