JOSHUA 6
6
Jeriko Kaotayu
1Jeriko nuhdu hi hrüa buyu mai hai Israel maiye ngaopiyu donou kipa hiloa alia kikha levai haikhinou kikhuwure; mai aliro panou kijü pamore alia kikha-a panou loumore. 2Mapao nou Joshua hisü paoe, “Zhukhaio, Enou Jeriko hi veo alia puhvei reihmai teitei nou ne bah hisü peiwure. 3Neletao nou nuhdu sünasü tasühaolai, reihmai teiteinou koa vu ali tasü haolai. Sübüa nou neletao nou teithe arou talai. 4Napaomai anai nou shabe anai poa Vo Sübvü nghoujü nou talai. Teithe anai zhou napao maitao nou shabe nghoua nou neletao nou nuhdu nasü tasühao anai kholai. 5Puletao nou shabe paisho shoa nghouyu neletao nou süloure toulouzü, neletao mai hrülai nou paili sou-a shusou-a shalai; süthaisü nuhdu vei kivo sü kaolou khonou-a bailai, alia mai hrülai nou reih sü huloulai.”
6Sübüa nou Nun nahpoutu Joshua nou napao mai teitei ye kuloua paoe, “Mapao vei Vo Sübvü polo, alia napao mai anai nou shabe nghou poa Mapao vei Vo Sübvü nghoujü nou talai.” 7Alia Israel maisou hi puhnou paoe, “Nghoujülo takou khai-o; takou nuhdu nasü sühaolo, reih basei poyu maitao ye panou Mapao vei Sübvü jünou rai-a talo.”
8Joshua nou paopeiyu büa napao mai anai taonou zhaotu kainou soukhai touyu shabe anai polou-a Mapao ngheingao hinou nghoujülo nghou poa takoure, alia Mapao vei Vo Sübvü poyu napao maitao nou puletao thaifüa koue. 9Reih basei poyu maitao nou shabe nghouyu napao maitao jünou rai-a takoue; thailo ta-a buyu reihkhao maitao nou Vo Sübvü najünou nyanou takou-e, shabe sü thaokhai moa nghoupoa ta-e. 10Maikhe mai hisü Joshua nou haibüa kharochi peie, “Enou neletao hi shusoua shakhaiwo teanou paomo koute, neletao nou shalai moe, alia neletao nou paia panou choulai moe, mokhaia lahqo aliro panou pailai moe; Enou neletao hi shakhaio teanou paoyu thainou shalai.” 11Sübüa nou puletao nou Mapao vei Vo Sübvü poa nou nuhdu tasühao ali kholoue; süthai puletao nou dakhai kouh puletao vei fühao hinou süzhou khe chaotare.
12Joshua nou thainesho shohna nou kushu zhiloue, alia napao maitao nou Mapao vei Vo Sübvü poloue, 13napao mai anai taonou shabe anai poa Mapao vei Vo Sübvü jünou rai-a shabe sü nghoupoa takoue. Reih basei poyu maitao nou puletao jünou rai-a tapeie, alia thailo tayu reihkhao maitao nou Mapao vei Vo Sübvü najünou na-anou tae. Shabe sü thaokhai toumoa nghoupoa tae. 14Teithe ahai zhoua puletao nou nuhdu nasü tasühao ve ali khoa puletao vei fühao hisü dakhai kouh tare. Sübüa nou puletao nou teithe arou koute sü nuhdu nasü tasühaoe.
15Teithe anai zhou, teitherara payu phaki, puletao nou kushu zhiloua nuhdu pehao hai raiki büa nou tasühao ve anai khoe. Süzhou teithe likhei puletao nou nuhdu nasü tasühao anai khobaie. 16Puletao nou vu anai tave cheyu thai, napao maitao nou shabe nghouyu thai, Joshua nou puletao hi paoe, “Shakhaiwo! daiolouzü Mapao nou neletao ye nuhdu haina peiwure. 17Nuhdu alia sühinou buyu na teitei hai souha khaiwure donou Ramai hi peithouwure. Ana etao nou seitayu reihkei pomaiye Rahab nou vupeiyu donou, Rahab alia puhye koa puh ki hinou buyu maitao likhei panou hria bailai. 18Neletaowo louzü, souhawure nataoye thainü more donou alia sütao polou more donou alia Israel mainou chaoyu buh souhare buh ali souwu more donou, kaozhoushi sühi panou vemore donou, souhare hi peithou khaitouyu natao hinou tarei talo. 19Ana sühi shahu ae sana teitei, alia baosahu ae huche nou soukhai touyu likhao louzü Mapao ye donou shee-a baie; sütao hai Mapao vei chingi khaiyu buhi pothou khailo.”
20Süthai hai puletao nou shusoua share, alia shabe nghoupare. Puletao nou shabe nghouyu kho sülou khaie, mai hrülai nou shusoua shakhaie, Jeriko vei kivo sü kaolou khonou loure; süthaisü puletao nou reih hulou nuhdu nasü poloure. 21Nuhdu sünahi buyu poutumai alia naotumai hrülai, nahlemai alia tsümai hrülai, cho-ngha, zhaotu, alia rhei teitei hai khoche nou daotha khaire.
22Jeriko teidei hi talou reikei poyu mai ahai hisü Joshua nou paoe, “Khakhapfü pai ki hi talou khaio, alia ne hai nou chaachou souyu thaifüa honapai alia hopai vei tyaraitao hrülaiye sü sapalo.” 23Reikei poyu hainou talouloua Rahab, honapai pfüpuo, proumaitao, alia puhye sabuyu mai teiteiye sapaloue; puletao nou honapai kityarai hrülaiye vakou sapapeie, alia save Israel mainou fühao soua buyu buh hisü khailoue. 24Puletao nou nuhdu alia sühi buyu natao teitei hai meinou deiwure, ana souhamoyu natao hai shahu alia sana, baosahu alia huche nou soukhai touyu likhao baie, puletao nou na sütao hai Mapao vei chingi soure donou pokhailoue. 25Joshua nou reikei pomaiye Jeriko hi seiveyu phaki, Rahab nou hona haiye vupeiyu donou, Rahab alia honapai kihikha maitao alia homai taovei natao noupu Joshua nou souha moa vupapeie. Honapai kityaraitao nou süthai Israel maiye koa hrütare.
26Joshua nou süthaisü chaachou haibüa nou soue, “Mapao nghoujü nou pa chaa ngaotheo,
Maitara linoua Jeriko nuhdu haina hai soushulai teanou telouzü.
Puhmaitao vei nah narai na muh nou poa nuhdu haina vei beikhei souwulai,
alia puhmai vei nah nakha navei muh nou puletao nou poa süna vei robomü soushuwulai.”
27 Mapao nou Joshua ye sü kozo peie, süvanou puhvei zhih sü teidei teitei hi sütare.
Currently Selected:
JOSHUA 6: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
