ISAIAH 47
47
Babilon Maiye Tudeire
1 Mapao nou paoe,
“Oh Babilon, nevei vebuh hinou taokouloua kou deiphi hi chobulo.
Ne sü raichokio mainou sabu-sazü khaitou moyu loumainah ali büa bue,
ana chuo neye sü hrünowe ae chimoe tea paopu khailai more!
Newo chuo qila mai soutare!
2Thou saoyu chuh sü polo ae sou saokhaio!
Ne pah hosah nasü laopa-o! Nevei sabanü aveih khesü phakhaio!
Reidzü kachore donou ne nü sü laokhelo.#47.2 reidzü kachore donou ne nü sü laokhelo: Haina hai puletaoye vakou nüpoa tare donou paoyu phae.
3Nenou sabanü noumoa baitouyu sü maikhe maiye panou ngaolai,
neye hraongu soupeiyu sü maikhe maiye panou zhingaolai.
Enou khüngu sü phoutalai, mai ali koute-a shokhai peilai moe.”
4Etaoye khailu-apeio, Khoukhoulai Mapao touyu sü puhvei zhih-e,
Puh hai Sheeyu Israel maivei Ramaie-e.
5 Mapao nou Babilon mai hi paoe,
“Ngasou teizhi hi sünou chobulo,
daiolouzü mai linoua neye sü tyahrütao vei veopfüpai tea kupu khailai more.
6Enou avei maitao pei hisü rarou loure,
avei kikaa thaore maitaoye sü ahrao soupeie:
Enou puletaoye sü ne bah hi thoupeie,
anou nenou puletaoye sü zhuvea peimoe;
tsümai koute-a nenou koupo sü sühpua nou peia baie.
7Ne sü teisa nou veopfüpai soua bukoute-a bailai tea tsü choloure,
südonou haibüyu khesü nenou tsücho lou moe,
moa kabüa akhai soulaisa touyu hai-a tsücholou moe.
8“Südonou chuo haisü keilo khaio,
asah ralea jüpa-a laiyu maitao,
kaozhou ashi vepai moe tea vaphia-a nou haibüa
tsücho-a buyu maitao, ‘E deinou, thaonou Eye raiyu busü;
Esü meamaipfü ali soukhai toulai moe,
moa nahmai-a thaisou sü soukhailai moe.’
9Ana nghimaisü ali hinou ae teithe ali hinou haina ahai kheinou ne hisü velai.
Nenou kheikhupado tyatyali soulou süshoa buyuma nevei tounahtao ae maipuo sü ne hinou hata-a bailai.
10“Ne sü lah nenou souyu vah ashi khesü louche-a ‘Mai lia Eye ngaolou hoe’ tea paowe.
Nevei hasü ae tsüvei sünou neye sü süthaimah poa tare,
ae lah ne lekhe hinou haibüa tsücho-e ‘Esü Ramai-e, Eye büyu mai ali-a ha-e.’
11Ana ashi sünou ne hisü velai,
ae süsü nenou dotyali souyuma nukhailou laimoe,
Veahoyu sü ne pei hi veloulai, ae sünasü nenou turei palou laimoe,
alia nenou sükhai moa buyu hisünou hakayu sü ne hi velai.
12Nenou nahle-a bukinou soupayu kheikhupado khesü soutaosou khaitou toulo.
Sükulouzü nenou veiloua malae,
ae neye ngaobayu maiye soupi lailoua mala-e.
13Neye tyatyali soua paodou peiyu donou ne sü veapua baie.
Teivu ae khouh ashu zhipoa vepare süyu maiye panou tave ne hi dai-e vepalai touyu khesü paopeio ae neye vupa peio.
14“Zhukhaio, puletao hai rouvao büa baie,
mei nou puletaoye deilai bailai!
Puletao hai lahnou lahye meikei hisünou khailupa loulai moe,
mei vore meithou sü ali-a hare.
15Nenou nahle-a bukinou te-a vah soua laiyu ae puletao nou neye soukha peilou süyu sü sübüa baie.
Neye mai linoua khailu peiloure ha-e,
puletao mai hrülai sü lahkuku vei bo phouloua tuta-a bailai.”
Currently Selected:
ISAIAH 47: POUMBSI
Highlight
Copy
Compare
Share
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
