JEMS 3
3
Mali
1Athaihou jürai maitao, neletao mai poulo nou dou-apeimai souwuso, daiolouzü kukhe maiye jünou Eletao dou-apei maiye nou tatei koushoa chikulai touyu sü neletao nou süwe. 2Daiolouzü Eletao hrülai nou phabu sanou soumah baiwe. Ana maitalinou puhnou chi paoyu hi hakia paomah khaimore toulouzü, puhsü lichere ea puhnou puhvei hrümai teitei-a khangilou süre. 3Eletao nou rheiye panou kho züloure donou süna mühi mükhanou khawu louzü, Eletao nou puhye sü Eletao züpa buh hi satalou baiwe. 4Moa dzülukiye zhukhaio: sünahai dushokhaia ea chihshoyu teikhainou hüpoa takhaia, sünaye sü dzüluki veiyu taishoyu sücha alinou poveiloua dzüluki veimainou tanüyu buh hi talouwe. 5Südonou mali-a sübüwe: sünahai taishokhaia, sünanou ha aduli vanou khaophu soulouwe.
Kazhaibüa dushoyu vao aliye taishoyu meikei alinou deilai khailou süsa chokhaio! 6Alia mali hai meie. Haisü mahmoyu vei deiphaoe. Eletao vei pfüphao zhatao hrohinou malinou pfüphao teiteiye souzhailou veiyu buh hinou bue. Mali nou puh hi meizai vuzü hinou veyu mei sünanou Eletao hrümai teiteiye sü panou meinou deiwe. 7Emai nou kukhe khaona veishi- rekou khaosou, raohou, pounou süroutayu khaona ea khah haitaoye sü souvü lousüe ea souvülou baiwe. 8Ana maitalinou maliye sü souvülou khaimohie. Haisü thailou veiyu pou ashinou phoua buyu ea tukhashalou hoyu ashi sünasüe. 9Eletao nou hainaye posei-a Eletao Mapao ea Puoye kalo paowe, alia hainasü posei-a Ramai zhurai hinou soukhai touyu maikhe maiye chawe. 10Mü ali hinou kalo paoyu chipao ea maiye chayu chipao pawe. Athaihou jürai khemai, haisü haibüa soukhailai moe! 11Dzülamü ali hinou dzüyu ea khayu dzü küpatamoe. 12Athaihou jürai khemai, doushibe alinou oliv shi shilouhoe; moa darkhabe nou doushi shilouhoe, moa tai dzüla hinou dzüyu dzü palouhoe.
Reikounou Kouyu Ratsüna
13Neletao hrohi thaohnou tsü veiwe ea tsü süwe? Puhye panou süsü puhvei hrümai aveinou, alia nataiyu ea ratsüna hinou soukhai touyu puhvei vah aveitao nou pongaokhaio. 14Ana neletao lekhe hinou maiye ngaoraiyu, khataoyu, alia dutounüyu hai bulouzü, neletao vei ratsü süna vanou khaophu soua achechena pei hisü mah soukhaiwuso. 15Haibüyu ratsü süwo raki hinou koumoe; süsüwo deiphao veibaie, süsüwo rakovei moe, rashivei baie. 16Maiye ngaoraiyu ea dutou nüyu buh hisü bvüroyu ea ashi tyatyali bue. 17Ana reikounou kouyu ratsü sünawo rairailai hinou sheetouyu sünasüe; alia hainawo kaonayu, nashayu, alia samai-khamai soulou veiyu sünasüe; hainawo zhuvea-leshinou phoupoa bue ea vahvei taovei thou shilouwe; haiwo lekiyu ea aveikho souyu hae. 18Alia kaonayu pove peiyu mainou acheche vei chachiyu hai kaonayu hinou vuthou peikhai toue.
Currently Selected:
JEMS 3: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
