LUK 23
23
Jisu Pilat Bete
(Mat 27.1-2, 11-14; Mrk 15.1-5; Jhn 18.28-38)
1Amülung apüm shemüsu Jisu Pilat yanglang nowücho. 2Arühnü abi mülangjümüsu yocho: “Hiba nyitsarünü ihrü te Kaesar khyang alihmüthsü tüjü pü yoko ko apu jangjangthsa Mesia, ko yangthsarü khüduepü chonü müyurü nümülacho ihrünü rangko.”
3Pilat-nü abi te tsingdhingcho, “Nüh Jihudarü yangthsaba tsü mah-o?”
Jisu-nü lalingcho, “Nüpunü yore.”
4Achotsü Pilat-nü bebü ayingti ko sühdi te yocho, “Ihnü hiba nyitsarü mülangjünung yuzi tu müngure.”
5Ta arühnü khüsha yocho, “Abi adoba khunü Judea lih apümlang yubejarong chürosohre. Abinü Galil la dikehcho ko ade hila ro lile.”
Jisu Herod Bete
6Pilat-nü hi yuchinü tsingdhingcho, “Hiba nyitsarü hi Galilrü mah-o?” 7Khode Pilat-nü Jisu tsü Herod yanglih lanüepü müdhecho, abinü Herod yang abi müthehcho, tunüo hütsü shikhela Herod mii Jerusalem la ro licho. 8Khode Herod-nü Jisu ngucho, abi dee künyangcho, tunüo abinü abi nengdang yuchicho ko akhudinü abi ngunyü licho. Jisu-nü thsayahiya khürü nguchicho abinü ngunyücho. 9Achotsü Herod-nü Jisu te yu adrong tsingdhingcho, ta Jisu-nü tusü mülalingcho. 10Bebü ayingti ko yuzeng dorütinü shemüsu Jisu dee mülangjücho. 11Herod ko abi athrungrütinü Jisu müthsamünyüjü ko mülangjü bichicho; ko hütsüpü ariri shü phakehjücho ko thali Pilat yang müthehcho. 12Hütsü nyümong dunü Herod e Pilat nyüh shangrü thsachehcho; hütsü mah-edelü anyüh arorüh thsa licho.
Jisu Süsohnung Mülangjücho
(Mat 27.15-26; Mrk 15.6-15; Jhn 18.39—19.16)
13Pilat-nü bebü ayingti, langnürüti ko müyurüti müjangnü dsicho, 14ko arüh te yocho, “Hiba nyitsarü hinü müyurü amünülang nürepü nührünü abi Ih yang noroko. Ihnü nührü betenü abi thsadsüko, ko nührünü abi mülangjüba tulasü Ihnü abi chah mülang müngure. 15Herod-nüsü abi mülang müngu, hütsünü abinü Ihsa yang abi thali müthehcho. Hiba nyitsarünü asünung leng tu münguchi. 16Hütsüeko Ihnü abi xüpnah lahsohpü lehcheh müthehnung.” 17(Phungkhu Thsüti müipi Pilat-nü arangyohrü khüdu arüh yang müthehchünung abi yangthsa licho.)
18Sühdi shünü züdecho, “Abi süsohng! Ihrü khyang Barabbas müthehng!” 19(Barabbas tsü yangdila yubejarong chürosohcho ko müpsehcho nengdang rangyohchoba lile)
20Pilat-nü Jisu müthehnyücho, achotsü abinü amülung te thali tsingdhingcho. 21Ta arühnü züdecho, “Abi hamkehng! Abi hamkehng!”
22Pilat-nü arüh te asangpiusü yocho, “Abinü tu thsamehcho? Abinü asünung leng nguchicho Ihnü tu müngure. Ihnü abi xüpnah lahsohpü müthehnung.”
23Ta arühnü Jisu tsü hamkehngpü arüh linga rohcheh khongcho ko achangkala arüh yula lahrangcho. 24Achotsü arühnü chingcho roh-i nguchinung Pilat-nü mülacho. 25Abinü arühnü chingba, sü yubejarong ko müpsehcho ngang rangyohcho abi müthehcho, ko arühnü khyünyücho roh-i nguchinung abinü arüh khyang Jisu khakhuchüjücho.
Jisu Hamkehcho
(Mat 27.32-44; Mrk 15.21-32; Jhn 19.17-27)
26Athrungrütinü Jisu notsicho, ko arüh wüyade, arühnü Cyrenerü anengnü Simon yanglangnü yangdi lang rochi yacho mütohcho. Arühnü abi rangcho, ko khala tsü abi chah dhikehjücho, ko abi khyang dhisohpü Jisu khanglang iisohcho.
