JOSHUA 24
24
Joshua nou Shechem hinou Maisou hi Chipaoyu
1Süthaisü Joshua nou Israel mai hrülaiye sü Shechem hinou save jüloue, alia puhnou Israel mai hi tsüsoua buyu maitao, chiku-apei maitao, alia vahdumai taoye kuve jüloue; süthai puletao nou Ramai nghoujü hisü kouloue. 2Joshua nou puletao mai hrülai hisü paoe, “Israel Ramai Mapao nou paoe, ‘Neletao puopao mai-wo Euphratis rei holova nou hrüe, sühi sünou Abraham alia Nahor puo Terah laimaio rah kukhe-e thoa hrüe. 3Sühinou nele puopao Abraham ye Enou kupaloua Kanaan teidei teitei hi satae, alia puhye tyaonah taoli peie. Enou puhye nahpoutu Isaak peie; 4Isaak hisü Enou Jakob alia Esau ye peie. Enou Esau ye deichi hi buyu Seir nuhdu nahai peie, ana Jakob vei tyaonah taonou Ejipt hi kouh hrütare. 5Süthai Enou sühi Moses alia Aaron ye seivepeie, alia Ejipt maiye hatyali hinou souveasho peia neletao ye sühinou sapaloue. 6Süthaisü Enou neletao puopao ye sü Ejipt teidei hinou sapaloue, alia neletao puopao maitao nou Zai pehi kouyu phaki; Ejipt mainou rheiluki pfüloua nele puopao yesü Zai Ho hisü hukhoure. 7Puletao nou Mapao hisü kra-a soukha khoyu phaki, Mapao nou puletao alia Ejipt mai kohisü zhitei touloua panou zai dzünou pa Ejipt mai yesü maoloue; Enou Ejipt mai hi souyu vahsovei tao hai nele nghithou vuzünou ngaowe.
“‘Alia teile taoli neletao nou rekounou hrüe. 8Süthaisü Enou neletao ye Jordan rei sa-a talah paloua nou Amor teidei hi save thoupeie. Puletao nou nele ye reih souwe, ana Enou puletao ye neletao bah hi thoupeie, alia neletao nou puletao vei teidei sü poloue, alia Enou puletao ye nele nghoujü nou souha peie. 9Süthai Zipper nahpoutu Balak, Moab hi veo nou neletao ye reih souwe, alia puhnou neletao ye pa chaa peire donou Beor nahpoutu Balaam ye kulouwe, 10ana Balaam nou paolaiyu hai Enou keipei laimoe touyu puhnou süloua neletao ye hapeie; sübüa Enou neletao yesü puh bah hinou vupa peie. 11Südonou neletao nou Jordan talah loua Jeriko hisü veloue, alia Jeriko hi buyu mainou neletao ye reih souwe, alia Amor mai, Perizz mai, Girgash mai, Hit mai, Kanaan mai, Hiv mai, ae Jebus mai nou neletao ye reih souwe, ana Enou puletao yesü nele bah hi peie. 12Süthai neletao nou takouyu phaki, neletao jünou rai-a Enou Laikhidu seita peie, südonou Amor hi veo ahai yesü hulailoue; haisü neletao vei khoche alia reihlou nou veilou moe. 13Neletao vei haso lia loumoa nou teidei sü Enou peia baie, alia neletao nou soushu khaimoyu nuhdu taosü pa Enou neletao ye buloua baie, neletao nou shokhai toumoyu darkhabe alia oliv kipei hinou marashithou hraitoua baie.’
14“Südonou chuo neletaoa Mapao ye ngaopilo, alia puh vah sü chilee chechea soulo; nele puopao taonou rei holova buki alia Ejipt hi bubuki thoyu rah nasü thaowo, sükua nou Mapao vei vah sü soua baio. 15Neletao nou Mapao vei vah sü sounü molouzü zhounou thao vah soulai touyu dolouwo, nele puopao taonou rei holova buki thoyu rah nou laiho, neletao nou hrüa buyu Amor maivei rah nou laige; E alia Ahvei kihikhamai-o louzü Mapao vei vah soua bailai.”
