CHIKUAPEI MAITAO 5
5
Deborah ae Barak vei Lou
1Süthaisü Deborah ae Abinoam nahpoutu Barak nou lou haina hai soue:
2Israel maiye süthai-apei mainou sata peiyu phaki maikhe mainou asashoa nou thaifü peie Mapao ye paosholo!
3Oh vemai taore, keipeio,
Oh vemai nahpoutu taore, noukhaio,
Mapao hi Enou lou soulai,
Israel maivei Ramai Mapao hi paila avei nou E lou soulai.
4 Mapao, nenou Seir deichi hinou tapayu phaki,
nenou Edom teidei hinou takouyu phaki,
deiphao hai lüre,
ae raki hinou teirü koure,
teihao hinou teirü sü rükoure.
5Deichi khesü Mapao nghoujü nou,
Sinai vei Mapao,
Israel maivei Ramai Mapao nghoujü nou lüre.
6Anath nahpoutu Shamgar teile kisü,
Jael teile kisü,
duva adu khesü tamore,
ae veihao soumai nou tathoyu ludu hinou tare.
7Israel mainou sava-a hrüyu,
ae tahva daolouyu hai,
ne donou baie Oh Deborah!
nenou pfü ali soua Israel mai hi veyu donou baie.
8Israel mainou rah ashu doloukhaie,
soureih sü robomü hi ve-a baiwe.
Israel mai theraidai hrohinou
rüh moa nghou ali-a polaiyu ngaoho moe?
9Ale sü Israel reihmai vei peikhowo sü koa salaiwe,
ae sashoa loupeiyu maitaoye salaie,
Mapao ye paosholo!
10Rheisüh kaayu phao hinou tayu mai,
sah nou khukhaitoua buyu khemai,
ae talai-a tayu khemai,
haihai lichokhaio.#5.10 lichokhaio; moa paokhaio.
11Keikhaio, dzü khosü Mapao nou veilouyu pao-a bure,
Israel mainou kolouyu sü pao-a bure.
Süthaisü Mapao vei maitao nou puletao vei nuhdutao hinou tapoa koure.#5.11 nuhdutao; moyuma robomütao.
12Kaishulo, kaishulo, Oh Deborah!
Kaishulo, kaishulo, lou soukhaio!
Kushulo, Abinoam nahpoutu Barak,
nevei hukha maiye sü süthai sa-a takhaio.
13Süthaisü chilee cheche maitao nou
süthai-apei maitao hisü takoure,
Mapao vei maitao reih soure donou souda poa takoure.
14Ephraim hinou phi phaopoa deikho hisü taloure,
Ne thaifüa Benjamin khüa taloure;
Mikir hinou aduso mai khesü takoure,
Zabulun hinou peikho peire maitao sü laire.
15Issakar hi süthai-apei maitao hai Deborah ye koa tawe;
ae Issakar nou Barak chi züa
Deikho hisü puh thaifüa tae.
Ana Reuben khü hai talaiho talai moe touyu vanou büroa bure.
16Daisounou neletao zhaotu khesü sa-a bue?
Daisounou zhaokhome ye kuyu pai kei-a bue?
Reuben khü sü talaiho talai moe touyu vanou haoloua bubaire.
17Gilead maitao nou Jordan rei teinghi palova nou chao-a bure,
ae Dan maitao hai dzüluki hinou butare.
Asher maitao hai zaidu pehao hinou butare,
puletao hai zaidu pehao sahsü füsholoua buloure.
18Ana Zebulun ae Naphtali maitao nou athai ahri pimoa reih sü souwe.
19Megiddo rei Taanak teanou kuyu buh hinou vemai khesü ve reih soue;
Kanaan veo maitao-a ve reih soue,
ana puletao nou shahu aliro potalou moe.
20Teivu tao-a raki hinou reih soue;
puletao nou sübüa talikhu Sisera ye reih soue.
21Kishon rei dzüdu sünou puletaoye sü phaipoa tare,
Kishon dzüdu sünou,
Kütayu dzüdu sünou.
Arakowo, eihtea tapoa koukhaio!
22Süthaisü rhei khesü tupoa puletao phimou sünou dei hi taikaokao poa laire.
23“Meroz sü panou chaa ngaotheo,”
tea Mapao vei rakivamai nou paoe,
“Sühi hrüa buyu maitao-a panou chaa pfütheo.
Puletao hai Mapao ye soukhare donou ve moe,
khouchi maiye reih souyu hisü Mapao ye soukha moe.”
24Rako veikayu naotupai sü Jael-e,
Ken puona Heber chapfü nasüe,
rako veikayu naotupai sü
sahpao hinou buyu naotupai nasüre.
25Sisera nou dzü khokhaie,
honapai nou chonaodzü nou peie,
honapai nou khaosao veishoyu ali hinou chonaodzü popa peie.
26Honapai nou hushu sü bah alilo nou poloue,
bah zhoulo vasü hubao poloure;
Honapai nou Sisera pei hisü hushu veathou peiwure,
honapai nou puh nou hisü hushu veathou peiwure.
27Puh sü honapai phi khevai deloure,
honapai phi khevai leiloure.
Puh sü honapai phi hi kaokoure.
Puhnou kaokouyu buh hinou puh sü thaire.
28Sisera pfü nou vabomü hinou zhua bue;
kijü hinou phia bue.#5.28 phia bue; Hebrew kra bue.
“Daisounou puh vei rheiluki sü venadege?
Daisounou puh vei rheiluki khesü dakhai ve moe?”
tea honapai nou noue.
29Kilai tsüvei khana painou puh hi chila peie,
alia puhnou la puhye haibüa chila peia bue,
30“Puletao nou kini phouyu hai shaoloua zhire donou baie,
loumainah ali moa ahai hai reihmai ali donoue,
Sabanü avei hai Sisera donoue,
vepfüpaiye donou te hi toupfüre
haitao teitei sü soushire donou baie.”
31Neye ngaobamai hrülai sü panou haibüa thaikhaiwo, Oh Mapao!
Ana nevei samaitao-e panou teinghi payu büa valo!
Ae teidei hisü po raidai kaona-a hrükou loue.
Currently Selected:
CHIKUAPEI MAITAO 5: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.