MATHI 28
28
Jisu Yangei Leipü
(Mk. 16:1–10; Lk. 24:1–12; Jn. 20:1–10)
1Sabbath pheikü hatyang kü shongpü nyih dhom mü lomi Mary Magdalen hatü lebü Mary nyi mahngchong kü veinüng heih. 2Ngangahük kü pedi longi vük; mehenangkü Shembüpalei vangsho phongshan hük vangsho leipü yiüei ha yaong ngowtüktü ha kü uoshi nyuteke. 3Büpalei dhe klang kei, hatü büpalei ow shüdao kei shoshi nyu. 4Büpa kü nyempai yombüthü kheüei mahng kei leidaikem.
5Shejao vangsho phongshani nyüha nyi kü, “Anji tenyem; mehenangkü anjiyü shophang kü apei jütükpü Jisu yemnyu khih shei ngei nyingnyüke. 6Büpa hamü nenyu; mehenangkü büpai epükei büpa yangei leidaiteke. Heihkei, büpa lempü shing kü veihümao. 7Lomi daiyei, ‘Büpa yangei leidaiteke’ shei büpalei nanglomthü kü etuh, hatü büpayü am shekü Galilei daiteke; halei ammi büpa ponghen. Hapayü am shing ngelei shahjangmei” shei e.
8Hanangkü jijinyi-i nyempü hatü mongong longpü mü shülangi mahngchong tuhtü lei, hatü büpalei nanglomthü kü ehen mokteke. 9Ngangahük kü Jisui jiji mü pongei, “Selam!” shei e, hatü jiji büpa touei heih-ei büpalei la kü shongtü khüm. 10Hahepak kü Jisui jiji kü, “Tenyem, daiyei ngelei jeihinaüthü kü Galilei heihhen etuh; halei jomi ngei ponghen” shei e.
Yombüthülei Shah-om
11Mechem jomphong daiyei nyupa, yombü khongkü hanei chingnyülei shüei mehe vampa, ha peü ngongpathü kü ejateke. 12Ngongpathüi behethü mü thaitü jomi yombüthü kü lop longi shuohhen küpjan temtei. 13Jomphongi hathü kü, “Amphongi ham shidaitü büpalei nanglomthü nyak kü peiyei büpa güh-ei lüdaipeih shei etuh. 14Governori ha danhen, hatü hami büpa kü yawhhen, shejüang amphong hanghi neponghen” shei e. 15Hanangkü jomphongi lop yah-ei jom kü dükhen epükei shuoh, hatü hapa büshah shinnyih thahshi Jehoda am khongkü eteinyeih.
Nanglomthü kü Kangpü
(Mk. 16:14–18; Lk. 24:36–49; Jn. 20:19–23; P.Dou. 1:6–8)
16Hapheikü nanglomthü jom anpühük Jisui jom kü daituh shei epükei Galil kahdok kahshangei dai. 17Mechem jomphongi büpa eepa, jomi büpa kü khüm, shejao hanei am jü-ü. 18Hahepak kü Jisui jomphong touei heih-ei e, “Vangsho hatü kahdoknyü kü ngan peü ngei kü shuohteke. 19Hanangkü daituh, jatli peü nanglak leihütuh; Pa, Ha hatü Laangha Daülangpü men kü jomphong yung kü hüngtuh, 20hatü ngei am kü epü lemphü dükhen jom kü nyuh-eishuoh, hatü kahdoknyü dohpü ngoishi ngei amphong mü düngei nyukahen.”
Currently Selected:
MATHI 28: PHOMBSI
Highlight
Share
Copy
Want to have your highlights saved across all your devices? Sign up or sign in
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.