JOSHUA 21
21
Levi Maiye peiyu Nuhdutao
1Levi khütao hinou tsüsoua buyu taonou Napao Eleazar, Nun nahpoutu Joshua alia Israel mai khü hinou tsüsoua buyu tao hi ve-e, 2alia puletao nou Kanaan teidei Shiloh hinou haibüa paoe, “Mapao nou Moses hi kharochi peiyuo Etao ye panou hrüre donou nuhdu taoli peilai, alia Etao kikhaorü ye panou bure heiphaoa peilai teanou paowe.” 3Mapao nou paohkhai touyu thaifüa Israel mainou Levi maikhü yesü puletao vei za hinou nuhdu noupu heiphao haitao peie:
4Levi maikhü hinou arai nasoua rako zhuyu hisü Kohath kihikhamai nou paloue. Südonou Aaron napao vei tyaonahtao nou ngaolouyu zha haitaoe: Judah, Simeon alia Benjamin khütao hinou nuh kiasü hai peie. 5Süthai Kohath kihikhamai kukhe taoye rako zhuyu hisü nuh kirou hai Ephraim, Dan, alia Manasseh khü dali hinou peie.
6Gershon mainou Issakar, Asher, Naphtali alia Bashan hi buyu (teinghi palo) Manasseh mai hinou nuh kiasü ngaoloue.
7Merai mainou puhmai kihikha mai thaifüa nou Reuben, Gad alia Zebulun khütao hinou nuh kiahai ngaoloue.
8 Mapao nou Moses hi kharochi peikhai touyu thaifüa, Israel mainou rako zhuloua nuhdu haitao hai heiphao noupu loua nou Levi mai yesü peie.
9Judah alia Simeon maivei teidei hinou zhih peikhai touyu nuh haitao hai peie: 10Nuh sütao hai Levi khü hinou Aaron vei tyaonah Kohath kihikhamai taonou rako zhuyu hinou paloue. 11Puletao ye peiyu nuh taohai Kiriath-arba (Arba touyu nahai Anak puo-e), süsü Hebron hi bue, alia süpehao hinou buyu nuh tao noupu deichi va buyu nuhtaoa peie. 12Ana nuhdu sütao hi buyu ludoutao alia nuh sütao hai Jephunneh nahpoutu Keleb ye puhvei kaalo soua peie.
13Napao Aaron tyaonah taoye Hebron (maiye southayu mai nou tuchüyu nuh) loua nou nuh haitao hai peie: Libnah, 14Jattir, Eshtemoa, 15Holon, Debir, 16Ain, Juttah, alia Beth-shemesh - nuh haitao akü hai heiphao noupu loua nou Judah alia Simeon maivei teidei hinou peie. 17Süthaisü Benjamin maivei teidei hinou puletao ye Gibeon, Geba, 18Anathoth alia Almon - nuh haitao adai hai heiphao noupu loua nou peie. 19Napao Aaron tyaonah taoye nuhdu alia heiphao noupu loua nou nuh kiasü peie.
20Levi maitya Kohath kihikhamai kukhe taoye Ephraim maivei nuhdu tao hinou peie. 21Puletao ye peiyu nuhdu tao hai, maiye soumah-a southayu mainou tuve bailoure nuhdu Shechem noupu Ephraim deichi hi heiphao tao, 22Kibzaim alia Bethhoron nuh haitao adai hai peie. 23Alia Dan mai teidei hinou Elteke, Gibbethon, 24Aijalon, alia Gath-rommon nuh adai hai heiphao noupu loua nou peie. 25Süthaisü teinghi loulova buyu Manasseh mai teidei hinou Taanak alia Gathrimmon touyu nuh ahai peie. 26Kohath kihikha maiye peiyu nuhdu taohai nuh kirou-e, süsü heiphao noupu loue.
27Levi maikhü hinou Gershon kihikha maiye teinghi palova buyu Manasseh mainou Bashan hinou buyu Golan (sühai soumahyu mainou tuve baiyu nuhdue) alia Beeshterah touyu nuhdu ahai heiphao noupu loua nou peie. 28Süthaisü Issakar mainou Kishion, Debarath, 29Jarmuth, alia Engannim nuhdu haitao adai heiphao noupu loua peie. 30Asher maikhü hinou Mishal, Abdon, 31Helkath alia Rehob nuhdu adai haitao peie, süsü kikhaorü ye pa bulou veiyu heiphao noupu loue. 32Napthtali mainou Galilee teidei hinou buyu Kadesh (sühai soumahyu mainou tuve tuchüyu nuh-e), Hammoth-dor alia Kartan, nuh haitao asü hai heiphao noupu loua nou peie. 33Gershon mainou ngaolouyu nuhdu taohai heiphao nou koa loua nuh kiasüe.
34Süthai Levi maitya kukhetaoye - Merari kihikha maiye Zebulun mainou Jokneam, Kartah, 35Dimnah alia Nahalal - nuh haitao adai hai peie; 36Reuben mainou Bezer, Jahz, 37Kedemoth alia Mephaath - nuh haitao adai hai peie. 38Alia Gad maivei teidei hinou Gilead hi buyu Ramoth nuhdu (maiye southayu mainou ve baiyu nuh), Mahanaim, 39Heshbon alia Jazer - nuh haitao adai hai heiphao noupu peie. 40Levi khü hinou peiche loumoa buyu Merari kihikhamai taoye depeiyu nuh teitei hai kiahaie.
41Levi khü nou Israel mai hinou ngaolouyu nuh teitei hai raidaichae, süsü heiphao noupu koa loukhai touwe. 42Nuhdu sütao teitei hinou veishoa heiphao hai bukhai touwe.
Israel Mainou Polouyu Teideitao
43Süthaisü Mapao nou Israel mai hi teidei hai peilai tea nou puhle puopao hi chaa soukhai touyu thaifüa puletao hisü teidei hai peie, alia puletao nou teidei sütao hai talou poloue alia sühinou fükha loua hrüe. 44Mapao nou puhle puopao hi chaa soukhai touyu thaifüa puhnou puletao hisü kaonayu alia asoyu nasü peie; puletao ye ngaobayu mai linoua puhle jünou veiloumoe, daiolouzü Mapao nou puletaoye ngaobayu mai hrülai hinou veilouyu hai peie. 45Mapao nou Israel mai hi paohpei khaitouyu teitei hai ali-a veikhai toumoa soukhai tou peie; paohkhai touyu teitei sü vechekhai toure.
Currently Selected:
JOSHUA 21: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
