JEREMIAH 32
32
Jeremiah nou Dou Ali Hrülouyu
1Judah hi Veo Zedekiah nou vekou louyu po kirou kou, süolouzü Nebukhadnezzar nou vekou louyu po kiacha kou hai Mapao nou ahi ve chi haibüa paongaoe. 2Süphaki Babilon hi veo vei reihmai nou Jerusalem hi soureih huloua bue, ae Eye veo vei hukhaki hinou bekhai toua bue. 3Mapao nou haibüa paowe tea Enou paoyu donou Veo Zedekiah nou Eye hukhaki hi thouwure, “Nuhdu hai nasü Enou Babilon hi veo bah hi peiwulai, ae puhnou nuhdu hai nasü poloulai, 4alia Veo Zedekiah nou tureipa loulai moe. Puhye sü Babilon veo bah hi peiwulai; puhai sü zhu haohao nou vedao-a chi phalai. 5Puhnou Zedekiah ye sü Babilon hi satawulai, ae Enou puhye ve daomosa sü puh sü sühinou bulai. Puhnou Babilon maiye soureih souyuma veiloulai moe. Haisü Mapao Enou paowe.”
6-7Apuo thaihou Shallum nahpoutu Hanamel nou tave puhvei dou, Anathaoth hi buyu nasü hülo tea paolai tea nou Mapao nou ahi paoe, daiolouzü puh hai Eye nghikayu avei kityarai-e, ae Enou haisü hüyu zü bue. 8Süthaisü athaihou Hanamel nou Mapao vei chipao thaifüa aki hi ve Eye puhvei dou sü hülo tea paoe. Südonou haisü Mapao nou cheche-a ahi paowe touyu sü Enou süloue. 9Enou Hanamel hinou dou nasü hüloure, ae dou muh hai shahu kianai sü phouloua puh hi peiwure. 10Enou dei hülouyu vei larü sü rüloure, ae shaki mai-a saloua sheesao sü noloure alia pousha sü phouloua chopeiwure. 11Süthaisü hülouyu vei larü ae haibülai tea rükhai touyu vei larü nasü sheesao noloua hokhai touyuna ae sheesao thoumoyu nanoupu poloua 12Mahseiah tyao, Neriah nahpoutu Baruk hi peiwure. Enou larü nasü Hanamel ae shaki maitao alia süpehao hinou la-a buyu maitao nghoujü hinou peie. 13Puletao mai hrülai nghoujü hinou Enou Baruk hi haibüa paoe, 14“Israel maivei Ramai, Khoukhoulai Mapao nou dei hülouyu vei larü, sheesao khaitouyu ae sheesao moyu ahai kheinou poloua nailee hi thou khailo tea kharochi peiwe, sükulouzü teile taoli hai bukou lousüe. 15Khoukhoulai Mapao, Israel maivei Ramai nou ki-lu, ae kipei khesü teidei hai hinou hüpulai tea paoe.”
Jeremiah vei Veachi
16Enou dei hülouyu vei larü nasü Baruk hi peiyu thai, haibüa veachi paoe, 17“Oh Ramai Mapao, nenou raki ae deiphao sü nevei khouko sünou soupeie; halia neye donou tateiyu sü ha-e. 18Nenou mai thetheye sü zhuvea leshi peie, ana pfüpuo mainou mah souyu donou nahmaiye nenou tudee peie. Ne hai dushoyu ae khouko bushoyu Ramai-e; ne sü Khoukhoulai Mapao süe. 19Nenou tsüchoda khaitouyu khesü veisho-e ae vah haso dushoyu khesü nenou soupeie; maikhe mainou soupfüyu veishi sü nenou ngaokhai touwe, ae puletao nou soupfüyu thaifüa nenou buu sü peie. 20Raichoki nenou Ejipt hinou khupayu vah khesü soupeie, ae zhou koute nenou sükhesü Israel mai hi alia tyahrü kukhe hisü soupeia nou bue, südonou buh liki neye sü sükhai touwe. 21Nenou shee ae khupayu vah sü soupeia panou Etaoye ngaobayu maitaoye sü ngaopiwe, nevei khouko ae pfüchi sünou Israel maiye Ejipt hinou sapa peie. 22Nenou puletao vei puopao maitao hi paokhai touyu thaifüa puletaoye chonaodzü ae laivoudzü nou küyu teidei sü peie. 23Ana puletao nou talou teidei nasü polouyu thai, puletao nou nevei chikha khesü zübare, moyuma nenou paodou peiyu thaifüa hrümore; nenou soupfülo tea kharochi peiyu alia puletao nou soupfülou more. Südonou nenou veahoyu haitao veishi sü puletao hi pove peie.
