2 Tesalonisyen 3
3
Priy pour Nou
1Anfen, mon bann frer ek ser! Priy pour nou, pour ki mesaz Senyer i kontinyen repann rapidman, e i ganny byen aksepte avek loner, parey i'n fer parmi zot. 2Priye pour ki Bondye i delivre nou avek sa bann move dimoun mesan. Annefe, pa tou dimoun ki krwar dan Bondye.
3Me Senyer i fidel. I pou fortifye zot e prezerv zot kont sa enn ki move. 4Senyer i donn nou sa lasirans lo zot size: Nou sir ki zot pe fer e ki zot pou kontinyen fer sa ki nou'n demann zot. 5Mon demann Senyer gid zot leker dan lanmour pour Bondye e dan pasyans ki Kris i donnen.
Lobligasyon Travay
6Mon bann frer ek ser! Nou donn zot sa lord lo non nou Senyer Zezi-Kri: Evit asosye zot avek bann frer parese ki pa oule travay, e ki pa oule viv dapre lansennyman ki nou'n transmet zot. 7Zot konnen zot menm ki zot devre fer tou pour swiv nou legzanp. Nou pa ti pares kan nou ti parmi zot. 8Nou pa ti demann manze pour nanryen avek personn. O kontrer, nou ti travay dir, aswar koman lizour, pour nou pa vin en fardo pour personn parmi zot. 9Nou ti azir konmsa, pa akoz nou ti napa drwa resevwar zot led, me akoz nou ti oule donn zot en legzanp pour swiv. 10Annefe, kan nou ti kot zot, nou ti averti zot: Sa enn ki pa oule travay, pa devre osi manze.
11Nou'n tande ki i annan parmi zot ki viv en lavi pares, nanryen fer, ki zis mel dan zafer lezot. 12Nou demann bann dimoun parey e ordonn zot lo non Senyer Zezi-Kri: Travay dan kalm pour zot ganny zot nouritir zot menm.
13Kanta zot, frer ek ser! Pa zanmen aret fer dibyen. 14Pran kont sa bann ki pa obei rekomandasyon ki nou donnen dan sa let. Pa bezwen frekant zot. Sa i ava fer zot onte. 15Sepandan, fodre pa tret zot koman bann lennmi, me konsey zot koman bann frer.
Benediksyon ek Salitasyon
16Aprezan, Senyer ki sours lape, ava li menm donn zot lape, dan tou letan e dan tou fason. Mon demande ki Senyer i reste avek zot tou.
17Mwan, Pol, mon ekri sa salitasyon avek mon prop lanmen. Konmsa ki mon siny tou mon bann let. Sa i mon lekritir. 18Mon demande ki lagras nou Senyer Zezi-Kri i avek zot tou.
Labib An Kreol Seselwa © Seychelles Bible Society, 2013.