LOUTAO 132
132
Rathoki Naye Paoshoyu
1Oh Mapaowo, David ye sü ngaipeiso,
ae puhnou veaho shoa nou soukhai touyu khesü licho peio.
2 Mapao, puhnou ne hi apaokhai touyu ae khoukhoulai Jakob vei Ramai hi chaachou soukhai touyu khesü licho peio.
3“Enou ki hi velai moe, moa züphao hi taopalai moe;
4E solai moe, moa zhilai moe,
5Enou Mapao ye donou buh souda peimo koute,
Khoukhoulai Jakob vei Ramai ye donou ki ali soupeimo koute hai.”
6Etao nou Vo Sübvü vei ko khesü Bethlehem hinou chou-e,
ae Etao nou sünasü Jearim vei dou hinou ngaoloue.
7Etao nou paoe, “Etao Mapao vei ki hi velai khe,
puhvei vebuh nghoujü nou Etao tave puhye tho laikhe.”
8Oh Mapaowo, nevei khouko buyu vei shee soua buyu Vo Sübvü noupu Rathoki hisü tave loupeio,
ae hai hinou teisa bupeio.
9Nevei napao maitaoye panou kaozü nasü teisa nou soulo;
nevei maitaoye panou sasho-a shusoua shalo.
10Oh Mapaowo, nenou nevei kilai David hi apaopei khaitoue;
nenou dolouyu veoye sü malai peiso.
11Nenou podakhailai moyu chaachou sü
David hi haibüa soupei khaitoue:
“Enou nevei nahpoutu mai aliye panou ne thaosü vekoulai,
ae puhnou ne thai hai veo soua panou khasa-a bulai.
12Nevei nahpoutu maitao nou avei vo nasü pfüthomo louzü ae Enou peikhai touyu avei chikhatao hai züa bulouzü,
puletao vei nahpoutu maitao nou teisa sü veo soua bukoute-a bailai.”
13 Mapao nou Zion sü doloure;
puhnou sühinou puh ki sü sounüe.
14“Enou buh hai hinou teisa sü bulai,
hai hinou khasa-a buyu Enou jüpa-e.
15Enou Zion hisü molou shiyu veishi hai peilai;
puhvei touha laiyu maiye Enou touso peilai.
16Puhvei napao maitao nou soupfüyu vah veishi sü Enou shiha peilai,
ae puhvei maitao nou vasa-a nou shusoua lou soulai.
17Sühi sünou Enou David vei nahpoutu mai aliye panou dushoyu veo soulai,
Enou dolouyu veoye sü Enou koa bupeilai.
18Enou puhye ngaobayu maitaoye hraongu soupeilai,
ana puhvei vedei hai panou sava-a duso palai.”
Currently Selected:
LOUTAO 132: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
