JEREMIAH 22
22
Judah hi Veo Kikhamai donou Jeremiah vei Chipao
1-2 Mapao nou haibüa paoe, “Judah hi veo vei kikhamai, David vei tyaosholea maitao hi, puhvei peikho maitao, ae Jerusalem hinou hrüyu maitao hi taho Mapao nou haibüa paowe tea paopeio: 3‘Mapao Enou neletao hisü kaozü vah ae acheche nasü soulo tea kharochi peiwe. Mainou pirayu maiye maishiyu maitao bah hinou vupa peio. Shejümai, pfüpuo hamai, moa mimea pfütaoye ngaophou moyu souyu, ae sheeyu buh hai hinou mah hayu maivei zhe soupaso. 4Neletao nou cheche-a Enou kharochi peikhai touyu khesü zü loure toulouzü, David vei tyaosholeaye panou veo soukoute peilai. Puletao alia puletao vei peikhomaitao ae mai hrülai nou robomü hai hisü rheiluki ae rheiphao hinou takou takhelai. 5Anou neletao nou avei chikha taosü zülou more toulouzü, vedei hai nasü souhawulai tea Enou neletao hi chaachou souwe. Haisü Mapao Enou paoe.’ ”
6Daiolouzü Mapao nou Judah vei vedei donou haibüa paoe, “Eye donou Judah vei vedei hai Gilead teidei ae Lebanon hi deichitao büa hüvei showe; ana Enou hai nasü mainou hümoyu buh ali soupeilai. 7Enou hai nasü souhawure donou maiye seive peilai, ae puletao nou marei sü poloua sedar süü veitya nou soukhai touyu deka khesü viloua mei hi thou deiwulai.
8“Haithai vakou mainou nuhdu haina tachopoa tayu phaki mai alinou ali hi ‘Daidosoua Mapao nou nuhdu hai nasü haibüa soupeiwure’ tea paolai. 9Süthaisü puletao nou puletao vei Ramai Mapao ye koa vo soukhai touyu nasü pfüthowure ae rah kukheye thotayu donou haibüa vepare tea chila peilai.”
Joahaz vanou Jeremiah nou Paoyu Chi
10Judah hi maitaore, Veo Josiah donou kraso;
puh thaiyu donou dopfüso.
Ana mainou nüpoa ta-a buyu puh nahpoutu Joahaz donou shusoua kralo,
daiolouzü puhsü dakhai velai more,
puhye nalouyu teidei nasü puhnou ngaopulai more.
11 Mapao nou Judah hi veo Josiah nahpoutu Joahaz, puh puo thaosou Judah hi pa vekou louyu puhye donou haibüa paoe, “Puh sü hai hinou tare, dakhai velai moe. 12Puhye nüpoa tayu buh hinou puhsü thai-a bailai, puhnou teidei hai nasü ngaopulai moe.”
Jehoikim vanou Jeremiah vei Chipao
13Cheche moyu hinou ki soulouyu maisü daizhou koute ngaopisa,
ae kaozü moyu hinou puhvei ki soukapa louyu mai hai daizhou koute vealaisa!
Zho pei moa maiye sa-a vah soulouyu maitao ae zho kuyu maiye zho peimoyu maitao;
14ae haibüa paoyu maitao sü haka talai,
“Enou ki aduli souloulai kipei detao sü veisho-a souloulai.”
Südonou puhnou vabomü khesü phaloure,
muhteiyu sedar süü nou poa souloure ae hoyu zhusadzü nou naposhu peiva valoure.
15Sedar süü nou poa ki soulouyu vanou ne sü veipuyu veo soulou laiwu?
Ne puo louzü savashoa nou hrüh chekhou tea hrüloure.
Puh hai teisa nou kaozü hinou vah soupfüe,
ae puhnou soupfüyu vah teitei hisü vei-a nou souloue.
16Puhnou touhayu mai donou checheyu hinou chi kupeie,
ha veishi hinou puhsü va-a hrüe.
Mapao ye süyu touyu sü haina paowe.
17Ana neletaowo louzü lah vi loure likhei phoua baie;
mah hayu mai zhe soukou peire ae lah maiye souchoro pei-a bubaie.
Haisü Mapao Enou paowe.
18Südonou Judah hi veo Josiah nahpoutu Jehoiakim vanou Mapao nou haibüa paoe:
“Mai liro puh thaiyu vanou dopfülai moe, moa haibüa paolai moe,
‘Daizhou koute ngaopisa, samaitaore, daizhou koute ngaopisa!
Mai liro puhye donou kralai moe, moa dopfülai moe,
Oh apaopuwo! Avei veo!’
19Rheisüh aliye daovu peiyu büa puhye povu peilai,
ae puhye Jerusalem robomü hinou vakou popa khilaiwulai.”
Jerusalem vanou Jeremiah nou Paoyu Chi
20Jerusalem hi maitaore, Lebanon hi taho shakhaio,
Bashan hi taho kra khaio;
Moab vei deichitao hinou shapao khaio,
daiolouzü neletaoye koa me zhoyu mai hrülaiye sü souhawure.
21Neletao va-a buyu teile hinou Mapao nou neletao hi paoe,
ana neletao nou keipei bare.
Neletao nou haisü neletao vei hümai veishi hinou soupfüre;
Mapao nou paoyu sü keipei bare.
22Neletao nou vah ashi soupfü khaitouyu donou neletao vei süthai-apei maitao sü teikhai nou hüpoa talai,
neletao nou leshi-a buyu hrülaiye sü hukhamai soua nüpoa talai,
neletao vei nuhdu khesü pah shilai ae hraongu ngaolai.
23Neletao hai Lebanon hinou sedar süü nou pove ki souloua vaphi tea bure;
ana veahoyu sünou neletao hi veyu phaki neletao hai naotumai ali nou nah nare donou souyu büa veasholai.
Jehoiakin Pei hi Ramai nou Chikuyu
24 Mapao nou Judah hi veo, Jehoiakim nahpoutu Jehoiakin hi paoe, “E hai cheche-a hriyu Ramai thaifüa, ne hai abah zhoulo vanou sheeshaoyu bahtukha ali soua buyuma Enou paizhou paloua 25nenou ngaopia buyu, neye southalai tea phou-a laiyu mai hi peiwulai. Enou neye Babilon hi veo Nebukhadnezzar ae puhvei reihmaitao bah hi peiwulai. 26Enou neye alia neye napeiyu pfüye sü panou hukhamai soua vakou nüpoa talai. Enou ne haiye sü namoyu tyadei kukhe hi seitawulai ae sühinou ne sü thailai. 27Neletao nou teidei haihi dakhaive hrünülai, ana dakhaive hrüpu loulai moe.”
28Enou paoe, “Veo Jehoiakin hai pepo tayu leekhou, mainou ngaora-a laikhai touyu ali büre mowu? Süvanou puhye ae puh nahmaitaoye puletao nou sümoyu teidei kukhe hi hukhamai soua nou nüpoa tarevu?”
29Oh teidei, teidei, teidei!
Mapao nou paoyu chipao sü keilo:
30“Mai haina hai nah hare tea rüthou khaiwuo,
mai hai nanou vapayu ngaolai moe.
Puh vei tou-nah nou David vei vebuh hi bulai moe,
ae Judah mai pei hi kholai moe.
Haisü Mapao Enou paowe.”
Currently Selected:
JEREMIAH 22: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
