PONGAOPEIYU 21
21
Ashu Raki ea Ashu Deiphao
1Süthaisü Enou ashu raki ea ashu deiphaosü ngaoe, daiolouzü raki araina ea deiphao araina sü ngaokhai more, alia zaisü hazhei tare. 2Alia Mashee Nuhdu, ashee Jerusalem nasünou puh chaaye daore donou tutou khaitoua souda cheyu nghirepai sünabüa Ramai hinou rakivanou takouyu sü Enou ngaoe. 3Alia Enou vebuh hinou pai kushoyu alinou haibüa paoyu choue: “Zhukhaio, chuwo Ramai vei kisü emaiye koa bure! Puhnou puletaoye koa hrülai, alia puletaosü puhmaitao soulai. Ramai puh vuzünou puletaoye koa bupeilai ea puhsü puletao vei Ramai soulai. 4Puhnou puletao nghithou hinou nghidzü teiteisü southe peilai. Sühisü athaisü bupu khailaimoe, alia dopfüyu moa krayu, moa souyu sü bupu khailai moe, daiolouzü na araitao sü talata khaire.”
5Sükisü vebuh vahinou chobuyu puhnou paoe, “Zhukhaio, Enou na teiteisü soushu peire!” alia puhnou Ahi paopukhaie; “Haisü rükhaio, daiolouzü chipao haitaosü louchelouveie ea chechewe.” 6Alia puhnou Ahi paoe, “Haisü souchere! Esü Alpha ea Omega, shuraina ea akhaiwo nasüe. Rei-a buyu, maitali hisü ahri dzünghou hinou Enou panou sa-a küloulai. 7Reih kolouyu puhnou Ahinou hainasü ngaolai: Esü puh Ramai soulai, alia puhnou Anah Poutuwo soulai. 8Ana, khuhayumai lüloumomai, souzhaiwuyu maitao, maiye southeamai, khulou vah soumai, khei-khupado souyu maitao, basharaye thoyu maitao alia madayu mai hrülai taovei buhwo louzü meinou ea meichuh nou dei-a buyu meizai sünasüe, süsü athai ahai chenasüe.”
Ashee Jerusalem
9Süthaisü akhai veahoyu anainou phouyu pai anaitao poa buyu rakivamai anaitao hrohinou alinou Ahi taveloua paoe, “Tavelo, Enou ne hi Zhaotu sünavei chapfü, nghirepai sünaye nehi ngaopeilai.” 10Alia rako hinou rakivamai sünanou Eye dushoyu ea kushoyu deichi ali pei hi sapaloua Mashee Jerusalem nuhdu nasü Ramai hinou raki vanou kouyu sü Ahi pongaopeie. 11Nuhdu süsü Ramai vei avanou varupfüa bue. Alia sünavei varuyu sü muhteiyu chuh ea jaspar chuh kue, alia leireiyu zhuzhu kua leivavawe. 12Nuhdu hainavei romü kiahai buyu dushoyu ea kushoyu bouvou ali bue ea romü sütaosü rakivamai kiahai nou khoa bue. Bouvou sütao vahisü Israel maitao khü kiahai zhih rüthou khaitoue. 13Alia thyache hisü romü asüsü bue, süolouzü teinghi palo vanou asü, reikou lonou asü, khekou lonou asü, alia teinghi loulo vanou asü bue. 14Nuhdu sünavei bouvousü kifü chuhsho kiahai hinou soushupa khaitoue ea sütao vahisü Zhaotu sünavei sei-atamai kiahai zhih rüthou khaitoue. 15Ahi chipaopeia buyu rakivamai süna hisü nuhdu süna, sünavei romütao, alia sünavei bouvouye podouloure donou sananou soukhai touyu süda ali bue. 16Nuhdu süsü kaihoung adai bue ea sünavei sa-jha sü deibübaie. Rakivamai sünanou nuhdu sünasü puhvei douyu süda sünanou podoue; alia süsü kaacho 2,400 sa shoe ea jhaduyu ea kuyu-a sa shoyunaye kheihaoe. 17Rakivamai sünanou bouvou süna-a doue ea puhnou douyu sü emainou douyu zhai thaifüa süsü hacho rairou kukhewe. 18Bouvou sünasü jaspar chuhnou soue, alia nuhdu sünawo louzü zhuzhu kua leireithou sheetouyu sananou soue. 19Nuhdu süna vei bouvou kifütaosü muhteiyu chuh tyatyalinou zhai soutou khaitoue. Kifü chukho araikha nasü Jaspar chuh, ahai chenasü sapphir chuh, asü chenasü kalkedoni chuh, adai chenasü daizhü zhüyu Emeral chuh, 20angou che nasü sardoni chuh, arou chenasü karnelia chuh, anai chenasü khrisolai chuh, acha chenasü beril chuh, akü chenasü topaz chuh; kiruo chenasü khrisopras chuh, kiali chenasü jakin chuh, alia kiahai chenasü amethi chuh haitaoe. 21Romü kiahai taosü mukta chuh kiahaitaoe. Romü alilisü mukta chuh alilinou soukhaitoue, alia nuhdu sünavei duvasü zhuzhu büa peivavathou sheetouyu sananou soukhaitoue.
22Alia Enou nuhdu sühisü Rathoki alia ngaomoe, daiolouzü Khoukhou lai Ramai Mapaowo ea Zhaotou sünanou sünavei Rathokie. 23Nuhdu sühi panou valoure donou teinghi-a khou-a matsü hae, daiolouzü Ramai vei khouko avanou sühisü vüpei-a bue, alia sünavei meibvüsü Zhaotu sünae. 24Tahrüh khemai taonou sünavei ava hinou talaita-a bulai; alia deiphao hi vemaitao nou puletao vei kinisü sühi povelai. 25Nuhdu sühi romütaosü heamajüh houkhaitoua bue; sütaosü hakia khuwu laimoe, daiolouzü sühisü khei touyu bulaimoe. 26Tahrüh khemai taovei adusho ea tsükhouyu sü sühi povelai. 27Ana sheemoyu hatali moa ahraoyu vah souyu ea madayu chi paoyu maitalia nuhdu sühisü velou laimoe, ana Zhaotuvei hriyu larübvühi zhih rüthou khaitouyu puletao likheinou nuhdu sühisü velou bailai.
Currently Selected:
PONGAOPEIYU 21: POUMBSI
Highlight
Share
Compare
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
