LOUTAO 36
36
Deiphao Maivei Ashi
1Mahmo sounüyu hai mai ashi
maitao vei tsüle hinou bua baiwe,
puletao hi Ramai touyu hai ha-e,
ae puhye tsükhouyu hai-a ha-e.
2Daiolouzü puletao sü lahye veisho-a ae kushoa nou tsücho-a bubaiwe,
puletao vei mah khesü Ramai nou ngaolou paimoe,
ae puletaoye ngaora paimoe tea lah tsücho-a bubaiwe.
3Puletao vei chipao laqo hai shiyu ae dayu khaiko baie,
tsüdo aveih ae vah aveih souyu nasü puletao nou thaokhaiwure.
4Puletao nou züphao hinou dazüa buyu phaki-a vah ashi soure donou tsüchoda-a bubaiwe;
puletao nou soupfüyu vah teitei sü veiyu aliro ha-e,
ae puletao nou ashi nasü malaikhai moe.
Ramai Vei Aveih
5Oh Mapaowo, nevei tobai soumoa leshiyu nasü raki hi khetere;
ae nevei chilee checheyu nasü ratei hi koute-a khere.
6Nevei achehe nasü deichitao büa kukhere,
nevei kaozü nahai zai thouyu büa thoushore.
Mai ae soukhaona khesü nenou kiko peie.
7Oh Ramai, nevei tobai soumoa leshi peiyu nasü daizhou koute muhtei-e!
Etao nou nevei shouh khe hinou bailouyu buh nasü ngaoloue.
8Nenou Etaoye touso alao soumoa peikhai touyu khesü Etao nou nevei ki hinou khonü nüa bue;
ae nenou Etaoye savayu reidzü hinou dzü sü panou küa bue.
9Daiolouzü ne hi hriloure dzüla sü bue,
ae nevei ava hisünou Etao hai vayu ngaoloua nou bue.
10Neye süa buyu maitao hisü nenou leshipu peio,
ae acheche maitao hisü vah aveih soupu peio.
11Khaophu souyu maitaoye panou Eye taida peiso,
moyuma mai ashi maitao nghoujü nou Eye panou tutaso.
12Mai ashi maitao nou kaodu tayu sü zhukhaio.
Puletao hai dazüa bure, lashupu louhore.
Currently Selected:
LOUTAO 36: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
