CHIKUAPEI MAITAO 10
10
Tola
1Abimelek thaitayu thai, Dodo tyao, Puah nahpoutu Tola nou Israel maiye vupa peire donou ve-e. Puh hai Issakar mai khüe alia Ephraim maivei deichi hi Shamir tea kuyu nuh hinou puhnou hrüe. 2Puhnou Israel maiye khosa-a po kaisü hrüe. Süthaisü puh thaitare alia puhye Shamir nuh hinou vuh peie.
Jair
3Tola thaiyu thai, Gilead hinou Jair tea kuyu maipou nanou Israel maiye po kaihai khosa-a chiku peie. 4Puh hai nahpoutu shirou bue, alia rheisüh-a shirou bue. Gilead hi puletao vei nuhdu-a shirou bue, ae sütaosü chukoute Jair vei nuhtao tea kuwe. 5Süthaisü puh hai thaitare alia puhvei thaiphao sü Kamon hinou poa vuh peie.
Jephthah
6Israel mainou Mapao nghoujü hinou vah ashi sü soupu takhaire, alia Sairia, Sidon, Moab, Ammon ae Philitin maivei rah Baal ae Ashtaroth ye thotare, alia puletao nou Mapao ye sü thaowure ae Puhye tho more. 7Israel mai hisü Mapao vei lekha rarou sü vere, alia puhnou puletaoye Philistin ae Ammon mai bah hi zhothou peiwure. 8Po kiacha lihai puletao nou Jordan rei tachopa buyu Amor mai dei, süolouzü Gilead tea kuyu teidei hi hrüa buyu Israel maiye souvea taideisa-a hrüe. 9Amor mainou Jordan rei tachopa Judah, Benjamin ae Ephraim khütao pei hisü reihsoua Israel maiye souvea shopeie.
10Süthaisü Israel mainou Mapao hi kra-a paoe, “Etao hai ne nghoujü hinou mahwure, daiolouzü Eh nou Etao Ramai ye thaowure, alia Baal rahye sü thotare.”
11 Mapao nou Israel mai hi paoe, “Enou neletao ye Ejipt mai, Amor mai, Ammon mai ae Philistin mai bah hinou vupa peimowu? 12Sidon mai, Amalek mai, ae Maon mai nou neletaoye souchoroyu phaki, neletao nou ahinou soukha khoa Enou neletaoye puletao bah hinou khailupa peie. 13Ana neletao nou Eye thaowua rah kukheye thotare; südonou E chuo neletao ye vupa peipu khailai more. 14Neletao nou tho-a buyu rahtao hinou soukha kholo ae neletao nou veayu phaki puletaoye panou soukha peio.”
15Ana Israel mainou Mapao hisü paoe, “Eh nou mah sü souwure; nenou Etao pei hi sounü nasü soulo, ana zhouvu louzü Etaoye khailupa peio.” 16Südonou puletao nou puletao hrohinou buyu rah khesü thaowure ae Mapao ye thotare; Israel mainou veayu sü ngaoloua Ramai-a zhuvea shore.
17Süthaisü Ammon mainou reih soure donou Gilead hi velou buloure, alia Israel mai-a velou Mizpah hinou fühao souloua bure. 18Israel maiye süthai sa-a laiyu maitao sü alinou alihi paoe, “Ammon maiye reih soure hisü thaonou süthai peilai? Reih haina süthai sa-a soupeiyu mai naye sü panou Etao hrülai pei hi khasa-a hrülai.”
Currently Selected:
CHIKUAPEI MAITAO 10: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
