MATHIU 3
3
Johan Baptist nou Ko Paodouyu
(Mk 1.1-8; Lk 3.1-18; Jn 1.19-28)
1Süphakisü Johan Baptist nou Judea rekouhi velouloua ko paodoushu tare. 2Puhnou paoe, “Neletao mah hinou le dalouwo, daiolouzü raki Vedeihai ngheire!” 3Johan hai Isaiah rachi paolawona nou pao-a buyu mai sünasüe, süolouzü:
“Rekounou mai kamai linou shawe,
‘Mapao vei ludu nasü soudalo;
puh ludu taosü souzülo!’ ”
4Johan sahnü hai racho mainou soukhai toue; souhee khyakho alinou puh khyahi khokhaitoue, alia khahzü ea rekouhi laivoudzü hai puh tousoe. 5Maikhe mainou Jerusalem hinou, Judea teidei teitei hinou ea Jordan rei ngheiki buyu nuh teitei hinou tapaloua puh hi tave loure. 6Puletao nou puletao mah paopa-a Jordan hinou puhnou puletaoye dzükhao dapeie.
7Ana Johan nou Phariseemai ea Sadukimai taolinou dzükhao daloure donou puh hi taveyu ngaoloua puletao hi paoe, “Oh houng tyaonahkhemai! Neletaoye thaohnou vere Ramai rarouna hinou tutalouwo tea tukhapeie? 8Neletao hai neletao vei mah hinou le daloure touyu pongaoyu vah taonou souloukhaio. 9Alia Abraham hai neletao puopaoe tea pao-a Ramai rarouna hinou tutalou süe tea neletao nou chowuso. Enou neletao hi paoe, süolouzü Ramai nou chuh toutu haitao poloua panou Abraham vei tyaonahmaitao palousüe! 10Chukoute-a süübetao mahi mareisü daothou khaitoua bue; südonou rashi avei shimoyu süübetaoye sü vikaowu-a meihi polaithouwu baiwe. 11Neletao le daloure touyu pongaore donou Enou neletaoye dzünou dzükhao dapeie, ana Athainou vere puhwo neletaoye Rako Mashinou ea meinou dzükhao dapeilai. Puhwo Ajünou dukou shohie; alia Ewo puh phikha potayu koutea khamoe. 12Thaihi thoutaosü soushee loure donou puh bah hi thouhü bue. Puhnou puhvei southou taosü puhvei thoupaohi pove dzülai, ana thouba taosü puhnou ngheikhailai moyu meihi pothou deiwulai.”
Jisu ye Dzükhao Dayu
(Mk 1.9-11; Lk 3.21-22)
13Süpha kisü Jisu nou Galilee hinou Jordan hi Johanye panou dzükhao dapeire donou tave louloure. 14Ana Johan nou puhye nu-a puh hi paoe, “Nenou Eye dzükhao dapeizüe, ana newo Ahi tavewu?”
15Ana Jisu nou puh hi chila peie, “Chuo louzü sübütheo. Daiolouzü haibüyu zhai hinou Eletao nou Ramai hinou moshilaiyu teitei sü souloulai.” Südonou Johan nou aetou peire.
16Alia Jisu nou dzükhao dalou büyu thaisü dzü hinou tapa loure. Alia zhukhaio, raki sü puh hi houpa peire ea Ramai Rakonou khao büa kou puh pei hi taoyu sü puh nou ngaoe. 17Sükisü pai alinou rakinou haibüa paoe, “Haisü Enou leshiyu Anah Poutue, Enou puhye rukhare.”
Currently Selected:
MATHIU 3: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.