16Süthaisü mai khemai taonou chila peie, “Etao Mapao ye thaowua rah kukhe livei vah sü souta khaitou laimoe. 17Daiolouzü Etao Ramai Mapao nou Etao puopao alia Etaoye sü Ejipt teidei hinou, hukhaki hinou sapapeie, alia Etao nghingao hinou puhnou dushoyu shee hai Etao nou tayu ludu veishi hisü soupeie, alia Etao nou talah tayu tyahrü hrülai hinou puhnou eye sü kiko sa-a vetepeie. 18Alia Mapao nou etao nghoujü nou Amor mai hrülaiye sü hulai peie; südonou etao-a Mapao vei vah sü soua bailai, daiolouzü Puh hai Etao vei Ramai-e.”
19Ana Joshua nou puletao hisü paoe, “Neletao nou Mapao vei vah sü soulou hoe; daiolouzü puh hai sheeshoyu Ramai-e; Puh hai rah kukheye ngaora shoyu Ramai-e. Puh hai neletao nou soumah-soumo khaitouyu sü khaipei laimoe. 20Neletao nou Mapao ye thaowu-a rah kukhe livei vah soutalouzü, puhnou raiki neletao hi vah aveih soupeiyu büa, neletao yesü soushi souha khaitouwu bailai.”
21Puletao nou Joshua hi paoe, “Moe, Ewo Mapao vei vah soua bailai.”
22Joshua nou puletao hi paoe, “Neletao nou Mapao vei vah soua bailai teanou dolouyu hai neletao lahnou lahvei chila louyu baido.”
Süthai puletao nou paoe, “Ovai, Etao lahkuku vei chila louyu baie.”
23Puhnou paoe, “Sükulouzü neletao hrohinou buyu rah kukhe taoye sü polaio, alia neletao vei hrümai hai Israel Ramai Mapao hi peio.”
24Süthaisü Joshua hi puletao nou paoe, “Etao nou Ramai Mapao vei vah sü soulai, alia puh chi sü zülai.”
25Süthai, Joshua nou süzhou teithe hinou mai hrülaiye sü sa-a Shechem hinou Vo soulouwe, alia kabüa hrülai touyu chikha tao alia kharochi tao hai peie. 26Joshua nou chipao sütao hai Ramai vei chikha larübvü hi rüthoulouwe; alia puhnou sühinou chuh ali poloua Mapao vei rathoki buyu süübe phihi nou shokhai louwe. 27Alia Joshua nou mai hrülai hisü paoe, “Zhukhaio, chuh haina nou etao vei shee soulai, daiolouzü Mapao nou Etao hi paopei khaitouyu chipao teitei hai choukhai touwe, südonou hai nanou Etao vei shee (shaki) soua bulai, sükumo louzü neletao nou nele Ramai Mapao hi dawushulai.” 28Sükua nou paowua Joshua nou maisoutao yesü lahkuku vei teidei hisü seitawure.
Joshua alia Eleazar Thaiyu
29Süthaisü, Mapao vei kilai Nun nahpoutu Joshua hai thaitare, puh vei mapo kaihlia kirou pa-a nou thaire. 30Puletao nou puhye sü lah puhvei dei, Timnath Serah touyu hinou, süsü Ephraim maivei teidei, Gaash deichi reilonou buyu hinou daovu peie.
31Israel mainou Joshua hria bukisa alia Mapao nou Israel maiye donou vah aveih soupei khaitouyu ngaoa buyu tsümaitao hria bukisa puletao nou Mapao vei kuvah sü souwe.
32Israel mainou Ejipt hinou poshia payu Josef vei rao hai Jakob nou Shechem nahpoutu Hamar nahmaitao hinou shahu kaih peia hrülouyu Shechem dei hisünou daovu peie; süna hai Josef tyaonah taovei kaalo soua peie.
33Alia Aaron nahpoutu Eleazar-a thaitare, puhvei thaiphao hai Ephraim mai deichi hi buyu puhvei nahpoutu Phinehas ye depeiyu Gibeah nuhdu hinou vupeie.
Currently Selected:
JOSHUA 24: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
