ISAIAH 52
52
Ramai nou Jerusalem ye Khailupa Peiyu
1Oh Zion, kaishulo, ae khouchilo!
Oh Sheeyu Ramai vei nuhdu, nevei sabanü aveih nasü tulo.
Daiolouzü sheemoyu ae vakou mainou nevei robomü hisü taloupu khailai more.
2Mainou nüpoa hukhamai soua buyu Oh Jerusalem,
tashuloua nou ne va hi konai neakhai touyu khesü khoulaiwo!
Neye phupfüa laiyu hurai nasü phalaio,
Oh Zion hi hukha maitaore!
3 Mapao nou puhvei maitao hi paoe, “Neletaoye panou maivei qila soutayu phaki muhma lia peimoe; sübüa chuo neletaoye phapeia panou lahdo soure hisü muhma ali-a peilai moe. 4Daoh raichoki neletao nou Ejipt hi talou shetumai soua hrütayu hai lah neletao nou talai tea ta-a baie, anou Assaria mai louzü neletaoye halia peimoa nüpoa ta-a baie. 5Chuo Babilon mai hai-a sübütoua neletaoye sü muhma lia peimoa hukhamai soua nüpoa ta-a baie. Neletaoye khasa-a hrüyu maitao hai khaophu soua Eye thaokhai toumoa konüa azhih sü ngaora-a bubaie. 6Vere teile hiolouzü neletao nou Esü Ramai-e touyu süloulai, alia Enou rai-a puletao hi paopeiwure touyu sü süloulai.”
7Deichi vanou ko avei paodou laiyu,
kaonayu ko ae savayu ko aveih polai mai,
ae khailu peiyu ko pao-a Zion hi “Neletao Ramai nou Veo soure” tea pao-a laiyu mai phisü daizhouzhou zhai veisa!
8Nuh kho-a buyu reihkhaomai nou sha-a bure,
puletaosü koa sasho-a nou shusoua sha-a bure!
Daiolouzü puletao nou Mapao sü Zion hi dakhai veyu puletao nghithou vuzünou ngaolai.
9Soushi khaitouyu Jerusalem,
shusoua lou sü soukhaio!
Daiolouzü Mapao nou puhvei maitaoye sü sousava peie,
ae Jerusalem sü vupa peiwure.
10 Mapao nou puhvei sheeyu bah sü thaipalai,
puhnou puhvei maitaoye sü khailu peilai
ae süsü deiphao mai hrülai nou zhingaolai.
11 Mapao vei rathoki hi poa vah souyu natao poa laiyu maitao, Babilon hinou tapalo!
Sheemoyu na ali-a deiso,
neletao lahye sousheeloua tapalo.
12Zhaovu louzü neletao hai tha-a talai moe,
alia pi-a tutalai moe.
Daiolouzü Mapao nou neletaoye sa-a tapeilai,
ae Israel maivei Ramai nou neletaoye khosa-a tapeilai.
Veayu Kilaiwo
13 Mapao nou paoe,
“Zhukhaio, avei kilai nasü veiloua duso palai,
puhye soukhou peilai, ae polashu peilai,
alia puh sü kusho palai.
14Mai alao nou puhye ngaolouyu phaki khupalai,
puh vei zhu hai tyaku sholai,
ae puhvei khaozhai hai maiye railai moe.
15Ana chuo tyahrü taoli nou khupa sholai,
alia veo maitaoli hai khupa shopoa chi paore ha-a bailai.
Daiolouzü puletao hi paopei moyu khesü puletao nou ngaolai,
ae puletao nou chokhai toumoyu khesü puletao nou süloulai.”
Currently Selected:
ISAIAH 52: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
