LOUTAO 135
135
Paoshoyu Lou
1 Mapao paosholo!
Mapao vei kilai maitao, puh zhih sü paosholo,
2 Mapao vei ki hinou kuvah soua buyu maitao,
Etao Ramai vei Rathoki hinou vah soua buyu maitao, puhye paosholo.
3 Mapao ye paosholo, daiolouzü puh hai vei-e,
puhvei zhih sü lou sousho khaio,
daiolouzü puh hai maiye zhuvea sühshoe.
4Puhnou Jakob ye sü puhvei soure donou doloue,
Israel maiye puhvei mai soure donou doloue.
5Etao Mapao hai dusho-e touyu Enou süwe,
puh hai ramai hrülai jünou dupu hie.
6Puhnou rakiva hi ae deiphao hi,
zaidu hi-a ae deikhevai hia sounü vah veishi sü souloua baiwe.
7Puhnou deiphao akhai hinou teihao seive peie,
puhnou teirü peire donou pa teisüve peie,
ae puhvei na khaiyu kide hinou teikhai sü pove peiwe.
8Puhnou Ejipt teidei hi nah nakou raikayu mai hrülai
ae kikhaorüa toukou raikayu hrülai sü southa khaitou peie.
9Puhnou Ejipt hi khupayu vah hasotao ae shee khesü veo Pharaoh
alia puhvei maitaoye tudee-a souvea peire donou soupeie.
10Puhnou tyahrü taoli hai souha peie ae khouko püshoyu veo mai taoli hai southa peie.
11Amor maivei veo Sihon,
Bashan maivei veo Og,
alia Kanaan teidei hi buyu veo mai hrülai hai southa peie.
12Puhnou puletao vei teidei khesü puhvei maitao hi peie;
puhnou sütao hai Israel mai hi peie.
13Oh Mapaowo, neye sü teisa nou Ramai-e tea shapaolai;
vere khaphao veishi nou neye sü louchelai.
14 Mapao nou puhvei maitaoye vupa peilai;
puhnou puhvei kilai maitaoye zhuvea peilai.
15Tyahrü kukhe maitao vei ramai hai shahu ae sana nou soua baie;
puletao hai deiphao mai bah nou soua baie.
16Puletao hai mü bue, ana raolou hoe;
ae nghithou bue, ana ngaocha moe.
17Puletao hai noubei bue, anou chou moe;
puletao hai ssüa hailou hoe.
18Puletaoye souyu maitao ae puletaoye loucheyu mai hrülaiye sü panou puletao nou soukhai touyu basharatao raibüa buyu sü soupeio!
19 Mapao ye paosholo, Israel maitao;
Ramai vei napao maitao, puhye paosholo!
20 Mapao ye paosholo, Levi maitaore;
puhye tho-a buyu mai hrülai, puhye paosholo!
21Zion hinou, Jerusalem hinou ae puhvei ki hinou Mapao ye paosholo!
Mapao ye paosholo!
Currently Selected:
LOUTAO 135: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
