JEREMIAH 4
4
Ledaloure donou Kuyu
1 Mapao nou paoe, “Israel maitaore, neletao nou jüpa louzü ahi dakhai velou. Enou ngaorayu basharataoye neletao nou thaowu-a achi zü louzü, 2neletao nou azhih sü poloua chaachou soua bailai. Süthaisü#4.2 neletao nou azhih...bailai. Süthaisü; moa neletao nou checheyu hinou ae kaozü hinou azhih poa chaachou soulouzü. deiphao mai hrülai nou puletaoye hapeio tea ahi nou kholai, ae puletao nou Eye paosholai.”
3Daiolouzü Mapao nou Judah ae Jerusalem maitao hi paoe, “Neletao vei dou shamoyu taosü shawu-o, ae rai-shuh hrohi thoutai vuthouso. 4Neletao vei Mapao Eye koa vo soukhai touyu pfüthoso, ae neletao hai Eye donou soushee loua peithoulo, Oh Judah ae Jerusalem hi maitaore. Neletao nou sükulou more toulouzü, avei lekha rarou nasü mei büa tao-a bailai, ae mailinoua soungheilou laimoe, daiolouzü neletao nou vah ashi souyu donou.”
Judah hi Reih huloulai tea Piyu
5Teidei teitei hisü shabe nghoukhaio!
Pai chisho-a ae sheesha tea nou shapeio!
Judea ae Jerusalem maitao hisü kaopo veishoa soukhai touyu nuhdutao hi tuve bailo tea paopeio.
6Zion vei ludu hi bah tengaokhaio!
Chaokhai timoa tutarao!
Daiolouzü Mapao nou reilo vanou veahoyu ae souha soukayu nasü polaire.
7Khaosouveo alisü puh shibvü hinou tapare,
maikhe maiye souhawure donou tapaloure.
Puhnou Judah teidei sü souhawure donou laire.
Judah vei nuhdu khesü soushi khaiwulai,
ae nuhdu sütao hisü mai ali-a hrülai more.
8Südonou soukousah baloua dopfüa kralo,
daiolouzü Mapao vei lekha rarou nasü neletao hinou potalai moe.
9 Mapao nou paoe, “Sükisü vemaitao alia peikho maitao sü khu hatalai; napao maitao nou tsübo phouhalai ae rachipaola maitao nou khupa soulai.”
10Süthaisü Enou paoe, “Khoukobu Mapao, nenou Jerusalem maitaoye sü laluwure! Khoche nou puletao hi bulukhu nenou puletao hisü kaona-a bailai tea paopeire.”
11Jerusalem maitao hi soushoyu teikhai sü radeiki hilova nou hüpoa nou velai tea paoyu teile sü velaire. Hai nasü kaonaphi tea nou thouba hüpoa tayu teikhai laimoe — 12Mapao vei kharochi hinou vere teikhai nasü süjünou shipu sholai. Haisü Mapao puhnou puhvei maitao pei hi chikulai.
Judah ye Ngaobamai nou Sühao louyu
13Zhukhaio, ngaoba maisü teihao büa laire, puletao vei rheiluki khesü chishoyu rürai veiyu büre, ae puletao vei rheisü teihi lüche jünoua tuvei puhie. Daizhou koute ngaopisa! Eletao sü halaire!
14Oh Jerusalem, nevei tsüle hinou hashi khesü dzükhü laiwu-o, süku louzü ne khailu louyu ngaoloulai. Teile kasho koute ne sü mah vei tsücho-a bulaige?
15Dan ae Ephraim maivei deichi hinou kopomaitao nou ko ashi nasü shapaopa peie. 16Tyahrütao hi ae Jerusalem hisü puletao nou dousho-a buyu tyadei hinou ngaobamaitao sü velaire touyu sü tave paopi peiwe. Ngaobayu maitao nou Judah vei nuhdutao hisü aetou moa shurasoua shalai, 17ae puletao nou Jerusalem sü dou hi khoyu mai nou sühaoyu büa sühao loulai, daiolouzü honapai vei mainou Mapao chi züba-a khaityare. Haisü Mapao nou paoe.
18Oh Judah, haisü nenou hrüa tayu ae soupfüyu vahtao nou lah neletao pei hi pove loua baie. Nenou veahoyu sü lah nevei mah donou baie, hai nanou nevei lüthou hisü khüwure.
Jeremiah nou Puhmaitao donou Doyu
19E veare, E veare! E souzhule donou shalou hore!
A lethou! Alethou soulere!
E ngasou buthoulou hore;
Soureih soure paikho ae shabekho khaikho nou E chou-a baire.
20Shosho nou soushi poa tare;
teidei veishi sü soushi khaiwure.
Sükhai timoa Etao vei sahpaotao sü soushire;
Nghiphei ali hinou haosah khesü souhawure.
21Teile kasho koute Enou reih vei pai ae reih vei shabekho choua bulaige?
22 Mapao nou paoe, “Avei maitao hai vopare;
puletao nou Eye sümore.
Puletao hai voyu nahmai ali büre;
puletao hi sükulou süyu tsü hare.
Puletao hai vah ashi souyu hio souvei shore,
ana vah aveih louzü soupfülou more.”
Jeremiah vei Zho hinou Soushi laiyu Ngaoyu
23Enou deiphao zhukhaie — hai nasü halia ha-a raokei baire;
ae ratei zhuyu phaki — ava sü ngaomore.
24Enou deichi khesü zhuyu phaki — sütao hai ngua lere,
ae deichitao sü lekou lekhe-a bure.
25Sühisü mai liro zhingao moe;
ae raohou koute-a tuta khaitoure.
26Veishoyu teidei sü radeiki vitare;
nuhdu khesü soushi souha khaitoure daiolouzü Mapao nou rarou loure.
27(Daiolouzü Mapao nou deiphao teitei sü soushi souhawulai, ana sünanou akhai soulai moe.)
28Südonou teidei nou dopfüa kralai;
ratei sü zhitei talai.
Mapao nou haisü paopawure ae puhnou le dalai moe.
Puhnou haibüa soulai tea lela loure ae ledapu khailai moe.
29Rheipfü maitao ae voulou pomaitao pai choulou-a mai hrülai nou tutakhai toulai.
Kamai-a vaohro hi tuholai,
mai kamai nou deichiva taopalai.
Nuhdu teitei sü mai hrümoa thaowulai,
ae mai linoua sütao hisü hrüpu laimoe.
30Oh Jerusalem, ne sü daizhou koute veasa!
Daidonou ne sah maomemeyu tya banouwe?
Daisounou ne zhusana tupfüwe, ae nghiteipou na-a buge?
Hakonou ne sü natupoa bubaie!
Neye jüpayu maitao nou neye sü ngaora tare ae neye southalai tea phoua bure.
31Nah nare naotumai ali nou nalouho-a krayu pai büa Enou choue,
nah nare naotumai ali rayu pai büa Enou chou-e.
Hai nasü Jerusalem nou ssü phalouho-a kra buyu pai baire,
puhnou bah thaipalou-a haibüa paoe,
“Oh Esü halaire!
Puletao nou Eye tave southa laire!”
Currently Selected:
JEREMIAH 4: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
