LUK 24
24
Angakhîn
(Mt 28.1-10; Mak 16.1-8; Jhn 20.1-10)
1Dobatjâ rangkhah rangkhoma dihiaknyu hehma thinma khoakhem tah tientumli heh semlahma mangruk nâng katwah. 2Thinma mangruk kenpa longkâsek ma sekthien tahpa laangphechhoan khekatwah, 3ephumma thinma akhennâng lupwãng lahma sûwãng tahpa; Jisu mang chohkhe ho. 4Erejunko mokrii lahma eretheko chepwakwah, phumma lemlienma nyahrãng khet phiakjaja keplahma mihnyan wanii eretheko hongchep hokwah. 5Nyahrãng chei lahma dihiaknyu hehma hahko khupjup wah, phumma mihnyan wanii pumma thinnâng ngatwah, “Nema ahînte pa riichoan heh chhangnâng chenrãngma lemeken a? 6Atea ako aho; Atea ngakhintah. Thonghun tan en, atema Galili nâng dângpoatko nenâng chenni thôkohthen a: 7‘Mihnyan Chhapa papi mihnyan heh deknâng kohmin, relahma rittek erea, ngale jârem diko ngakhîn erea.’ ”
8Erediko dihiaknyu hehma ate ngin pa thônghun wah, 9mangrukwah ngakwãng lahma erengin pa dijunte echhi wathe ngale ahan heh phangtang nâng thôkoh wah. 10Dihiaknyu heh dangeka Mariam Makdalani, Joana, ngale Jems nyong Mariam dângwah; thin ngale thindem ko ahan dihiaknyu hehma erengin pa moattat chhoante hehnâng thôkoh wah. 11Rohkomin dihiaknyu hehma ngaeka pa ledangli ngin ngama thônghun wah, ngale thinma ere nginko puteho. 12Rohkomin Piter toanchep lahma mangruk nâng chhoankatwah; atema kunjup lahma mangrukko sûka tahpa lihân chenjô lekhe thangma mangkhet pelolo chohkhe wah. Erediko barii lahma chenni dangeka ngama humnâng ngakwâng wah.#24.12: wanwanthe nâng vars 12 pa aho.
Imaos Lemnâng Khoam
(Mak 16.12,13)
13Erejâjâko Jisu dijunte wanii pa Imaos hahnâng wângwah, erehahpa Jeroselem wah mee engit dângwah, 14ngale ateniima erekowah chenni dangtah a erengin heh thômîn wah. 15Atenii thômîn thuko, Jisu atenii tâko hehka lahma thindemko johkhoamwah; 16thinma Jisu nâng khewak eka, rohkomin jetloho. 17Jisu ma thinnâng ngatwah, “Nechhema akhoam nungnung chenni ngin thômîn eken a?”
Thin thhenphãng pa hungchhih litlit danglahma tahchep wah. 18Atenii wah wathe, mînpa kliopas pumma Jisu nâng chhienwah, “Jeroselem ko mihwun pa nang lolone, are jânii jârem mako Jeroselem nâng chenni dangtah a ereheh lejet thangma?”
19Atema chhienwah, “Erepa chenni dângwah a?” Thinma dânthâng wah, “Nazarat wah Jisu nginpele,” “Are mihnyan pa Joban memin ngale chentô mihnyan hehmemin mõng ngama thônghun wah, ngale chentô ate jab ajâ ngale moat akat heh chaan demnâng dângwah. 20Phumma nãng soam aroakte dong ngale hah pênte khhepho phannang hehma ritphethuk eka, ngale ate arittek rewah. 21Ngale atema Isrial mihnyan heh epesiet a ngama nima thonghun lihma dângwah! phumma ate ritphetah wah thejâ ma jârem lâdangtah. 22Nilemru dihiaknyu hehma patriithuk ehi; rangkhah rangkhoko thin mangruknâng katwah, 23phumma thinma ate mangpa chohkhe wakmah. Thinma ngakwãng lahma, rangkhethung wah Joban ngintatte hehma thinnâng Jisu ahîn ngama thôko lahma thânkhe eki ngama thôkoh ehi. 24Nilemru heh mangruk nâng kalahma sûka tahpa dihiaknyu hehma thôkotah rãngrãngjô chohkhe katwah, ngale thinma Jisu chohkhe ho.”
25Erediko Jisu ma thinnâng ngatwah, “Ne meroh taba eken a, mõng hehma jabtah ngin komin lepute chenroh jiendang eken a! 26Misaia ma ere chêm heh chohlahma atema mîndông chohmin ngama nema lejetwah ne?” 27Ngale Jisu ma Joban nyapraang nâng ate junma chentô raangtah heh thôkoh wah, Mosa ma raangwah titab pumma danglahma chentô mõng hehma raangtah hehmin thôkoh wah.
