JOSHUA 8
8
Ai Maivei Nuh Polouyu alia Soushiyu
1 Mapao nou Joshua hi paoe, “Ngaopi souwo mokhaia lekhaiwu sou; reih souyu mai teitei ye saloua nou Ai mai nuh hisü talou khaio; Enou neletao hi Ai mai veo, puhvei nuhdu alia teidei sühi buyu teitei nou neletao bah hi peithouwure. 2Neletao nou Jeriko veo alia nuhdu sünahi souyu büa nou Ai mai veo alia sühi buyu mai hi soulai; neletao nou soushi khaitouyu natao alia kikhaorü likhei neletao vei zhasoua bailai; nuhdu nahisü thailo nou reih soupoa loukhaio.”
3Süthaisü Joshua nou tashuloure, alia Ai nuhdu hi tapa reih soure donou reihmai hrülaiye sü saloure; Joshua nou reih souveiyu mai thehshirou doloure, alia sümaitaoye sü kheinou seitawure. 4Alia Joshua nou puletao hi haibüa kharochi peie, “Neletao nuhdu thailo nou reih huloure donou tuchüa bulo; nuhdu hinou doushoa tasouo, neletao sühinou tuda touloua nou khoa bulai. 5Eye koa buyu maitao nou nuh palo nou reih huloulai. Puletao nou Etaoye hukou louzü, raiki büa etao nou puletao nghoujü nou tuta peilai. 6Alia puletao nou etaoye nuhdu na hupoa tala loumo koute tutalai; daiolouzü puletaoye pa haibüa paolai, ‘Raiki büa etaoye ngaopia nou tuta khaire.’ Sübüa nou etao nou puletao nghoujü nou tuta peilai. 7Süthaisü neletao nou buyu buh hinou tapaloua nuhdu nasü reih hupoa lou polo; daiolouzü Ramai Mapao nou neletao bah hisü veilouyu peilai. 8Neletao nou talou nuhdu polouyu thai, nuhdu nasü meinou deiwulai. Mapao nou paopeiyu büa neletao nou soulai; süsü Enou neletao hi kharochi peiwure.” 9Joshua nou puletaoye sü seitawure; puletao nou taho Ai maivei teidei, teinghi loulova nou buyu Bethel alia Ai nuh kohinou buloure; ana süzhou khei sü Joshua nou puh nuhmai ye koa nou bubaie.
10Thainesho shohna Joshua nou kushu zhilou-a reih soure maitaoye sü save jülou-e, alia puletao nou Ai mai nuh hi tare donou tsümaitao ye koa tare. 11Puhye koa buyu reihmai teiteiye sü sakhe nuhdu ngheia khaiwure, alia nuh pe hinou puletao nou fühao souloua bure, Ai mai nuh alia puletao kohisü reitou ali bue. 12Puhnou mai thehngou phali panou reih huloure donou teinghi loulo vanou buyu Bethel alia Ai mai nuh kohi khaiwure. 13Sübüa nou reih soure maitaoye sü nuhdu vei reilo hinou fühao souloua nou khaiwure, alia nuh thailo nou huloulai maitaoye teinghi loulo vanou khaiwure. Ana süzhou kheisü Joshua nou deikho hinou chaoa baie. 14Ai mai veo nou haihai ngaolou khaie, puhnou nuhdu hi buyu mai hrülaiye sü panou thashoa reihna tudaloua nou shona nou Jordan Deikho hisü Israel maiye reih soure donou khetare; ana puhnou Israel maitaoli puhvei nuh thailo nou reih huloulai donou da-a bue touyu sülou more. 15Joshua alia Israel maitao nou puletaoye ngaopiyu do souloua nou vaohro hilo tudakhai tare. 16Süthaisü puletao nou nuh hi buyu mai hrülaiye sü kuve jüloure, alia puletao nou Israel maiye thaihu poa nuh hinou talah pare. 17Israel maiye thaihu poa tamoyu mailiro Ai alia Bethel nuh hisü hare; puletao nou nuh sü thaowu-a Israel maiye thaihu takhaire.
