LUK 6
6
Sabbath Nang Phepü
(Mt. 12:1–8; Mk. 2:23–28)
1Sabbath nyih hük kü Jisu kah homei dai, hatü büpalei nanglomthüi hahmai shitei laki ngümtü hah. 2Shejao Pharisee am hanei-i, “Mehekei amphongi Sabbath nyih shahkungi nemongpü dou düknya?” shei e.
3Jisui jomphong kü e, “David hi büpalei küphüthüi aeishingkü büpai mehe dük, ha amphongi ne-ieangpü je? 4Büpai Kahvangei shemei shüei shahkung kü ngongpai mon hahhen epü daütükpü aan büpai yah-ei hah, hatü büpai hanei büpalei küphüthü kao shuohpeih.” 5Hapheikü Jisui jomphong kü, “Shennyak Hayü Sabbathlei Shembüpa hih” shei e.
Lak Didaipü Shennyak Hük
(Mt. 12:9–14; Mk. 3:1–6)
6Lebü Sabbath hük kü büpai Sinagog hükei shüei nyuh, hatü halei shennyak hük lakdahphi didaitü nyu. 7Shahkung nyuhbüthü hatü Pharisee ami büpa nyonghühen lem yemei Sabbath nyih hapa shennyak meihükahen hi nemeihükahen shei veishi nyu. 8Jomi mehe deih, büpai ha nyingdaijao büpai hapa lak didaipü shennyak kü, “Yaongei she philei heihkei” shei e. Büpa yaongei heih-ei halei yaongteke.
9Hapheikü Jisui jomphong kü, “Ngei amphong kü phenyeih, Sabbath nyih mei dükhen hi ten dükhen, nevaijü yangnyu hük yanghen hi mahtükhen shahkungi mongnya?” shei e. 10Büpai jom peü kü yaakeileyei veitü büpai büpa kü, “Nüngei lak kaangtuh” shei e. Büpai hapakei dük, hatü büpalei lak meidai. 11Shejao jomphong mongshih, hatü jom hüki hük mü jomi Jisu kü mehe dükhenang shei shah shüktei.
Jisui Nanglom Anpünyi Jepü
(Mt. 10:1–4; Mk. 3:13–19)
12Shaang hathü nyih kü büpa kahshangei phopnüng dai, hatü büpai Kahvang kü phopei paümteke. 13Mechem dhom ngoipa, büpai laophülei nanglomthü nyük, hatü jom anpünyi je; büpai jomphong kü phongshanthü shei men. 14Simon (üpa kü büpai Peter sheiyao men), chenaü Andrew, Jakob, Johan, Philip, Bartholomia, 15Mathi, Thomas, hatü Alpheaslei ha Jakob, hatü Simon, üpa kü Nyakpükenpü#Zealot nevaijü Patriot shei eehen. shei nyük, 16hatü Jakobei ha Judas, hatü Judas Iskariot, üpai büpa luhahpa.
Jisui Nyuhpü hatü Meihüpü
(Mt. 4:23–25)
17Jisui büpalei nanglomthü mü kahji hükei yiüei yaong. Büpalei nanglom khongnyü longpü hük mü khong longpü hük Judea, Jerusalem hatü Tyre hi Sidon yungkung kübü peipüthü nyu. 18Jomphongü büpai nyuhpü banghen hatü jomei dinthü meitükhahhen shingvaishi pei. Mang laanghai shanghahpüthü meihü, 19hatü nanglakthü peüi büpa kü laki honghen khe; mehenangkü büpa kübü ngan daiyei jom peü meihüteke.
Moihiman hatü Thaüvaü
(Mt. 5:1–12)
20Hapheikü büpai nanglomthü kü ngangei veitü ha eteke:
“Am taopathü moihiman, mehenangkü Kahvang ongchingü amphongei.
21Shaang am aeipüthü moihiman,
mehenangkü am shümoh meihen.
Shaang am theppüthü moihiman,
mehenangkü amphong nyihen.”
22Shennyak Ha nangkü mechem nanglakthüi am kü jiühithen, mechem am laktükhen, naamei ehen, hatü am kü ten ehenshang am moihiman. 23Ha nyih am mongmeituh, hatü mongongpai phaukteituh; mehenangkü vangsholei ammei thintho longpü nyüke; mehenangkü jomei bühipathüi thibüthü kü hapakei dükhampeih.
24Shejao am shemmeithü onyükei,
mehenangkü ammi ammei nyiumei danglangteke.
25Shaang moh-ei nyupüthü onyükei,
mehenangkü amphong aeihen.
Amphong shaang nyipüthü onyükei,
mehenangkü mahng thephen hatü younghen.
26Mechem peüi am meipü jung ehenshang onyükei, mehenangkü jomei bühipathüi shahshem thibüthü kü ha dükpeih.