24“Babilon mainou nuhdu hai nasü poloure donou pehao veishi hinou reih huloure donou souda-a kholoure. Soureih, tokaayu ae sounou ashi sünou nuhdu hai nasü puletao vei bah hi thoupeiwulai. Nenou paopei khaitouyu teitei sü cheche-a vepayu hai nenou ngaolai. 25Anou Oh Ramai Mapaowo, Babilon mainou nuhdu hai nasü polou laire tea buyu teile hinou nenou Eye shakimai nghoujü hinou füdei hülo tea kharochi peie.”
26Süthaisü Mapao nou ahi haibüa paoe: 27“E hai deiphao mai hrülai vei Ramai Mapao süe. Halia Eye donou tateiyu sü ha-e. 28Enou nuhdu hai nasü Babilon vei Veo Nebukhadnezzar ae puhvei reihmaitao bah hi peiwulai; puletao nou nuhdu hai nasü poloulai, 29ae mei deiwulai. Puletao nou nuhdu hai hinou Baal rah hi poukai nüvei meidei peia buyu kitao ae rah kukhe hi zhaoh nghoupeia posheelayu kitao noupu koa meidei laiwulai. 30Israel alia Judah mainou arai hinou poa avei jüphi ae lekha rarou sü soupa koute-a laibaie. 31Nuhdu hai hi maitao nou nuhdu soushu louyu teithe hinou poa avei lekha rarou soupa koute bubaie. Südonou nuhdu hai nasü souhawure donou ale laloure, 32daiolouzü Judah alia Jerusalem hi maitao nou vah ashi sü puletao vei vemaitao ae süthai-apei maitao, puletao vei napao maitao alia rachipaolayu maitaoye koa soupfüre. 33Puletao nou ahinou pah pfüvai tare; ae Enou tobai soumoa puletaoye paodou peia buyuma keipei bare alia doulou bare. 34Puletao nou ngaora shoyu basharatao sü Eye thore donou soukhai touyu Rathoki hi koute-a polou khaipeiwure, ae puletao nou hai nasü souzhai peiwure. 35Puletao nou Hinnom Deikho hinou Baal rah ye thore donou posheelabu sü soupeie, ae puletao vei nahnaotu poutu khesü Molek rah hi posheela peire. Haisü puletaoye soulo tea Enou kharochi peimoe, haibüa Judah maiye panou mah soure sü avei tsüle hia vemoe.”
Areih bure vei Apaopeiyu
36Israel maivei Ramai Mapao nou ahi paoe, “Jeremiah, nuhdu hai nasü maikhe mainou soureih, tokaa ae rahta rahvu vanou Babilon hi veo bah hi loulaire tea pao-a nou bure. Chuo Enou daitea paolaiyu sü keilo. 37Avei lekha rarou hinou soupho rarou laikhai touyu teideitao hinou Enou avei maitaoye sü sapoa ve jüpeilai, ae Enou puletaoye sü buh hai hi sa-a dakhaive peilai alia puletaoye panou kaozhou vei-a hrüloulai. 38Süthaisü puletao hai avei mai soulai, ae Enou puletao vei Ramai soulai. 39Enou puletaoye tsüle ali ae ludu alikhei peia bailai, teile veishi hinou lah puletao ae puletao vei tyasholea panou vei-a hrüloure donou Eye tsükhoua bulai. 40Enou akhai hayu vo ali puletaoye koa souloulai. Enou puletaoye donou havei soupeiyu sü thaokhailai moe, ae Enou puletaoye panou puletao vei tsüle teitei nou Eye ngaopi-a buyu sü soupeilai, sübüa puletaoye panou ahinou tavai takhai toulai moe. 41Enou puletaoye donou havei soupeiyu vanou asalai, ae puletaoye sü teidei hai hinou teisa donou soushukhai peilai.
42“Enou mai haitao hi hashi soupeiyu bütoua puletaoye havei soupeilai touyu sü Enou paohpeiwe. 43Maikhe mainou teidei hai nasü radeiki büa mai moyuma hrikhaona ali-a hrülai moe tea paowe, ae hai nasü Babilon mai hi peiwulai tea paowe. Ana teidei hai hisü maikhe mainou ki-lu hai hüpulai. 44Maikhe mainou ki-lu khesü zhotou zhoso pulai. Haisü Benjamin maivei teidei, Jerusalem pehao hinou buyu nuhtao, Judah vei nuhdutao, alia deichitao hinou buyu nuhdutao, deichiphi hinou buyu nuhtao, ae Judah vei khelova nou buyu teideitao sü shakimai koa teidei hüyu ae zhoyu vei larü sü rüa sheesao nolai. Enou puletao vei teidei sü lukhai peilai. Haisü Mapao Enou paowe.”
Currently Selected:
JEREMIAH 32: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
