LUK 23
23
Jisu Pilat tânâng siethok
(Mt 27.1,2,11-14; Mak 15.1-5; Jhn 18.28-38)
1Mihnyan heh phangtang cheplahma Jisu Pilat tânâng sietkatwah, 2Enâng thinma bângsekham wah: “Are pumma nãng mihnyan heh phoangkesiet lahma chohloeki, atema Chofa nâng thãkho lekohmin ngama phoangthôkoh eka, ngale ate dedema nga a Misaia, ngale lowang ngama phoangthôrii eka.”
3Pilat ma Jisu nâng chhienwah, “Nanga Jews heh lowang ne?”
“Nangma lâpun jabtoh,” ngama Jisu ma dânthâng wah.
4Erediko Pilat ma soam aroakte adong ngale mihnyan hehnâng thôngphâ wah, “Ngama are mihnyan pumma chenni nângjô thelahma chohlomek.”
5Rohkomin thinma jahjah chaanjab wah, “Atema phoanghethô lahma Judia diakwah mihnyan heh phangtang phoangjamsiet eka. Atema Galili nâng bângphoang jâmsietwah, ade phumma anângmin lâhû jamsiet katha.”
Jisu Hirot tânâng chienkat
6Chenthu Pilat ma are nginpa tatphumma atema chhienwah, “Are mihnyan pa Galili jatne?” 7Chenthu Pilat ma Jisu pa Hirot ma pêneka diak khenwah ngama jetphumma, atema Hirot tânâng chienwênwah, erepoatko Hirot a Jeroselem nâng dângwah. 8Chenthu Hirot ma Jisu kheko atea nyahrãng khuhahwah, chenrãngma ngako atema Jisu nginpa tatlahma chenthu thuma Jisu khehunwah. Jisu ma patritli moatlem molahma echohkhe ang ngama Hirot ma thônghun wah. 9Ephumma Hirot ma Jisu nâng melâng ngin thôngphâ wah, rohkomin Jisu ma chenjô dânthangho. 10Soam aroakte adong le Niemarang hethôte heh khema nâng cheplahma Jisu nâng nyahrãng chaan sekhamwah. 11Hirot le ate sipâhi hehma Jisu nâng nyahrãng jõjêm lahma rêsêthuk wah; erediko thinma khetsenwah pohko lahma Pilat tânâng ngaksietkat wah. 12Erejâ pumma Hirot le Pilat nii lemruchha rãng pekmînwah; ere mako thin a randângwah.
Jisu Ritpherãng Ngin Pat
(Mt 27.15-26; Mak 15.6-15; Jhn 18.39—19.16)
13Pilat ma soam aroakte adong, khhepho phannang heh erediko mihnyan heh phangtang khoanroowah, 14ngale thinnâng ngatwah, “Nema are mihnyan pumma nãng mihnyan heh phoangkesiet eka ngama ngatânâng siethû koh eha. Phumma ngama ne tâko lâthat thôngphatek, rohkomin nema sekham eken rãngrãng ngama atea thelahma chohlomek. 15Hirot memin atenâng thelahma chohloho, erohwah atema nãngtânâng ngakchienwên era. Are mihnyan pumma ate lanritpheroh chenjô chhihmomah. 16Erohwah ngama atenâng watlekma chienchhoan ang.”#23.16: wanwanthe pumma vars 17 pa raangeka: Adankhoam lokuh roakweih Pilat ma phâtek nâng khhekritte mihnyan wathe laangphê kohwah (Mak 15.6 ko tasûe).
18Mihnyan heh phangtangma rakwah, “Ritphere en! Barabas laangphe kohhi!,” 19(Barabas pa hahdaangko phoangjamsiet lahma mih ritphedi phâtek nâng khhekwah.)
20Pilat ma Jisu chhoanthuk hunwah, rohwah atema mihnyan hehnâng thêngak thôngphâ wah. 21Phumma mihnyan hehma ngakrakwên wah, “Arittekre en! Arittekre en!”
22Pilat ma thinnâng lôremrãng ngatwah, “Eroh medang ako atema chenni chhihmotah a? Atea lanritpheroh chenjô chhihmo lahma ngama chohlomek! Ngama atenâng watlekma chienchhoan ang.”
23Rohkomin thinma Jisu pa arittek jôba rêmin ngama chaanmõang rakwah, phumma athôanko linlinjô thinma ngaeka junko dângwah. 24Ephumma mihnyan hehma ngaeka rãngrãng Pilat ma Jisu ritphe rãng nginpat hôanwah. 25Thinma chenpa thatah a ere mihnyan pa Pilat ma laangphê kohwah, ere mihnyan pa hah phoangjamsiet lahma mih ritphedi phâtek nâng khhekwah, ngale nema chenni rehun eken a eroh hôanjôan en ngama thindeknâng Jisu kohwah.
Jisu Rittek
(Mt 27.32-44; Mak 15.21-32; Jhn 19.17-27)
26Sipâhi hehma Jisu sietchhoan wah, ngale thinma lemko Kren diakwah mihwa wathe chohmînwah, ate mînpa Simon dângwah, atea thin diakwah sumhah nâng katwah. Phumma thinma lolahma ate khohko bãngphak pa loakko lahma, atenâng Jisu tokdiko pêthukwah.
