ISAIAH 49
49
Israel hai Tyahrü Kukheye donou Ava Nasüe
1Oh zaipe hinou hrüa buyu tyahrütao,
Enou paoyu keilo, ka doukou nou hrüa buyu maitao apai sü keilo!
Mapao nou Eye apfü pou hinou kuloure,
apfü pou hinou puhnou azhih sü sapeie.
2Puhnou amü sü hei veishoyu khoche ali büa soupeie,
puhnou puh bah sünou Eye vupa peie.
Puhnou Eye voulouthou pei southou tsüphi khaitouyu ali büa soupeie,
puhvei voulouthou pfüyu bvü hinou puhnou Eye poku peie.
3Puhnou ahi paoe, “Oh Israel, ne hai avei kilai na-e,
ne vanou maikhe mainou Eye paosholai.”
4Ana Enou paoe, “E sü hamako hinou ru-a vah souwure!
Enou halia moyu ae komoyu hinou avei pfüchi sü souhawure.”
Ana Enou soupfü khaitouyu khesü Mapao donou baie,
ae Enou soupfü khaitouyu sü avei Ramai nou Eye buu peishulai.
5Alia chuo Mapao nou paoe,
puhvei kilai panou soure donou Eye apfü pou hinou puhnou soupeie,
puhvei maitao hai puh hi sa-a dakhai vepeire donou ae Israel maiye puh hi save jüloure donou Eye kuloue.
Daiolouzü Mapao vei nghingao hinou Eye tsükhou peie,
ae Ramai nou avei pfüchi sü soupeie.
6 Mapao nou ahi haibüa paoe,
“Avei kilaiwo, Enou neye panou dupuyu vah sü soulai.
Shokhaitoua buyu Israel maitaoye nenou kupoa dakhai ve kiduso peiyu likhei bailai moe,
neye panou tyahrü hrülai vei ava ali soulai,
sübüa deiphao teitei sü panou khailu louyu sü ngaoloulai.”
7Sheeyu Israel maivei Ramai ae puletaoye khailupa apeio nou tyahrü hrülai nou jüpamoa ngaora sho-a buyu ae nuh teidei kho-a buyu maitao vei kilai na hisü haibüa paoe,
“Veo maitao nou neletaoye phapeiyu sü ngaolai,
ae puletao nou lashu neletaoye tsükhou peilai;
veo mai nahtao-a neletaoye ngaoloua puletao nou deiphi nakou neletaoye khurülai.”
Daiolouzü neletaoye sü puhvei kilai panou soulai tea dolouyu vanou louchelou veiyu Israel maivei Sheeyu Ramai Mapao nou puhvei apaopei khaitouyu nasü soupeilai.
Jerusalem Podakhai Louyu
8 Mapao nou puhvei maitao hi haibüa paoe,
“Neletaoye khaipeiyu teithe veyu phaki,
Enou neletaoye jüpayu sü ngaopeilai ae neletao nou kra-a soukha khoyu paisü Enou keipeilai.
Enou neletaoye kho peilai alia vupeilai,
ae neletao vanou deiphao mai hrülai hisü Enou koa vo ali soupeilai.
Chu mai hrümoa soushi khaitoua buyu teidei hisü Enou neletaoye panou dakhai ve hrüpu loulai.
9Enou hukhaki hi buyu maitao hisü ‘Tapalo!’
ae azhi hi hrüa buyu maitao hisü ‘Ava hi tapalo!’ tea paopeilai.
Puletao hai hiphao hinou pou tou-a buyu zhaotu büa bulai.
10Puletao hai hou-zü laimoe,
moa radeiki hi teisouyu ae teinghi noua puletaoye sü phushi loulai moe.
Daiolouzü puletaoye sü zhuvea apeio sünou süthaisa-a tapeilai,
ae puletaoye sü dzüla aveih hi süthaisa-a vepeilai.
11“Enou deichi teitei hisü duva vapeilai,
ae ludu sütao hisü panou avei maitaoye talai.