Vepa kü Bampü
(Mt. 5:38–48; 7:12a)
27Shejao ngei epü bangpüthü kü ha enyeih: Ammei vepathü kü bamtuh; am kü jiühitpüthü kü mei dükeishuoh; 28am kü thaüvaüpüthü kü moihimaneishuoh; am kü nemei-i dükpüthü kü phopeishuoh. 29Hanei ami nüngei nameen phihük kü apphüjema hükpa lemao meeyeishuoh. Hanei ami ammei doknyü yahlangjema ammei bhagthuhao yah-eishuoh. 30Am kü yüpüthü peü kü yaheishuoh; hatü hanei ami ammei douhinang yahlangjema, ha nyipabü yüei telei. 31Jomi am kü nyemdükpha shei deihpükei jom kü dükeishuoh.
32Ammi am kü bampüthü kü mon bamjema, hapai am mehe menvih danghen? Mehenangkü mangthüiyao jom kü bampüthü kü jomiyao bamnyeih. 33Am kü doumei dükpüthü kü mon doumei dükjema, hapai am kü mehe menvih nyüpa? Mehenangkü mangthüi dangkao ha aihük mü düknyeih. 34Shemphahen shei monglempüthü kü mon ammi lushuohjema, hapai am kü mehe menvih nyüpa? Mangthüi dangkao mangthü kü shao nyeishi danghen nangkü lushuohnyeih. 35Shejao ammei vepathü kü bamtuh, mei dükeishuoh, nyokei danghen shei mongnelemi lueishuoh. Ammei laklei longshi nyuhen, hatü amphongü Chaipübalei hapeüthü vaihen; mehenangkü büpayü menvih neshuohpü hatü nemeipüthü kü bamnyeih. 36Ammei Pa phahjipükei amao phahji hutuh.
Mih-ei Shahphenpü
(Mt. 7:1–6)
37“Ammi mih-ei shah tephen, hatü ammei shah-ao nephenhen; ammi mih tenyonghü, shejüang amao nenyonghühen. Mih kü mang tükeishuoh, shejüang ammei mangao tükphahen. 38Shuohtuh, hatü ha am kao yahphahen. Meishi dakei, shüngei, jeenei aüh-ei daktü mih kü mekei shuoh, hapa shongdak lakshing nyokei danghen.”
39Shao büpai jomphong kü shahlap hük e: “Mükphüngpa hüki mükphüngpa hük müaokhen je? Jijiphen kahsha kü nevühen je? 40Lai-ie hashih hükü laophülei nyuhbü mü longpü nevai, shejao mechem peüi nyingei manhenshang nyuhbü kei nyuhen.”
41Nüngi nüngei jeihinaülei mük kübü mag eenyüke, shejao nüngei mük kübü püshem ne-eenyu je? 42Nevaijü mekei etü nüngi nüngei jeihinaü kü nüngei mük kübü püshem ne-ee-i tuhtü nüngi, “Jeihinaü, ngei nüngei mük kübü mag tükphüshah” shei eaokhen? Nüng akhümmong-ümpa, shongei nüngei mük kübü püshem yaktüktuh, hatü hapheikü mon nüngi jeihinaülei mük kübü mag tükhen lekei ee-aokhen.
Pü hatü Hapalei Betjük
(Mt. 7:16–20; 12:33–35)
43Meipü püi nemeipü betjük nejüknyih, nevaijü nemeipü püi meipü betjük nejüknyih; 44mehenangkü pü peü hapalei betjüki nyingnyüpeih. Hühpü kübü adhajük nevaümnyih, nevaijü hühthang kübü nyalingngupai nevaümnyih. 45Shennyak mei-i laophülei mongdangei yowei tuhpü kübü meipü vamhünyeih, hatü shennyak teni laophülei mongdangei yowei tuhpü kübü ten vamhünyeih; mehenangkü mongdangei maei nyupü kübü julei vamei enyeih.
Chongnyiam Shing Nyi
(Mt. 7:24–27)
46Mehekei ammi ngei kü, “Shembüpa, Shembüpa” shei nyüktü ngei epü nedüknya? 47Üpai ngei touei peinya, hatü ngei epü bangei düknya, büpayü hapa leshi nyüke. 48Büpayü yaong shangkü sha vaüpei chongnyiam lingei shem vepü shennyak hük leshi nyüke. Mechem yung long, shem kü hung, shejao hapa shem nejenhen; mehenangkü hapayü meishi wongei veteke. 49Shejao üpai ngelei shah dantü nedüknya, büpayü chongnyiam nelingi shem vepü shennyak hük leshi nyüke. Mechem yung longei ha kü hunghen, lomi ha dodainyüke, hatü hapa shem dopeyü longi nyuteke.
Currently Selected:
LUK 6: PHOMBSI
Highlight
Share
Copy
Want to have your highlights saved across all your devices? Sign up or sign in
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.