27Mihnyan jahmõang ate diko junkhoam wah; thin demko dihiaknyu khuthe ate rãngma nyahrãng seplahma dângwah 28Jisu ma thinnâng ngiaksûkat lahma ngatwah, “Jeroselem wah dihiaknyu heh! Ngarãng neksepen, nekhu dederãng ngale ne chhuchha hehrãngma sepen. 29Chenrãngma ngako mihnyan hehma, ‘Chha ahote dihiaknyu, naa lethat chhate, ngale naanyong lethat dangte dihiaknyu heh chentô khangraangsên a!’ ngama ngat sanpoat pa lâhûera. 30Ere sanpoatko mihnyan hehma hahkong hehnâng, ‘Ni khohko rutjâkahi!’ ngale hahho hehnâng, ‘Ni tekpetkathi!’ ngama engawak a. 31Mihnyan hehma bãngpa ahin poatko tumin aroh mehôan mejôan ako, mechoaktah kojãtanga chentô hôanjôan min a?”
32Ahanmin mihngoan wanii Jisu demko johrittek rãng sietchhoan wah. 33Chenthu, “Mangkhora sekthinthe,” ngama ngaeka theko siethok phumma, eretheko thinma Jisu rittekwah, ngale mihngoan wanii pemin Jisu dekhitko wathe ngale dekchahko wathe johrittekwah. 34Jisu ma ngatwah, “Ewa thinnâng mapkoh o! chenrãngma ngako thinma chenni moeka erepa jetmah.”#23.34: wanwanthe nâng Jisu ma ngaeka ngama aho, “Ewa thinnâng mapkoh o! chenrãngma ngako thinma chenni moeka arepa jetwakmah.”
Thinma thintungko Jisu khetpa longkendoh nâng tanlahma phenkep wah. 35Jews khhepho phannang hehma Jisu nâng jôjêm poatko eretheko mihnyan heh cheplahma sokwah: “Atema mihhan tapepâng eka; phumma Joban ma rênwah Misaia medang ako atedede min chenpe pângriitan a!”
36Sipâhi hehmemin atenâng jôjêm wah: thinma ate tâko kalahma atenâng penriti chhih kohwah, 37ngale ngatwah, “Nanga Jews heh Lowang medang oko nangdede pepângriio!”
38Ate khherahko: “Arepa Jews heh lowang.” Ngama raanglahma betkohwah.
39Erekowah mihngoan wathe pumma ate khopa heklahma dûmmek wah: “Nanga Misaia dangmohne? Nangdede pepângrii lohma, nimin pepânghi!”
40Ahan wathe pumma atenâng ritngatwah, “Nanga Joban ran cheimohne? nangmin ate rãngrãng jôba rittek eho. 41Nãngheh a, nãnghehma chhihmoat thãba rittek kohehi; rohkomin atea chenjô lechhihmo nâng rittek eka.” 42Ngale erediko atema Jisu nâng ngatwah, “Jisu, Nanga chenthu Lowang danglohma katjâko nganângmin thonghunhang!”
43Jisu ma atenâng ngatwah, “Ngama nangnâng toamsem eki, thejâ phumma nanga nga demnâng rangkhethung nâng tôngmin.”
Jisu Rit
(Mt 27.45-56; Mak 15.33-41; Jhn 19.28-30)
44-45Rangngih echhi wannii sanpoat pumma danglahma sanhêmthah wanrem sanpoat tôko san lephiaktu thangma hahtokkhoh phangtang nyekjâ wah; ngale Rangsoamhum kowah khettin ekapa lengnii korãng lângjâ wah. 46Jisu ma, “Ewa! Nang dekko Nga Jupa chohkoh eki!” ngama chaanmõang raklahma ate ritwah.
47Ereko chenni dangtah a erepa Sipâhi sahhabwa pumma khelahma atema Joban nâng rôwah, atema ngatwah, “Linlinjô atea mihnyansen dângwah!”
48Eretheko sokrãng khôanhutah mihnyan hehma ereko chenni dangtah a ereheh khewah, thin nyahrãng hungchhih rekmah danglahma humnâng ngakwâng wah. 49Jisu nâng senthemthem jette heh erediko Galili wah ate diko junkhôamte dihiaknyu heh roanche ataang manko cheplahma sokwah.
Jisu Mangbîn
(Mt 27.57-61; Mak 15.42-47; Jhn 19.38-42)
50-51Josep ngama mihnyan wathe dângwah, atea Judia diakwah Arimatha hahwah dângwah. Atea mihnyansen ngale chentôma atenâng hunlahma dângwah, ngale atemin Joban Hahsông pa bemla lahma dângwah. Atemin Jews heh ngoang awangjô medang akomin, thinma Jisu ritphe rãng phung eka moatlemko johdangho. 52Atema Pilat tânâng wãng lahma Jisu mangpa thâwângwah. 53Erediko atema Jisu mangpa jâtoan lahma, khetnâng doaplahma, longjanwah thutwah henjô mathatru mangruk kenko rukatwah. 54Erejâpa hokut batjâ dângwah, ngale Pientông rangwo jâpa dangnemnem dângwah.
55Galili wah Jisu demnâng johkatah dihiaknyu hehma Josep demnâng johka lahma mangruk pa sûka, ngale Jisu mangpa chenroh rukat eka erepa sokkatwah. 56Erediko thinma humnâng ngakwãng lahma Jisu mangko hutkatrãng tientumli heh khoakhêm wah.
Mosa Niemma ngat junko thinmin Pientông jâko boantong rewah.
Currently Selected:
LUK 23: NOKTBSI
Highlight
Share
Copy
Want to have your highlights saved across all your devices? Sign up or sign in
Nokte Naga NT - NIEMNYAN
© The Bible Society of India, 2014.
Used by permission. All rights reserved worldwide.