12Avei maitao sü kadoukou nou veloulai,
kamai-a reilova nou velai ae kamai-a teinghi loulo vanou velai,
kamai-a nou khelo nou buyu Aswan (Sinim)#49.12 aswan (sinim): Haina hai Ejipt vei khelova nou buyu nuhdu alie, ae hai hi Jihudimai alao bue. hinou veloulai.”
13Oh raki, lou soukhaio!
Asah sounou lou soukhaio, Oh deiphao!
Deichi khesü panou shusoua lou soukhaio!
Daiolouzü Mapao nou puhvei maitaoye sousava peiwure,
ae veaho-a buyu puhvei maitaoye sü puhnou zhuvea peie.
14Ana Jerusalem hi mainou paoe,
“Mapao nou Eye thaowure,
Puhnou Etaoye mangaiwure.”
15Südonou Mapao nou chila peie,
“Naotumai ali nou puhvei nahtouye ngailou süvu,
ae honapai nou nakhai touyu nahtou naye leshi laimowu?
Honapai nou nahtouye ngaiyuma Ewo louzü neletaoye ngaikhai toulai moe!
16Oh Jerusalem, Enou neye mangaikhai laimoe!
Enou nevei zhih sü abahla hi rüthouwure.
17“Neye soushupu peire mai nasü thashoa laire,
ae neye soushiyu maikhesü talaire.
18Ne pei pfüla loua zhuhaove khaio,
nevei maitao sü tave jüloua ki hi veloure!
E hai hriyu Ramai chekhaoyu thaipfüa nenou nevei maitao donou khaophu soulai,
nghire naotumai ali nou zhusana tutoupfüa khaophu souyu büa ne-a khaophu soulai.
19“Soushi khaitouyu nevei tyadei ae thaowua buyu teidei khesü,
chuo nevei maitao nou tave hrüre donou teidei sünasü taileshu laire.
Neye soushi khaitouyu maikhesü panou kadou sho-a tashu laire.
20Mainou nüpoa taho vakou maivei teidei hinou nalouyu nahmai khenou ne hi haibüa paolai,
‘Teidei haina hai Etaoye donou taiyu lere,
Etao panou bure donou füdei peipu peio.’
21Süthaisü ne le hinou haibüa tsücholai,
Mai haitao hai thaonou Eye napeie? Esü nahmai hrülai nou hazei toudao,
ae nahapfü ali soua soureih hinou nüpoa hukhamai ali soua vakou saho khaiwure,
ana chuo thaonou mai haitao hai kikopa peisa?
Eye sü lah likhei khaipeia baie,
ae chuo mai haitao hai daikinou vege?”
22Ramai Mapao nou paoe,
“Enou tyahrütao hisü shee ali soungao peilai,
ae puletao nou neletao vei nahmaitao sü ki hi save peilai.
23Veo maitao nou neletaoye kiko peiyu puo ali soulai,
ae vemai pfütao nou neletaoye kipeiyu pfümai soulai.
Puletao nou neletaoye nakou khurülai ae neletaoye khuhao-a tsükhou peilai.
Süthaisü E hai Mapao nasüe touyu neletao nou süloulai;
Avu rei-a Eye khoyu mai taralia hraongu ngaolai moe.”
24Soureih souyu hinou shaolouyu natao sü reih souvei shoyu mai bah hinou shaopalou süvu?
Moa zhaipou shiyu mai bah hinou nüpoa tayu hukhamaiye khailu palou süwu?
25 Mapao nou haibüa chila peie,
“Khouko bushoyu reihmai nou nüpoa tayu hukhamai koute-a popa loulai,
ae zhaipou shishoyu mainou soureih hinou shaolouyu kinitao-a shaopa loulai.
Neletaoye reih soua duyu maikhe sü Enou dulai,
ae Enou neletao nahmaitaoye khailupa peilai.
26Enou neletaoye souvea souchoroyu maitaoye sü panou lah puletao vei sou sü toulai,
ae zhaoh sozhiyu büa panou puletaoye sü lah puletao vei zhe kelai.
Süthaisü deiphao mai hrülai nou E hai Mapao, neletaoye khailupa-apeio ae neletaoye panou lahdo soulouyu Ramai nasüe touyu süloulai.”
Currently Selected:
ISAIAH 49: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
