JEREMIAH 1
1
Jeremiah
1Larübvü haina hai Benjamin teidei hi buyu Anathoth nuhdu hinou napao ali sou-a buyu Hilkia nahpoutu Jeremiah veie. 2Mapao vei chipaotao sü Amon nahpoutu Josiah nou veo soulouyu po kiasü payu teile hinou paopeie, 3ae Josiah nahpoutu Jehoiakim nou Judah hi veo souyu po kiali koute louzü Mapao nou vuh alaosou chi paopeie. Süna po vei khouh angou teile hinou Jerusalem hi maikhe maitao hai hukhamai soua nükhai loure.
Jeremiah ye Kulouyu
4 Mapao nou ahi paoe, 5“Enou neye hrirai peimo jünou, Enou neye doloure, alia ne namo nghoujü nou Enou neye pa deiphao teitei hi rachipaola mai ali soure donou dopawure.”
6Enou chila peie, “Khoukobu Mapao, E sü nahle hie, ae chi paolou sümoe.”
7Ana Mapao nou ahi paoe, “E nahle hie tea paoso, daiolouzü Enou neye seikhai touyu maitao hisü nenou talai, ae Enou neye paokhaio tea kharochi peikhai touyu taosü puletao hi nenou paolai. 8Puletaoye ngaopiso, daiolouzü Enou neye vupeilai. Mapao Enou haisü paowe.”
9Süthaisü Mapao nou puh bahsü topalou-a amü hi deiloua haibüa paoe, “Keilo, Enou neye panou paore chipao sü ne hi paopeilai. 10Zhukhaio, Enou zhou teithe neye panou teidei ae vemai hrülaiye phaopa laiwure, souhawure ae khilaiwure, soushupei ae soula peire donou buh thoupeiwure.”
Zho Ahai Ngaoyu
11 Mapao nou ahi noue, “Jeremiah, ne dai ngaoge?”
Enou chila peie, “Almond süübo ali ngaoe.”
12 Mapao nou paoe, “Süsü cheche-e, ae Enou avei chipaotao sü vete loure donou zhu-a bue.”
13 Mapao nou ahi paopue, “Ne dai dai ngaowe?”
Enou chila peie, “Reikou nou lee ali hinou dzü kopa-a buyu Enou ngaoe.”
14Puhnou ahi paoe, “Reikou nou soushi souhayu nasü kokou teidei veishi hi raoloulai, 15daiolouzü Enou reikou nou buyu tyahrü hrülaiye sü tavelou tea kuwe. Puletao vei vemaitao nou taveloua Jerusalem vei robomü hinou ae bouvo pehao, ae Judah nuhdu teitei hinou puletao vebuh sü soushu paloulai. 16Enou avei maitaoye sü tudee peilai, daiolouzü puletao nou Eye thaowu-a rah kukheye posheela peitare, alia bahnou souyu bashara sü thotare. 17Jeremiah, ne tashuloua Enou ne hi paopeiyu chitao sü taho puletao hi paopeio. Chuo ne puletaoye ngaopiso. Nenou puletaoye ngaopi louzü, Enou ne hi puletao jünou ngaopi puyu sü peilai. 18-19Zhukhaio Jeremiah, teidei haihi buyu mai hrülai, süolouzü Judah hi vemaitao, vah adu pfümaitao, napao maitao, ae mai hrülai nou neye motoulai. Anou zhou Enou ne hi veiloure khouko sü peilai. Sübüa puletao nou ne pei hi veiloulai moe, daiolouzü Enou neye vupa peiloure donou salai peilai. Mapao Enou haisü paowe.”
Currently Selected:
JEREMIAH 1: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
