ISAIAH 57
57
Isreal Mainou Basharaye Thoyu nasü Ramai nou Aetimoyu
1Acheche mai sü thaire, anou mai linoua leloua tsücho peimoe; ae mai aveih maiye sü potare, puletaoye sü vere teikhai teirü ashi hinou poa tare touyu maikhe mainou sükulou more. 2Acheche hinou hrüyu mai sü kaonayu ngaoloulai, ae vah aveih soua hrüyu mai sü kaona-a züphao hinou soyu ngaoloulai.
3Mah souyu maitao, chikure donou haihi takoulo! Neletao hai hraomai, maipfü nahmaiye sapayu mai ae khakha-a chaozülai mai jünou veipu moe. 4Neletao thaoye konüwe? Neletao nou mü hepoa thaoye chawe, ae neletao vei mali sü daivanou thaipawe? Neletao hai mahmo souyu ae dahrührüa buyu maitao vei tounah maitao movu? 5Neletao süübe kinou tou-dzü hrüre donou ratho-a khulou vah soumovu, ae chuhlea phi kinou neletao vei nahmai sü southaloua poa sheela mowu? 6Neletao nou deikho sühinou chuh phouveih shoyu khesü poloua süna hisü neletao nou zhaoh nghoupeiwe, ae neletao nou thoudzü vei posheela nakhesü pove peiwe, neletao nou sübüa souyu khesü Enou jüpa shulai tea neletao tsüchovu? 7Neletao hai deichi kuyu vahi taopaloua khulou vah souwe, ae sühi sünou posheela khesü sheela peiwe, 8Neletao nou kikhu thailo ae dekatao hi sheemoyu zhurai khesü pokhaiwe, ae Eye thaowua neletao hai leshi paiye sazü sabu tare. Sübüa neletao vei ke-zhe jüpa nasü rukha soutare. 9Neletao nou Molek rahye thore donou theadzü ae kainüvei pou khesü naloua phoutawe. Neletao nou puhye thore donou kopomaiye holo hailo seitawe, alia thaimai nou hrüyu buh hi koute-a seitawe. 10Rah kukheye thore donou phouhaopoa tayu donou neletao hai veahore, ana neletao nou thao ba-e. Neletao hai sheemoyu basharatao nou neletao hi pfüchi peiwe tea tsücholoua baire, südonou neletao hai lelouho moe tea bubaire.
11 Mapao nou paoe, “Neletao ramai kataoye ngaopi loua ahi madawe ae Eye ngaiwe? Neletao Eye tsükhoumo tayu sü Enou neletao hi teile phasho-a chakhai toumoa nasha tea buyu donouvu? 12Neletao nou soua pfüyu vahtao hai macha-e tea neletao hai tsücholouwe, ana Enou neletao vei vah haso khesü popa ngaopeilai. Süphaki neletao vei basharatao nou neletaoye soukha peilou laimoe. 13Neletao nou kra-a soukha khoyu phaki, neletao vei basharaye panou neletaoye khailu peiyu sü soulo! Teikhai nou puletaoye sü hüpoa ta-a bailai. Ana Eye loucheyu maitao sü teidei sühi hrülai, ae avei Rathoki hinou Eye tholai.”
Ramai nou Soukha Peilai ae Souvei Peilai tea Apaopeiyu
14 Mapao nou paoe, “Avei maitaoye panou ahi tavelo. Puletao vei ludu hi khu-a buyu veishi sü polai peio! Ludu sü souta khaio, ae souda peio.
15“E sü kuyu ae Sheeyu Ramai-e, alia teisa nou bure nasüe. E hai kuyu ae sheeyu buh hinou bue, anou leda louyu mai hi ae tainou soua laiyu mai hi-a E bue, sübüa puletaoye sü Enou sousava peilai ae puletao hi areih sü peilai. 16Enou avei maitaoye sü hrirai peie, südonou puletao hisü Enou mah duka peipu khailai more alia raroupu khailai moe. 17Puletao nou mah souyu donou ae dutounüyu donou E rarou-e, südonou Enou puletaoye sü tudee peie ae thaowua Enou tavai peie. Ana puletao hai maichi züba-a lahdodo soua ta-a baie.
18“Puletao nou soupfüa buyu vah khesü Enou ngaore, ana Enou puletaoye sü souvei peilai; Enou puletaoye sü süthaisa-a tapeilai ae kra-a dopfüyu maikhe maiye sü Enou sousava peilai. 19Enou kaonayu sü mai hrülai hi peilai! Enou avei maitaoye sü souvei peilai. 20Ana mai ashimai hai zai hi dzü nou thaokhai toumoa lüa nou haoro shitya ae konai hai vakou houpayu bütoua soupeilai. 21Mai ashimaiye donou kaonayu sü ha-e,” tea Mapao nou paoe.
Currently Selected:
ISAIAH 57: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