27Nyitsarü sühdi amülah abi khanglang iiwücho; hütsüri yola khingkurü khürü me tranü iiwücho. 28Jisu-nü ximüla arüh te yocho, “Jerusalem khingkurüti! I nengdang tütra, ta nührübürü ko nührü tsuzarüti nengdang traang. 29Nyitsarünü hiroh-i yonung nyümongti tsehle, ‘Khingkurü pümdongcho, azarü mühidhingrü ko nyikih mütidhingrü khüta suro atsa!’ 30#Hos 10.8; Mis 6.16Hütsüde nyitsarünü azongti te ‘Ihrü michah shohjoung’ ko akhangti te ‘Ihrü haptieng; pü yonung shikhe thsanung!’ 31Tunüo singxeng chah hiroh-i nguchikhang, sing asücho chah tu tikehnung?”
32Yuzeng thsangnyangrü nyüh anyüh Jisu yola süsohnung nowücho. 33Khode arühnü müdüm khüdu, “Thahrü” dsiba chii rocho, arühnü Jisu hütsüla hamkehcho, ko yuzeng thsangnyangba nyüh tsü, khüdu abi tsalangthring ko akhüu tsü abi fülilang hamkehcho. 34#N. Khi 22.18Jisu-nü yocho, “Uwa, arüh khyang mülang pehjüng! Tunüo arühnü tu nguchiro hütsü arühnü mümüdhe.”
Arühnü zii thsadhing abi shü arüh yola changtacho. 35#N. Khi 22.7Hütsüla yarü nyitsarütinü dhingyade Jihudarü langnürütinü abi müthsamünyücho: “Abinü aparülü khümchoko; abi Tsingrangba-nü throchehba Mesia tsü thsakhang apu jangjang khümchosohng!”
36 #
N. Khi 69.21
Athrungrüti nüsü abi müthsamünyücho: arühnü abi yangro acikih tihpü yocho, 37“Nüh Jihudarü Yangthsaba thsakhang nüpu jangjang khümchoung!”
38Akube yu hiri thrahkeh licho: “Hiba hi Jihudarü Yangthsaba.”
39Yuzeng thsangnyangrü hamkehrü yola nyüh khüdunü abi müthsamünyü yocho: “Nüh Mesia tsü mahrü do? Nüpu ko ihrüsü khümchoung!”
40Ta akhüuba tsünü abi yüpü yocho, “Tsingrangba müdrürü ang? Nühsü abi roh-i mülangjüko. 41Ihjülü athsalange, tunüo Ihjülü Ihjü nguchicho aleng ngure; ta abilü tu müthsameh.” 42Ko abinü Jisu te yocho, “Jisu, nüh khode yangthsarü kangpü ronang Ih lümchehng!”
43Jisu-nü abi te yocho, “Ihnü nüte yutsatsa yore, Chünye nüh Ite Paradise la linung.”
Jisu Sücho
(Mat 27.45-56; Mrk 15.33-41; Jhn 19.28-30)
44Dhüreanyüh bekhyah kohnü asang bekhyah chii limih apümlang mapehcho; 45#Nüch 26.31-33ko amübükuh kitising shü tsü anyüh kang rohrüpcho. 46#N. Khi 31.5Hütsüde Jisu-nü yuva amülahnü züde yocho, “Uwa! Nü kheh la I nbü khakhuchüjüre!” Hi yopü abi sücho.
47Khode thsih michah anüchiba tsünü atikehcho tsü ngucho, abinü Tsingrangba nengse yocho, “Ajüje hiba hi achomükeh nyitsarü thsako!”
48Ko adhingnung shibülungrünü atikehcho tsü ngude, wahnü arüh dreng hamnah thali tsicho. 49#Luk 8.2-3Jisu te müdhetarüti atümung ko Galil lanü iirorü khingkurütinü ashulanü dhingyacho.
Jisu Me Rangcho
(Mat 27.57-61; Mrk 15.42-47; Jhn 19.38-42)
50Arimathia-rü nyüh khüdu anengnü Josef, sü Judea yangdi lanü licho. Abi amüsarü ko nyitsarü atsa, ko abi Tsingrangba yanglih ronung ying licho. 51Abi ashimükhongla langnürü khüdu thsanye abinülü arüh adhrongcheh ko nguchi tsü mükhyüchocho. 52Abinü Pilat yang wünü Jisu me chingcho. 53Hütsüpü abinü me tsü dhichonü shü anana khüdunü müshüpü, lung la chiphohcho süsü mütsongpüdhingcho kong khüdula hütsü yohpücho. 54Hütsü kudingnyü licho ko Sabath adikehrü thsacho.
55Galil lanü Jisu khanglang iiwüba khingkurütinü Josef yola wücho ko kong la Jisu me khüta yohpücho ngucho. 56#Nüch 20.10; Azk 5.14Hütsüpü kulang thali wücho ko axümlichi tuji tsü rungnümcho.
Ko Sabath tsü yuzengnü mülacho roh-i arühnü kyahshangcho.
Currently Selected:
LUK 23: SANGBSI
Highlight
Share
Copy
Want to have your highlights saved across all your devices? Sign up or sign in
Sangtam Naga (Re-edited) Bible - AMÜSA BAIBEL
Copyright © 1995 by The Bible Society of India
Used by permission. All rights reserved worldwide.