LOUTAO 71
71
Tsümai nou Veachi Paoyu
1Oh Mapaowo, Eye panou vupa peire donou ne hi vewe;
Eye panou hraongu daoso!
2Nevei acheche hinou Eye soukha peio ae vupa peio.
Nevei noubei sü ahi pfürei peio ae Eye khailupa peio.
3Nenou avei chudu nasü soupeia Eye panou ne hinou bailo,
ae nenou khoushoyu kaopo nasü soupeia Eye khailupa peio,
daiolouzü ne hai avei chuhdu ae kaopo nasüe.
4Oh avei Ramai, Eye mai ashi maitao hinou,
cheche moyu ae leshi hayu maitao bah hinou vupa peio.
5Khoukhoulai Mapaowo, avei areih nasü ne baie.
E nahle-a bukinou neye sü louchewe.
6Avei hrümamai teitei nou neye likhei louche-a bubaie.
E nalouyu teithe hinou zhou koute hai nenou Eye kiko poa salai peie.
Enou neye sü teisa nou paosholai.
7Avei hümamai hai mainou doulu veiyu ali soua bue.
Daiolouzü nenou Eye kho-apeio nasü soupeie.
8Enou teisa nou neye paosholai,
ae nevei kathe khesü shapao peilai.
9Tsülou tayu thainou Eye malai peiso,
khouko hatayu thainou Eye thaolai peiso.
10Ngaobayu maitao nou Eye sü southanüa bure;
Eye soushi peilai tea puletao nou do ashi sü soua daloure.
11Puletao nou haibüa paoe, “Ramai nou puhye sü thaowure;
Eletao nou puhye thaihukou nülou laikhe;
puhye vupa peire mailia hare.”
12Ahinou dousho-a nou bupeiso, Oh Ramai;
avei Ramai, Eye thashoa nou tave soukha peio!
13Eye dua buyu maitaoye sü panou hraongu ngao-o ae souha peio.
Eye soushilai tea te-a buyu maitaoye sü panou veahoyu ae chaa ngaoyu soupeio.
14Enou tobai soumoa ne vureih-a bulai;
Enou neye sü paoshokhai poshokhai-a bulai.
15Enou nevei aveih khesü paolai;
Enou süve ngaovete louhoa buyuma nevei khailupa
peiyu nasü thaokhai toumoe paongao peilai.
16Khoukhoulai Mapaowo, Enou nevei khouko nasü paosholai,
Enou nevei aveih nasü shapaolai.
17Oh Ramai, E nahle-a bukinou nenou Eye sü paodou peie,
ae chu koute-a Enou nevei khupayu vah haso khesü pao-a laiwe.
18Chuo Esü tsüloure ae apei paopare,
Eye thaolai peiso, Oh Ramai!
Enou nevei khouko ae aduso nasü vere khaphao veishi hi shapao peia buyu phaki Eye koa salai peio.
19Oh Ramai, nevei khouko ae acheche nasü ratei hi khetere.
Nenou vah haso adu khesü soupeie;
neye raiyu mai aliro ha-e.
20Nenou apei hi veahoyu ae sounou khesü seive peie,
ana nenou Eye khouchi peidakhai peie;
nenou Eye khü hi loutare hinou popa peie.
21Nenou Eye raichoki jünou soudusopu peilai;
nenou Eye sousa souvapu peilai.
22Enou neye sü gaigou noupu koa paosholai,
Enou nevei chilee checheyu nasü paosholai, Oh avei Ramai.
Enou gaigou daloua ne hi lou soulai,
Oh Israel maivei Sheeyu Ramai.
23Enou asah soupoa nou ne hi lou soulai,
avei hümamai veishi nou peia nou neye lou sousholai daiolouzü nenou Eye khailupa peie.
24Enou nevei acheche nasü teisa nou paolai,
daiolouzü Eye soushilai tea laiyu maitaoye sü
nenou hraongu soupeie ae soukanghi khaipeie.
Currently Selected:
LOUTAO 71: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
