DOPFÜYU 5
5
Zhuvea Peio tea Veachi Paoyu
1Oh Mapaowo, Etao hi vepayu khesü licho peio.
Etaoye zhupeio, ae Etao nou veahoyu khesü zhupeio.
2Etao vei nangi khesü shetu maitao nou poloure;
vakou maitao nou Etao vei ki sü thaoloure.
3Ngaobayu maitao nou Etao vei puo maitao hai southa peiwure,
ae chuo Etao vei pfü maitao hai mimeapfü soutare.
4Etao nou keyu dzü hai muh peita laire,
ae süü khesü hrüdei talaire.
5Etaoye sü rheisüh moa racho ali büa sa-a vah soure,
Etao hai veare, ana Etaoye sü panou chao-a shobare.
6Touso ngaotoua hriloure donou Etao hai Ejipt ae Assaria mai hinou taho tosü tare.
7Etao vei puopao maitao nou mah souwure, ana puletao hai chuo tare,
ae Etao nou puletao vei mahmo donou veahoyu hai ngaore.
8Qila maitao nou Etaoye sü tukha sa-a bure,
ae Etaoye sü mailinoua puletao vei khouko hinou khailupa peire mai hare.
9Etao nou thaihri sümoa touso sü phoutare,
daiolouzü maiye southa dathayu maitao nou nuh teidei hisü sühao loure.
10Houzüa rakiyu donou Etao vei vasou hai hakhoyu thao büa soushore.
11Etao vei chapfü maitao hai Zion Deichi hinou mainou sazü sabu peire;
Judah vei nuh hinou hrüa buyu loumainah khesü mainou taitsüpoa saloure.
12Etao vei süthai-apei maitao hai nüpoho rai nou daothawure;
tsümaitaoye sü tsükhou peimore.
13Nahle maitao hai qila mai ali büa panou taitsüsa-a thou shaore;
ae nahmaitao hai panou sühshoyu koupo pfüa chaorara nou talouhoa laire.
14Tsümaitao nou nuhdu vei rokhubomü hisü ve bumore,
nahle maitao nou lou sü soumore.
15Savayu hai Etao vei hümamai hinou hatare;
Etao nou asah soupoa choyu thaosü veahoyu nou bua baire.
16Etao nou khaophu soua buyu khesü aliro hazei toure.
Etao nou mah souwure,
ae chuo Etao nou veahoyu nasü ngaore.
17Hai vanou Etao vei tsüle hai souloure,
ae nghidzü kouyu donou halia zhingao more.
18Zion Deichi sü soushiwua sakhai-a bure,
ae lakhao khenou nuhdu hisü vasho-a nou tahao baide.
19Ana oh Mapaowo, ne sü teisa vei veo süe,
ae nenou akhai ha-a nou khosa-a hrülai.
20Ne daisounou Etaoye teile haisho thaokhaiwe?
Ne Etaoye lichopu khaipeilai morevu?
21Etaoye ne hi sa-a dakhai ve peio, Mapao!
Etaoye sa-a dakhai ve peio.
Raichoki büa Etaoye sü souveipu peio.
22Molouzü Etaoye nenou teisa donou malairevu?
Nenou Etaoye rarouyu hai akhai hadou?
Currently Selected:
DOPFÜYU 5: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
