JEREMIAH 18
18
Jeremiah nou Nailee Souyumai Ki hi Veyu
1 Mapao nou ahi paoe, 2“Nailee souyu maina ki hisü taveo, sühinou Enou ne hi avei chipao sü peilai.” 3Südonou Enou lee souyu maina ki hisü takoue, ae puhnou lee sü sou-a bue. 4Puhnou souyu lee nasü veimore touyu phaki, puhnou konai sü taopulou-a haibü louzü veilai touyu thaifüa lee kukheli souloue.
5Süthaisü Mapao nou ahi haibüa paoe, 6“Lee souyu mai nanou konai sü puhnou poa sounü souyu thaifüa Enou Israel maiye sü souzü mowu? Zhukhaio, lee souyu mai süna bah hi konai buyu büa neletao sü abah hi bue. 7Teile tarali hia Enou tyahrü ali moa vedei ali hai maa nou paila pawulai, daphe daphowulai, moyuma soushi peiwulai tea paokhai touyuma, 8tyahrü sünanou hashi souyu hinou leda loure touyu thaisü, Enou paopayu chipaotao sü Enou soulai moe. 9Ana hakinou tyahrü ali nou moa vedei taralia Enou soushu peilai ae soula peilai tea paopa-a bua 10maikhe mainou anghingao hinou hashi soulouzü, ae paoyu chi zümo louzü, Enou havei soupeilai tea choyu hinou ale data balai. 11Südonou chuo, Judah hi maitao ae Jerusalem hi hrüyu maitao Enou tudeere donou souda bure tea paopeio. Puletao nou mah souyu sü bailo — hrü ashi hrüa buyu alia kaozü moa soupfü buyu hinou ledalo tea paopeio. 12Ana puletao nou haibüa chila peie, ‘Moe, süsü hako baie. Etao mai hrülai nou rochia bua bailai alia hashi khesü Etao nou jüpayu thaifüa soubailai.’ ”
Maikhe Mainou Mapao ye Popei moyu
13 Mapao nou paoe.
“Haibüyu khesü raichoki vepaho vepa moyu tyahrü hrülai hi noukhaio.
Israel maitao nou ngaopi shoyu vah sü soupfüwure.
14Lebanon deichi peiva duki vüra hayu bue?
Kaoyu deichiva daisouyu kinou theta-a dzü kümoyu buge?
15Anou amaitao nou Eye ngaiwure;
puletao nou basharatao hi poukai nüvei meidei-a posheela peie.
Puletao nou tare ludu hinou puletao hai phi süloure,
raichoki ludu hinou puletao hai tamore;
sümoyu ludu hinou puletao hai ta-a bubaire.
16Puletao nou teidei hai nasü souposhu ngaopi showure teisa panou ngaora loure.
Tave taho ngaolouyu mai hrülai nou ngaoposhu khupalai;
khupa shoyu donou puletao pei hai ngulai.
17Teinghi palo vanou teikhai nou naihü hüpoa tayu büa Enou avei maitaoye ngaobamai nghoujünou hupho rarouwulai.
Puletao nou veahoyu vedaoyu kisü Enou puletao hi azhu ngaomoa athailo nou ngaobailai.”
Jeremiah ye Soushire donou Shodo Souyu
18Süthaisü maikhe maitao nou paoe, “Etao nou Jeremiah pei hi hali soupei laikhe! Daiolouzü teisa nou napao maitao ae hasüyu maitao nou Etaoye paodou peia bailai, ae rachipaola maitao Ramai vei chipao sü paopeia bailai. Eletao nou puhye chipao lakonou paodu peilaikhe, ae puhnou paoyu chi sü keipeilai moshe.”
19Südonou Enou veachi paoe, “Oh Mapaowo, Enou paoyu sü keipeio, ae Eye ngaobayu maitao nou chi paoyu khesü keinou khaio. 20Havei souyu thaosü hashi nou paoh khapei laiwu? Anou puletao hai Eye southare donou deibvü raokhaitoue. Enou puletao thaosou ne nghoujü nou ve la-a chipao peiyu, ae nenou puletao pei hi rarou nasü polai peiyu sü lichopeio. 21Ana chuo, Oh Mapaowo, puletao vei nahmaitaoye panou tokaa nou khütha peio; puletaoye khoche nou pa daothawuo. Napfü maitaoye panou puletao vei maipuo ae nahmaitao sü hakata peio; poutu maitaoye panou rahta hinou thaiwu-o ae nahle maitaoye pa soureih hinou southa peio. 22Puletaoye paopi peimoa reihmai seive soushi khaipeio; puletao ki hinou pa ngaopisho-a shusou kra nou bupeio. Daiolouzü puletao nou Eye southare donou khobvü hekhai toure, ae aphi pa muloure donou shorü southou peiwure. 23Ana, Mapaowo, Eye southare donou shodo ashi souyu khesü nenou süwe. Puletao nou shodo ashi souyu ae mah souyu khesü khaipeisou. Puletaoye ne nghoujü nou khilai peio, ae nevei lekha rarou hinou puletao hi souzü nasü peio.”
Currently Selected:
JEREMIAH 18: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