28Thin wãngeka hahdaang kêko hokrienrien, Jisu ma atea ademin roanchhe ataangnâng wângte rãngrãng diapdângwah; 29rohkomin thinma atenâng ngatwah, “Nidemnâng johtonghi; chenrãngma ngako sanhêmthah lâdangtah, ngale rang lânyek eka.” Ephumma thin demnâng johtông wângwah. 30Jisu thin demnâng phhekchhah chhahrãng tôngko, atema bankên toansem lahma Joban nang dangkoh a ngat rangsoam wah; erediko atema chhupsiet lahma thinnâng kohwah. 31Erediko thinmit hongkhin lahma Jisu nâng jetloat wah, rohkomin thinmakhe rienrien mahjâ rewah. 32Ephumma thin jabmînwah, “Atema chenthu nãngdemnâng lemko jabmîn thiko, ngale atema Joban nyapraang wah nãngnâng thôkoh thiko nãngnâng wenma khamwah rãngrãng ledang wahne?”
33Thin lemlienma toanchep lahma Jeroselem nâng ngakkatwah, ereko thinma echhi wathe dijunte heh mihhan heh demnâng roamkhôan lahma khehokwah 34ngale thinma ngatwah, “Teso pa linlinjô ngakhintah! Atea Simon demnâng min chohmîntah!”
35Lemnâng chenni dangtah a ereheh mihnyan wanii pumma dijunte hehnâng thôkoh wah, ngale Teso ma thinnâng bankên phênkohko thinma chenroh jetlotah a ereheh thôkoh wah.
Jisu Dijunte heh tânâng Hôngwah
(Mt 28.16-20; Mak 16.14-18; Jhn 20.19-23; Ml 1.6-8)
36Wanii pumma are ngin heh thôkoh thuko, lemlienma thinmongko Teso hongchep hûlahma thinnâng ngatwah, “nedemnâng mêmo chentonghèn.”#24.36: wanwanthe nâng thinnâng aroh nga lahma raangmah, “Nedemnâng mêmo chentonghèn.”
37Thinma mihdâpha kheki ngama thonghun lahma patrit rewah. 38Phum-ma atema thinnâng ngatwah, “Ne chenrãngma patrii eken a? Nehung nâng chenrãngma tungmaang eken a? 39Ngadek adako sûtanha, sûtanha Nga jôba. Nema jetrãng sahlo tanha, chenrãngma ngako nema Nganâng kheha rãngrãng mihdâpha nâng sek asâ ngale rok arã aho.”
40Atema eroh ngalahma thinnâng ate dek ada heh khesokwah.#24.40: wanwanthe nâng vars 40 pa aho. 41Thinma mitma linlinjô chohkhe eki ngama lechhang pute thangmemin nyahrãng khuhah nâhah ngale bâritmin rewah; ephumma Jisu ma thinnâng thôngphâ wah, “Areko nenâng chenni akomin phhekchhah thin tonghèn a?” 42Phumma thinma atenâng behchoan ngah kohwah, 43Erepa atema thalahma thintâko chhahwah.
44Erediko atema thinnâng ngatwah, “Ngama are ngin heh nga nedemnâng dângthuko thôkotah: Mosa Niemarang nâng, ngale chentô mõngama, erediko Rangsoam titab nâng ngajunma raangtah heh phangtang linlin dângwângmin ngama.”
45Erediko Joban nyapraang heh jienjetrãng atema thinhung arin heh laangkohwah, 46ngale thinnâng ngatwah, “Aroh raanglahma tonga: Misaia pa metkep echêm a ngale jârem diko ritwah engakhin a, 47ngale ate mînko, Jeroselem hahma bângthun lahma chentô diak akan hehnâng papmoatlem wah hungngaklit ngin ngale pap heh mapkoh ngin phoangthô kohmin. 48Nema are kheken heh phoangthômin. 49Ngale nga Wama chenni toamsem tah a ereheh Nga dedema nekhoh nâng echien katrâng. Rohkomin rangkhethung wah Joban chaanpa nekhu khohnâng makaka hènko nema hahdaangko bemtongen.”
Jisu Rangkhethung nâng Toansietwên
(Mak 16.19,20; Ml 1.9-11)
50Erediko atema dijunte heh Bathani hah tôko sietkatwah, eretheko atema ate deklaang lahma thinnâng rangkoh wah. 51Atema thinnâng rangkoh jenjenko, thin tâwah rangkhethung nâng toansietwên wah.#24.51: wanwanthe nâng arepa raangmah ngale rangkhethung nâng toansietwên wah. 52Thinma atenâng rangsoam lahma nyahrãng khuhah nâhah danglahma Jeroselem nâng ngakwâng wah, 53ngale thinma roantang Joban nâng dangkoh a ngama ngalahma Rangsoamhum nâng tôngwakwah.
Currently Selected:
LUK 24: NOKTBSI
Highlight
Share
Copy
Want to have your highlights saved across all your devices? Sign up or sign in
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.