18Süthaisü Mapao nou Joshua hi paoe, “Ne bah hi buyu heung nasü poloua Ai mai nuh hilo porei khaio; daiolouzü nuh hai ne bah hi Enou peiwure.” Joshua nou puh bah hi buyu heung nasü poloua Ai mai nuh hilo poreie. 19Joshua nou puh bah hi buyu heung nasü polakhaie, nuh thailo nou tuchüa buyu maitao nou nuh sü hulou poloure, alia puletao nou nuhdu sü thashoa nou mei deitare. 20Ai mainou thailo zhuveyu phaki, puletao vei nuh hai meikhao nou tei hi khaokhe-a ngaolou baire; süthai puletao nou holoa hailoa tutare ludu hazhi toure, daiolouzü puletao nou hupoa vaohro hilo tayu maitao nou puletaoye sü dudakhai koure. 21Joshua alia puhye koa sabuyu Israel maitao nou nuhdu nasü thailo nou da-a buyu maitao nou hulou poloua meidei payu ngaolou khaie, Ai maiye southare donou reih hupoa koure. 22Alia nuh hi buyu maitao nou puletaoye hushia pare; sübüa nou Ai maiye sü touchü hi thouwua Israel mai nou puletaoye sü southa khaire, panou mai aliro hria tutalou moe. 23Ana Ai mai veo ye sü hria nüloue, alia puhye sü Joshua hi save-e.
24Israel mainou Ai maiye rekounou southa khaitouyu thai, puletao nou Ai nuh hisü dakhai veloua sühi buyu na veishi hai khoche nou daoshi khaiwure. 25Süzhou teithe Ai mainou thaiyu hai poutu-naotu loua nou mai theh kiahaie. 26Ai maiye southa khailoumo koute Joshua nou popa khaitouyu heung nasü puh bah hinou poa bubaie. 27Mapao nou Joshua hi paopeiyu büa Israel mainou kikhaorü alia nuhdu sühinou soushi khaitouyu natao likhei puletao zha soua baie. 28Joshua nou Ai nuhsü meinou deiwure alia sühi buyu na teitei nou soushi khaitouwure, süsü zhaodao-a bue. 29Süthai puhnou Ai hi veo ye sü rainou teinghi loumo koute süübe hinou daokhai peie; alia teinghi loutayu phaki, Joshua nou “Puh pfüphao hai süübe hinou pokou nuh vei robomü hi laithou khaio alia puh phao hi chuh nou khokhaio,” teanou kharochi peie, süsü chukoutea buhie.
Ebal Deichi hinou Kharochi Chopeiyu
30Süthaisü Joshua nou Israel mai vei Ramai Mapao ye thoyu ranasoubu ali Ebal deichi hinou souloue. 31Süna hai Mapao kilai Moses nou Israel mai hi paopei khaitouyu raibüa souloue, süsü puhvei Chikha larübvü hi haibüa rüthou khaitoue, “Rathoyu ki hai chuh nou soulai, alia süna souyu phaki mai linoua hu basei polai moe;” puletao nou süna hinou Mapao ye poukai nüvei nou meidei-a ponayu vei poa sheelae. 32Alia sühinou, Joshua nou maisou nghoujü nou Moses vei kharochi taohai rüe, süsü raiki Moses nou chuh hinou rükhai touyu taoe. 33Süthai hai, Israel mai hrülai, vakounou ve hrüa buyu mai, alia puletao vei tsümai, peikhomai, ae chiku-apeimai taonou, Mapao vei Vo Sübvü poa buyu Levi vei napaomai tao lah-a buyu dapolo vanou bue, ae puletao mai dahli nou Gerizim deichi palonou bue, alia mai dahli taonou Ebal deichi hilonou bue. Sübüa nou Israel mai ye ha peire donou Mapao vei kilai Moses nou arai nasou-a kharochi peikhai touyu bue. 34Joshua nou süthai kharochi vei larübvü hi rüthoukhai touyu pfüphou, puhnou sühi raibüa ha tao alia chaa tao hai maisou nghoujü nou phoupeie. 35Moses nou kharochi peikhai touyu tao hai Joshua nou Israel mai hi, naotumai tao hi, mai taidu hi, alia vakou nou ve hrüa buyu mai teitei hisü chako aliro phoupei chemoyu hae.
Currently Selected:
JOSHUA 8: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
