JEREMIAH 10
10
Bashara Thoyu ae Acheche Ramai ye Thoyu
1Oh Israel maitaore, Mapao nou neletao hi paoyu chipaotao sü keilo. 2Mapao nou haibüa paoe,
“Tyahrü kukhe mai nou hrüa tayu zhai sü douso;
moa rakiva nou shee tyatyali ngaoyu donou tsü veaso,
tyahrü kukhe mainou ngaopi-a buyuma piso.
3Puletao vei rahrüzhai hai hako baie.
Vaohro hinou süübe ali vilou-a shara souyu mainou zhurai daolou-a baie,
4ae süna phaova sü shahu ae sana nou zhainga southou khaitoua baie.
Hai nasü panou kaodu tamore donou hushu nou veakha khaitoua baie.
5Puletao nou daokhai touyu basharatao hai Mainou dou hi lupo khikhai touyu büa baie;
sütao nou chi paolou hoe sütao hai mainou kaopoa talai.
Sütaoye sü ngaopiso:
sütao nou neletaoye soushilou hoe,
moa havei liro soupeilou hoe.”
6Oh Mapaowo, neye raiyu halia hae;
Ne hai due, Ne zhih hai due alia khouko bue.
7Tyahrü hrülai vei veo, neye sü thaonou tsükhou molaige?
Tsükhouyu nasü nenou ngaozüe.
Tyahrü hrülai hrohinou tsüveiyu maitao moa vemaitao hrohinou ne büyu mailia hae.
8Puletao hrülai nou tsü hae ae vomai baie;
süü nou daokhai touyu basharatao hinou daio douloulai?#10.8 basharatao hinou daio douloulai? moa Puletao vei basharatao nou doupeiyu khesü hamako baie.
9Puletao vei bashara khesü Spain vei shahu nou ae Uphaz vei sana nou dale khaitoue,
sütao hai maomeyu ae papayu sabanü nou banou peikhaitoue,
süsü shara souvei shoyu mainou soupei khaitoua baie.
10Ana Mapao louzü checheyu Ramaie;
Puh sü hriyu Ramaie ae teisa vei veo nasüe.
Nenou lekha payu phaki deiphao hai nüsü vewe;
ae nenou rarouyu kisü deiphao mainou lalou hoe.
11(Raki ae deiphao soupei moyu rahtao sü souha-a bailai tea maikhe mai hi paopeio. Puletaoye panou deiphao hi bupulai moe.)
Ramai ye Soushoyu Lou
12 Mapao nou puhvei khouko sünou teidei hai soupeie;
Puhvei ratsü sünou deiphao hai soupeie,
ae rakitao sü paito papeie.
13Puhvei kharochi vanou ratei hisü dzü panou ra-e;#10.13 ratei hi dzü: Shu 1.6-8 hi zhukhaio.
Puhnou teihao taosü deiphao akhai hinou pove peie.
Puhnou teireiyu nasü teirü hinou soupa peie,
ae teikhai sü puhvei ki hinou pa seive peie.
14Haitao hai ngaolouyu phaki, mai hrülai sü tsü hare ae halia sümore;
bashara souyu mai hrülaiye sü souhrao peiwure,
daiolouzü puletao nou soukhai touyu rahtao sü cheche moe ae hrirai hae.
15Sütaosü muh lia hae, ae nünüyu vah baie;
Mapao nou veyu phaki sütaoye sü souha bailai.
16Jakob vei Ramaiwo sübü moe;
puhnou ha teitei sü soupeie,
ae puhvei mai soure donou Israel maiye puhnou dopaloue.
Khoukhoulai Mapao touyu sü puh vei zhih-e.
Vakou Nüpoa Tayu Maitao Dakhai Vere
17He Jerusalem hi maitaore, neletaoye mainou nüpoa talaire! Neletao vei natao sü tulourao. 18Daiolouzü Mapao nou neletaoye teidei hai hinou polai laire; puhnou neletao mai aliro shokhai peimoa souhakhai toulaie. Haisü Mapao Enou paowe.
19Jerusalem hi maitao nou haibüa kra-a paoe,
“Etaoye sü zhishi showure!
Etao vei zhimü sü veilou hore.
Etao nou haisü healou süe tea tsüchoe.
20Etao sahpao khesü souhawure;
phupakhai touyu rai taosü detare.
Etao vei nahmaitao sü takhai toure;
Etao vei sahpao soulapu peire mai sü hare;
haosahtao sü popa haopu peire mai lia hare.”
21Enou chila peie, “Etao vei süthai-apei maitao hai tsü veimore;
puletao nou Mapao vei leli soulou more.
Südonou puletao sü kaodu tare,
ae Etao vei maitao sü raroupo tare.
22Keikhaio! Haibüyu ko sü velaire!
Reikou teidei hinou pai büshoyu velai;
süna vei reihmaitao nou Judah nuhdu khesü soushiwulai ae panou lakhao hrüyu buh souta bailai.”
23Oh Mapaowo, Enou süwe,
süolouzü mai ali vei hrü sü lah puh bah hi hae;
mai linoua lah puhvei hrü sü haibüa talai touyu hai paolou hoe.
24Oh Mapaowo, nevei maitaoye sü souzü peikhaio;
ana Etaoye souvea shopeiso,
moa nevei lekha hinou Etaoye tudei peiso;
sükumo louzü Etao hai hakata-a bailai.
25Nevei lekha rarou nasü neye tho moyu tyahrütao pei hi vepeio
ae ne chi zübayu nevei maitao pei hi peio.
Daiolouzü puletao nou nevei maitaoye southawure;
ae Etao vei teidei sü souhakhai toupeiwure.
Currently Selected:
JEREMIAH 10: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
