YouVersion Logo
Search Icon

KAHBHAO 4

4
Kaini Abel Jütükpü
1Hapheikü Adami chenyüha Ev mü jem, hatü pinnyü büm nekongi lei, hatü Kain büh. Pinnyüi, “Shembüpai sheüh-ei ngei hangku hük bühtepih” shei e. 2Hapheikü pinnyüi büpalei chenaü Abel büh. Shaang Abel-ü mi haümpü shennyak, Kainü kah ling am nyuteke. 3Hapa hepak kü Kaini Shembüpa kü betjükvungjük moila koteke. 4Shejao Abeli büpalei shongpü mi cheha nitshüpü yah-ei moila koteke. Shembüpai Abelei moila kü monghah hatü ha yah, 5shejao Kain hatü büpalei moila neyah. Hanangkü Kain mongshih hatü büpalei dhe yim. 6Hahepak kü Shembüpai Kain kü, “Mehekei nüng mongshihnya hatü nüngei dhe yimnya? 7Nüngi jiüshi düklangmeyü nüngei moila neyahhen je? Nüngi jiüshi nedükpü nangkü mangi nüng kü yepei nyeanhen shadenei danei nyüke; hapai nüng shak kü vanglem lemhünyüke, shejao nüngi ha aokhen vongbong” shei e.
8Shaang Kaini chenaü Abel kü, “Ji kahlei shashah” shei e. Mechem jiji kahlei shaei nyupa, Kaini chenaü Abel jütük. 9Hapheikü Shembüpai Kain kü, “Anaü Abel melei nyüpa?” shei phe. Büpai jangei, “Ngei nenying. Ngeiyü naüpeü yombü je?” shei e. 10Shembüpai, “Nüngi mehe dükpa? Bangtuh! Anaüei iy kahdok leipü ngei thahshi lenei aongnyüke. 11Sheyü nüng thaüvaü phangkü nyüke, hatü kah nelingaokhen. Mechem nüngi anaü jüpa hapalei iy jüphen ju kashi nyupükei kahdoki anaülei iy jüplangteke. 12Nüngi kah lingjao hapai meheyao nekohhühen. Nüngü kahdoknyü kü shem neshiüi longteipü am vaihen” shei e.
13Kaini Shembüpa kü, “Ngei kü shuohpü hanghiyü ngei kohen neaoki khih. 14Shinnyih nüngi ngei hapa kahdok leipü changtüknyu khih, hatü ngei nüng toueipü daiyei joshi nyuhen; ngeiyü hapa kahdok kü benhayaha shing nelingi longteipü am vaihen khih hatü hanei ami ngei pongjema jütükhen khih” shei e. 15Hahepak kü Shembüpai büpa kü, “Hapakei nevai, üpai nüng jühenshang shing nyetpa nyeishi bhüh yemhen” shei e. Hanangkü üpai Kain ponghenshang nejühen shingvaishi Shembüpai Kain kü nyangeihepü hük shüngteke. 16Hanangkü Kaini Shembüpa toueipü daiyei Eden heongphi Nod#Nod lappü, “Shing nelingi longteipü” shei epü nyüke. kahdokei nyu.
Kainei Hühihathü
17Kaini chenyüha mü jem, hatü büm nekongi lei hatü Enokh büh. Hahepak kü Kaini ching hük agei nyu, hatü büpai hapa ching kü naüei men aimü Enokh shei men. 18Enokh kü Irad bühjateke, Iradü Mehujaelei chepa, Mehujaelü Methushaelei chepa, Methushaelü Lamekhei chepa nyu.
19Lamekh-i nyüha nyi yah; hükei men Adah hatü hükpalei men Zillah nyu. 20Adah-i Jabal büh; büpayü ashakshemei nyuei yemhimak haümpüthülei chepa nyuteke. 21Chenaüei menü Jubal nyu; büpayü liping hatü harp vüngteipüthülei chepa nyuteke. 22Zillahlei cheha Tubal-Kain shei nyu; büpai melangnyiam hatü nyiam yah-ei lemphü douhinang lingbü nyuteke. Tubal-Kainei chenaü nelanyülei menü Naamah nyu.
23Lamekh-i chenyüha kü e, ngelei shah bangtuh;
Lamekhei nyüha nyi, ngei mehe enya, bangtuh:
Ngei kü ma yahphopü nangkü,
ngei shennyak hük jütepih.
Ngei kü bheiphopü nangkü ngei nethe hük jütepih.
24Kain jüpü nangkü
shingnyet bhüh yemjema Lamekh jüpü nangkü
pejempüanpünyetpa bhüh yemhen.
Seth hi Enosh Nyi Bühpü
25Shao Adami chenyüha mü jem, hatü pinnyüi yeshang hük büh hatü naü kü Seth shei men; mehenangkü pinnyüi “Kaini Abel jütükpü nangkü ha nangjei Kahvangi ngei kü shao lebü hapeü hük yahphopeih” shei e. 26Seth-i shao yeshang hük büh, hatü büpai naü kü Enosh shei men.
Hapa hepak kü hangkui Kahvangei men eshi khümhen chongpangteke.

Currently Selected:

KAHBHAO 4: PHOMBSI

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy