Akt de Zapot 17
17
Pol ek Silas I Ariv Tesalonik
1Zot ti pas par Anfipolis ek Apoloni, e ariv Tesalonik, kot bann Zwif ti annan en sinagog. 2Parey son labitid, Pol ti al dan sinagog. Pandan trwa saba, i ti diskit avek zot apartir Lekritir. 3I ti eksplik zot e montre zot ki dapre Lekritir, Mesi ti bezwen soufer e resisite. Pol ti dir zot, “Sa Zezi ki mon pe anons zot, li menm Mesi.”
4Serten parmi zot, ti aksepte parol Pol e zot ti zwenn ansanm avek Pol ek Silas. En gran group Grek ki ti pe ador Bondye e bokou bann fanm enportan ti osi zwenn avek zot.
5Me bann Zwif ti ranpli avek zalouzi. Alor, zot ti rasanble bann vwayou dan lari ki ti met dezord dan lafoul e dan lavil. Zot ti al fouy lakaz Zason pour rod Pol ek Silas pour anmenn zot devan lepep. 6Me koman zot pa ti war sa de zonm, zot ti trenn Zason avek detrwa lezot frer, devan lotorite lavil. Zot ti kriye: Sa bann zonm in met dezord partou. La aprezan, zot in ariv dan nou lavil, 7e Zason in resevwar zot se li. Zot tou zot pe azir kont lalwa lanperer. Zot pe dir ki i annan en lot lerwa ki apel Zezi.
8Sa bann parol ti enkyet lafoul ek lotorite lavil. 9Alor, Zason ek lezot ti bezwen pey en kosyon pour zot ganny large.
Pol ek Silas dan Lavil Bere
10Koman aswar ti fer, bann frer ti fer Pol ek Silas kit lavil e al Bere. Kan zot ti ariv Bere, zot ti al dan sinagog. 11Bann zabitan ti annan en pli bon santiman ki bann Zwif Tesalonik: Zot ti resevwar Parol Bondye avek bokou lentere. Tou le zour zot ti etidye Lekritir pour war si sa ki Pol ti dir zot, ti vre. 12Bokou parmi bann Zwif ti krwar. Ti osi annan en gran kantite fanm Grek enportan dan lasosyete, ek en bon kantite zonm.
13Me kan bann Zwif Tesalonik ti tande ki Pol ti pe anons Parol Bondye osi dan Bere, zot ti vini e konmans eksit lafoul e met dezord parmi zot. 14Alor, bann frer ti fer Pol al deswit dan direksyon lanmer. Me Silas ek Timote ti reste Bere. 15Bann zonm ki ti pe kondwir Pol, ti akonpanny li ziska Atenn. Apre, zot ti retournen avek en mesaz sorti kot Pol pour dir Silas ek Timote vin zwenn li pli vit posib.
Pol dan Lavil Atenn
16Pandan ki Pol ti pe esper Silas ek Timote dan lavil Atenn, i ti dekonserte pou war ziska ki pwen sa lavil ti ranpli avek zidol. 17Alor, i ti diskite dan sinagog avek bann Zwif ek non-Zwif ki ti ador Bondye. I ti osi diskit avek dimoun ki i ti zwenn tou le zour lo laplas piblik. 18Serten filozof epikiryen e stoisyen ti vin diskit avek Pol. Serten ti demande, “Ki sa kozer pe rabase?”
Lezot ti dir, “I paret ki i pe koz lo bann bondye etranze.”
Zot ti dir sa, akoz Pol ti pe pres lo Zezi ek rezireksyon.
19Alor zot ti pran Pol, e anmenn li devan konsey Lareopaz. Zot ti demann li, “Eksplik nou ki sa nouvo lansennyman ki ou pe anonse. 20Annefe, ou pe dir en bann keksoz ki drol pour nou. Alor, nou ti ava kontan konnen ki savedir.”
21Annefe, bann Atenyen ek tou bann etranze ki ti viv parmi zot, ti pas zot letan zis rakonte e ekout bann dernyen nouvel.
22Alor, Pol ti debout devan tou sa bann dimoun ki ti'n rasanble dan milye Lareopaz. I ti dir, “Atenyen! Mon remarke ki dan tou pwennvi, zot bann dimoun tre relizye. 23Annefe, letan mon ti pe pronmnen dan zot lavil e pe get avek atansyon bann lobze ki zot adore, mon ti remarke ki lo enn bann lotel i annan sa lenskripsyon: Pour en bondye enkoni. Alor, sanmenm sa Bondye ki zot adore san konn li, ki mon pe vin anons zot.
24Bondye ki'n kree lemonn ek tou sa ki ladan, i Senyer lesyel ek later. I pa reste dan bann tanp ki'n ganny konstri par lanmen zonm. 25I pa bezwen ki zonm i okip li e fer nenport kwa pour li, akoz li menm ki donn tou dimoun lavi, respirasyon ek tou leres#17.25 War 7.48; 1 Rwa 8.27; Ez 42.5.. 26Apartir en sel zonm, i'n kree tou bann nasyon dan lemonn e etabli zot lo later antye. Li menm ki davans in fikse letan egzakt e limit#17.26 War Det 32.8. bann rezyon kot zot devre reste. 27Bondye in fer sa pour ki zonm i rod li, e esey antre an kontak avek li, e ki an tatonnan, zot trouv li. An realite, i pa lwen avek sakenn parmi nou,
28akoz, atraver li, nou ganny lavi,
nou kapab bouze e nou egziste.
Sanmenm sa ki serten parmi zot poet in osi dir:
Nou osi nou son bann zanfan.
29Alor, akoz nou son bann zanfan, nou pa devre krwar ki Bondye i parey avek en divinite ki'n fer avek lor, larzan oubyen ros, ki lar ek limazinasyon imen in prodwir. 30Bondye nepli tenir kont bann letan kan bann imen ti pe viv dan linyorans. Me aprezan i apel tou dimoun dan nenport ki landrwa pour sanz zot mannyer viv. 31Annefe, i'n fikse en zour pour li ziz lemonn antye avek lazistis, par en zonm ki i'n swazir. I'n donn nou laprev, an resisitan sa zonm.”
32Kan zot ti antann Pol koz lo size rezireksyon, serten ti gognard li, me lezot ti dir, “Nou ava ekout ou koz lo sa size en lot fwa.”
33Alor, Pol ti kit zot. 34Me ti annan kantmenm serten ki ti krwar e zwenn avek zot. Parmi zot ti annan Deni, manm konsey Lareopaz, avek en fanm ki ti apel Damaris e lezot ankor.
Labib An Kreol Seselwa © Seychelles Bible Society, 2013.