TITA 2
2
Khristamai vei Doupeizhai ea Zhaido
1Ana newo kao-züyu doupeizhainou aetouyu süna thaifüa doupeikhaio. 2Poutu tsümaitao hisü tsü leikei-a, tsü pfütoua, lahye tukhalou süa, alia lü hinou, ea teisavei shameayu hinou chih-a buloure donou doupeikhaio. 3Süzhaibüa, naotu tsümaitaohi-a puletao nou hrüyu zhaido hisü panou tsükhou loure doupeikhaio. Puletao hai maichi paoshimai soulaimoe moa darkha zhaoh qila soulaimoe, ana puletao nou avei nasü doupeilai, 4alia sübüa puletao nou lemaipfü taoye panou puletao chaamai-nahmaiye leshi loure, 5lahye tukha-a ea shee-a hrüloure, kikha vah soutoutou-a hrüloure, zhuvea peilou süre ea puletao chaamai khakhehi hrütoua maitaliye panou Ramai chipao hai paoshiwu more donou douzü peilai.
6Süzhaibüa, nahlemaitaohi-a lahye tukha-a hrüloure süpeio. 7Hateitei hinou zhaido avei taloure zhai nasü lah nenou soungaokhaio. Nenou doupeiyu hisü le sheetoua ea le loushoa doupeio. 8Eletao vanou ha chishi lia paoloure ha-a nevei ngaobamai taoye panou hraoloure donou mainou veilou hoyu sheetouyu chipaonou sei-a paokhaio.
9Qila maitao nou puletao paopumai khehi hrülai ea ha teitei hinou puletao le sousalai. Puletao nou paopumai taohi chila peidawu laimoe 10moa puletao hinou khei-reia potouwu laimoe. Süjüwo puletao nou soupfüyu teitei hisü Ramai Eletao Khailu-apeio vei doupei zhaina zhih avei pove loure donou puletao nou puletao hai teisanou veibaiwe ea louchelou veiwe touyu soungaolai.
11Daiolouzü Ramai nou emai hrülaihi khailu peiyu hai pove peire donou puhvei zhuvea hai pongao peiwure. 12Zhuvea hainanou Eletao hi ramai loumoyu hrü ea deiphao hi vasou züpatao thaowu-a lahye tukha-a, cheche-a, alia deiphao haina hinou ramaiye phoua hrüloure doupeiwe, 13sübüa Eletao nou dushoyu Eletao Ramai ea khailu-apeio Jisu Khrista nou khouko-ava hinou velaiyu süolouzü Eletao nou rei-a buyu rako avei Teithe süna sü kho-a bulai. 14Eletaoye hashi teitei hinou khailupa peire ea Eletaoye puhmai likhei soubaiyu ea avei souyu züpa shoyu sheetouyu maitao panou souloure donou puhlah puhye Eletaoye donou peithoure.
15Südonou haitao hai nenou doupeikhaio ea nenou sü-a ea zü-a doupeiyu hisü nevei soulousü zü teiteinoupu sei-a doupeio. Maitaliye panou neye ngaophou moyu souwuso.
Currently Selected:
TITA 2: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
