ROMMAI 12

Ramai Kuvah soure Ahrü

1Südonou Athaihou jürai maitao, Ramai zhuvea vanou Enou neletao hi khowe, süolouzü neletao nou neletao vei pfüphao hai hria sheelayu na ali büa, sheetoua ea polouveia Ramai hi popeikhaio, haisü neletao vei rako hilo rathore nasüe. 2Deiphao haina vei zhai nasü poso ana neletao vei le davou talouyu vanou Ramaiye panou neletao lekhe sü soudawuwo. Süthaisü neletao nou Ramai vei leli süolouzü aveina, polou veiyuna ea licheyu nasü sülou süe.

Lüloumaime hi Tare Zhai

3Alia Ahi peikhai touyu zhuvea süna vanou Enou neletao mai ali liye paowe. Nenou chozüyu hinou baimoa ne lah neye kupua chowuso; ana Ramai nou mai ali lihi peikhai touyu lüzha süna thaifüa leikei-a tsü cholo. 4Eletao vei pfüphao alihi zha taoli bue, alia zha haitao vei vah kukua bue. 5Süzhaibüa, Eletao hai alao khaia, Eletao sü Khristaye koa ali soulouyu hinou pfüphao alibaie, alia pfüphao alivei zha kukuyutao kua, Eletao-a alinou liye koa lou zhohrüloue. 6Südonou Ramai nou Eletao hi peikhai touyu zhuvea süna thaifüa Eletao nou Eletao vei kukuyu sapeina taosü seilai. Eletao vei sapeina hai Ramai chipao paopare nasüe toulouzü, süsü Eletao nou Eletao vei lü thaifüa paolai; 7süsü kuvah soure süe toulouzü, Eletao nou kuvah soulai; süsü doupeire süe toulouzü, Eletao nou doupeilai; 8süsü mai kukheye le souho peire süe toulouzü, sübüa Eletao nou soulai. Mai kukheye koa zha ngaozhoyu puhnou süsü ledua soulai; soure khouko buyu puhnou lenoua vah soulai; mai kukheye zhuvea peiyu puhnou süsü sasa-a soulai.

Maisou hi Tare Zhai

9Leshi hisü veikho soukhai laimoe. Ashinaye sü ngaoralo, avei nasü potoulo. 10Thaihou jürai vei khu-leshi sünanou alinou liye leshilo, alia alinou liye tsükhouyu hisü lenou toulo. 11Kou-a vah soulo ea heeso. Lenoushoa Mapao kuvah soulo. 12Neletao vei areih naye panou neletaoye le sousa-a bulo, neletao veahoyu kisü shamea toulo, alia tobai soumoa veachi paolo. 13Neletao vei abuusü veahoyu Khristamai thaihou jüraimaiye koa zhitoukhaio, alia shevai shesü donou neletao kisü houpeikhaio.

14Neletaoye souveayu maitaoye hapeikhaio; puletaoye chaso ana hapeio. 15Sayu maiye koa sazhokhaio, krayu maiye koa krazhokhaio. 16Alinou liye koa lethao-a hrülo. Khaophu souso, ana nataiyu maiye koa satalo; neletao lah neletaoye nou tsü veie tea chowuso.

17Maitali hia ashi donou ashinou rüpeiwuso, ana mai hrülai nghojünou dainou veikasa sünanou soulou baio. 18Neletao hilonou soulou veisa ha teitei hinou mai hrülaiye koa kaona-a hrülo. 19Asamaitaore, neletao lahnou khü phoukhaiso, ana süsü Ramai rarou hi thaothouwuwo; daiolouzü sheeyu larübvü nou paoe, “Khü phouyu hai Aveie, Enou pao khada peilai, tea Mapaowo nou paoe.” 20Süjüwo sheeyu larübvü nou paoyu kua: “Neletao ngaobamai houlouzü puhye sü vaipeikhaio; puhnou reilouzü puh panou külouwo; daiolouzü haibüa souyu hinou neletao nou puh pei hi meithou bokhai peilai.” 21Ashi naye panou neletaoye koloso; ana avei nanou ashi naye kolo.

Currently Selected:

ROMMAI 12: POUMBSI

Highlight

Copy